قالت ليهم و هي بتصرخ بـطريقه غير طبيعيه ، فكوني ياخ ، زحوا مني ، ما تهبشوني ، قلت ليكم زحوا ....زحوا مني ، فكوني ياخ و قعدت على الأرض و هم ماسكنها من يدينها ....واحده من الممرضات رفعت يدها و ضربتها كف و قالت ليها ما تتعولقي فينا ، التانيه جرتها من شعرها و قالت ليها أحسن ليك تخلي الجن البتعملي فيهو دا ، نحنا تعبنا منك و من الصراع معاك كل يوم ...
بقت تصارع فيهم و هي تصرخ و تبكي لغاية ما جات دكتوره جاريه إسمها رانيا ، هرشت الممرضتين و قالت ليهم فكوها !! منو السمح ليكم تطلعوها من غرفتها ؟! وحده منهم قالت ليها دكتور عصام قال نجيبها هنا ، قالت ليهم و دكتور عصام دا ليه بتصرف من عندو !! سرعه رجعوها مكانها و إياكم تتعاملوا معاها بعنف لا هي لا أي مريض غيرها ، لو أسلوبكم دا اتكرر تاني صدقوني حـ تنطردوا من هنا ، و دكتور عصام دا أنا حـ اتكلم معاهو ، فعلاً البنتين رجعوها غرفتها و مشوا ، قعدت على السرير و ضمت رجلينها عليها و فجأه بقت تضحك بطريقه غريبه ، كانت بتضحك بصوت عالي و هي دموعها زي السيل!
في الباب كانت واقفه دكتوره رانيا و هي مربعه يدينها و بتعاين ليها بكل أسف ، جاتها دكتوره إبتسام ، وقفت جنبها و قالت ليها ليه يا رانيا بحسك من بين كل المرضى متعاطفه مع البت دي تحديداً !! يعني انتِ من جيتي هنا ما تميتي معانا شهر !!....قالت ليها لأني عارفه الحصل معاها ، من أول يوم شفتها حسيت إني لازم أعرف قصتها ، ملفها ما كان فيهو تفاصيل كتيره و حتى لو فيهو تفاصيل أكيد ما حـ تتلخص فيهو كل حياتها و الأسباب الخلتها توصل للحاله دي ، أنا بالجد متعاطفه معاها لأنو الحصل ليها ما هين و هي لسه في العمر دا ، قلبي واجعني شديد لأنو انكتب ليها تتواجد هنا و المحزن إنو ماف أي تحسن في حالتها و كل يوم ماشه للأسوا ، ما قاعده تستجيب لأي علاج و معظم الوقت بتكون ساكته و لو إتكلمت بتتكلم مع الكرسي الفي غرفتها أما باقي الناس خالص ما بتفتح خشمها معاهم ، حتى أهلها لمن يجوا يزوروها ما بتتكلم معاهم و مرات بترفض تقابلهم ، دكتوره ابتسام قالت ليها لكن مرات بتسمع كلامك ، قالت ليها أنا بتعب شديد عشان أخليها تتفاعل معاي و تسمع مني بس مرات عديل بتغلبني ....
دكتوره رانيا دخلت عليها و قالت ليها كيفك يا حلوه ؟؟
ما ردت عليها كانت لسه بتضحك و جنبها في دفتر ، أول ما دكتوره رانيا شالتو هي خطفتو منها و حضنتو و بقت تضحك شديد بعدها بقت تبكي و تجرجر في شعرها ، دكتوره رانيا حاولت تهديها بس كانت بتتجنن زياده فـ إضطرت تديها حقنه مهدئه ، بعدها جا دكتور عصام داخل و قال ليها يا دكتوره ليه بتدخلي في شغلي !!؟ قالت ليهو ما بتدخل في شغلك يا دكتور لكن البت دي كفاها صدمات كهربائيه !! قاليك بتتأخد ساي هي !!
قال ليها كدا انتِ بتقللي من قيمتي ! البت دي أكيد ما بتهمك أكتر مني و ما أذكرك إنها قريبتي !! قالت ليهو ما إختلفنا لكن ما ممكن 24 ساعه تاخد صدمات كهربائيه !!!
قال ليها أنا متابع حالتها و عارف كويس المفروض ينعمل ، فـ رجاءً ما تدخلي في شغلي و خليك مع المرضى تبعك 😊
بعد قال ليها كدا طلعت و خلتو ، مشت مكتبها و قعدت هناك بزهج ، جات لاحقاها دكتوره ابتسام ، قعدت و قالت ليها البت دي قصتها شنو يا رانيا ؟؟
أخدت نفس و قالت ليها قصتها طويله و محزنه ، عرفت من أهلها انو راجلها مات قبل 5 شهور ، و تفاصيل قصتها جزو عرفتو منها هي و جزو قريتو من دفترها ، تقريباً هي ملخصه فيهو كل تفاصيل حياتها ، دكتوره ابتسام قالت ليها يعني هي واعيه لدرجة إنها تكتب قصتها !! يعني قادره تسترجع و تتذكر تفاصيل حياتها ؟؟!
قالت ليها لا بس شكلها كتبت الكلام دا في الأيام الأولى من تواجدها هنا ، أنا لمن جيت قبل شهر الدفتر دا كان زي ما هو و لغاية الآن ما كتبت فيهو حرف واحد زياده ، لأنو وضعها ساء شديد 💔
دكتوره إبتسام قالت ليها ما تشغلي بالك يا رانيا ، كتار هنا عندهم ألف قصه و قصه اتسببت في تواجدهم هنا ، كتار الحياه بهدلتهم و وصلتهم لمرحله أقرب للجنون و كتار بقوا مجانين ....عشان كدا ما تخلي قلبك رهيف ، انتِ دكتوره فـ ما تخلي قصة المريض و تفاصيل حياتو تأثر عليك ...
تاني يوم دكتورهـ رانيا مرت على المرضى تبعها كلهم و راجعت ملفاتهم ، كانت ماشه على مكتبها بس اتذكرت مريضة دكتور عصام و قالت حـ تمشي تشوفها ، فعلاً مشت ليها في غرفتها ، لقتها قاعدهـ على الأرض و ضامه رجلينها عليها و شعرها منكش و حالتها كانت بالبلا ، جات فتحت الدرج و طلعت فرشه و مشط ، قعدت معاها على الأرض و بدت تسرح ليها في شعرها و هي بتتكلم معاها ، بس ما كان في أي رد منها ، دكتوره رانيا قالت ليها :
عارفـه انك سامعاني و فاهمه كل البدور حولينك بس انتِ ما قادرهـ تطلعي من قوقعة حزنك دي أو إنتِ الما عايزا تطلعي منها ، أنا حاسـه إنو لسه ما فات الآون ، لسـه انتِ قادره تنقذي نفسك ، ما تبخلي على نفسك بالحريه .... انتِ ما مليتي من القعاد هنا ؟؟ ما زهجتي من الصدمات الكهربائية !؟ ما حاسـه انك مخنوقه لأنك قاعده وسط 4 حيطان من شهور !؟ ما كرهتي الحاله دي ؟؟ عاجبك المكان دا ؟؟ ما نفسك تتحرري !؟ ... ليه بتعملي كدا في نفسك و انتِ ياداب في أول شبابك ! ايوه أنا عارفه إنو المريتي بيهو ما ساهل بس صدقيني عدم الصبر و عدم الرضى بقضاء ربنا حـ يدخل الشك في قلبك و حـ يخليك في متاهه مظلمه قد تستمر لسنين ، أفهمي يا مها إنو النهايه ما هي إلا بدايه لـحاجات جديده ، ايوه في نهايات كتيره مليانه حزن و زعل لكن بعدها في بدايات مليانه سعاده و فرح ممكن ينسيك كل وجع مريتي بيهو ، لازم تفهمي إنو الحياة تجارب و مراحل ، لو ما اتقبلتي إنتهاء التجربه الأولى ما حتقدري تمشي للمرحلـه الثـانيه ، أبكي ، أشكي ، عصبي ، أعملي أي شي و بعدها أقلبي الصفحه ، و أدعي ربنا الثبات و إنو يربط على قلبك و يلزمك الصبر ....
