في الماضي ٢ 『رحلة ثلاثيني』

في الماضي 21

                   الجزء الثاني【رحلة ثلاثيني】
                     الفصل الحادي و العشرين

ْ
نظر له إياد و تلئلئت الدموع في عيناه و عانق حمزه بشده و أردف .
_كل ده ... طب مقُلتليش ليه يا حمزه؟
_شدد حمزه علي إحتضانه و أردف : كنت هقُلك إيه يعني يا إياد .. أصلًا راجح عرف بالصدفه .
_أخرجه إياد من أحضانه و أردف : ليه مخبي؟
حك حمزه مؤخرة رأسه و أردف .
_امم يعني مش عايز أصعب علي حد .
_إياد : تصعب علينا إيه يا حمزه ... أنت غبي ليه .
_حمزه بضحك : الله يكرم أصلك .
أعتدل إياد في جلسته و صمت قليلًا و بعدها أردف بتساؤل .
_هو ده هيعود علي شغلك بالسلب!
أومأ له حمزه و أردف بحزن .
_لو عرفوا في المبني هيستغنوا عن خدماتي و يقيلوني من الشغل .
صمت إياد بحزن و بعده تحدث بتوجس .
_و أنت إيه اللي هيخليك تخاطر بصحتك عشان شغلانه .. أقصد يعني ما تفكك من الشرطه و المأموريات و كل الإجهاد الذاتي ده و خد بالك من نفسك .
صمت حمزه قليلًا و هو يستمع إلي وجهة نظر إياد و بعدها أردف .
_لأ يا عم أنا حابب كده و حابب مركزي و حابب أخاطر بصحتي و بعدين يعني هي موته ولا أكتر .. "صمت هُنَيهه و تحدث" ... أنا أصلًا داخل شرطه عشان أتشاهد.
ْ
نظر له إياد قليلًا و شعر بأن ذاك الحديث و السيناريو قد صقط علي مسامعه من قبل .. أجل ... أنه أستمع له بالأمس من قِبَل رماح و أنس و سيف .. نفخ بغضب و لم يُعُقْب علي حديثه هذا .. فتحدث حمزه بتوجس .
_أعتقد إني وديت نفسي في داهيه .
نظر له إياد و قام برفع حاجبه بعدم فهم و أردف .
_وديت نفسك في داهيه إزاي .
_حمزه : حاسس إنه مكنش ينفع أقُلك ....
قاطعه إياد و أردف .
_ليه يعني يا حمزه ... كنت هتفضل مخبي لحد أمتى .
ضحك حمزه و أردف .
_أنت فاكر إني كده قايل للكل ده يا دوب تلات أنفار أنت و راجح و أدهم .. يا حبيبي دي هاجر مراتي متعرفش ولا هقُلها .
_أتسعت حدقتي إياد و أردف : و ده ليه بقا!
_حمزه : مش عايز أقُلها يا عم .
صمت قليلًا و بعدها تحدث بتساؤل .
_قُلي بقا أنت مالك فيك إيه .. مش طبيعي كده بقالك كام يوم .
فرك إياك أعينه و أردف .
_ولا حاجه .. منمتش بقالي فتره و مش عارف أنام .
ضحك حمزه و أردف .
_تعالي أديلك روسيه تنيمك مكانك أسبوع .
ضحك إياد و أبتعد عنه قليلًا و تحدث .
_لا يا عم أبعد عني أنا مش ناقصك .
ْ
__________________________________________
ْ
_أعريس أعريس أعريس .
_أدهم بملل : أسكتوا بقا صدعتوتي .
_أنس بضحك : ههههه يا عم فيه إيه بنغنيلك عشان فرحك الله .
_أدهم : ما المشكله أنكم مش حافظين زفت .
_سيف : الصراحه الواد عنده حق .
_رماح بضحك : خلاص أحنا نغني فُلكلور .
_أدهم : ولا كلمه أخرسوا .
_سيف : طب أحنا هنفضل قاعدين كده .. ما تقوم يا عم حضّر حالك .
_أدهم بغضب : أحضر حالي إزاي يعني .. هقوم البس البدله الساعه ١٠ الصبح .
نظر رماح في هاتفه و وجد الكثير و الكثير من
المكالمات الفائته من والدته و أبيه و حنين خطيبته و أروي .. فنظر لأنس و أردف .
_أستر يا رب العيله كلها متصله فوق ال١٠٠ مره .
صمت قليلًا و بعدها أردف بتساؤل .
_هو النهارده يوم كام في الشهر!
_أدهم بعدم إكتراس : مش عارف .
_ضحك سيف و أردف : النهارده ٢٤ .
أتسعت حدقتي رماح و توقف من مكانه سريعًا و أردف .
_٢٤ ده لحق يجي بسرعه كده ليه .. يادي النيله السوده ههههه .
_سيف بعدم فهم : بتضحك علي إيه يا أهبل .
_أنس بتساؤل : هو النهارده إيه!؟
_رماح بضحك : النهارده فرحي يا جدعان .
_أنس بضحك : أديلوو .. عايز كله يبقي تمام .
صفعه رماح علي وجهه و أردف .
_أنا مش بغني هههه النهارده فرحي بجد .
_تشنجت ملامح سيف و أردف : أنت كنت ناسي فرحك!
_أدهم : لأ ده فاكر فرحي و ناسي فرحه .
_رماح : ششش أسكتوا حنين بتتصل .
صمت الجميع .. فقام بفتح الهاتف و أردف .
_أزيك يا عروسه عامله ايه .
_حنين بغضب : أنت فين يا رماح .
_رماح بكذب : اااا .. أحم .. أنا أنا علي الدائري .
_أنس بضحك : ويييينننننن .
_حنين : إيه الصوت ده!
_رماح بضحك : ده صوت عربيه .
_أدهم بصوت خافت : ما تلاقي أمك هي اللي جيبهالك .
_ضحك سيف عليهم بشده و أردف : أفتح الطريق يا أحول .
_حنين : إيه ده .. هي دي خناقه ولا إيه .
_رماح بضحك : أيوه .
_أنس بضحك مرةً أخري : وييينننن .
_حنين : هي إيه العربيه البايظه دي .
_رماح بضحك : معلش عربيه عندها إلتهاب رئوي هههه .
_ضحكت حنين و أردفت : طب أنت هتوصل أمتى .
_أنس : ههه ويييننننن .
ضحك رماح بشده علي أنس و أردف .
_ههه جاي في الطريق أهو هههه مسافة السكه هعالج أنس.... اااا قصدي هعالج العربيه و البس و آجي... ااا أقفلي أقفلي أنا جاي .
_حنين : ماشي سلام .
_رماح : سلام .
أغلق الخط و قام بإلقاء الهاتف علي أنس و ذهب تجاهه ممسكًا إياه من عنقه مردفًا بضحك .
_ويييننن إيه يا أنس هههه إيه اللي عملته ده هههه .
دفعه أنس و أردف .
_ده جزاتي عشان بنقظلك الموقف .
_دفعه رماح بضحك و أردف : بتنقظني!
نظر إلي سيف و أردف .
_بزمتك ده شكل واحد بقا أب دلوقتي .
_سيف بضحك : هههه أسكت أنت خالص .. "نظر إلي أدهم و أردف بضحك" .. بيقُلها أنا علي الدائري هغير هدومي و أجيلك هههه .
ضحك أدهم و أردف .
_ههه فاشل في الغنى و كمان فاشل في الكدب .
__________________________________________
بعد مرور شهر من زواج رماح و أدهم .
ْ
*(ثانية واحده يا رحمه🤌🏻 أنتِ إيه عندك عقده من الأفراح ولا إيه ، كل ما ييجي فرح و نقول هنفرح مبتجيبيش تفاصيل ليه إيه البواخه دي🙂.                  أستنوا أنا هقولكم😂مش عقده ولا حاجه والله أنا بتخطي الحته دي عشات في أحداث كتير عايزه أكتبها فَ مش لازم أدخل في تفاصيل الفرح عشان مش هتستفيدوا حاجه😂😂أهدوا كده عليا و أنا هبهركم😂🤌🏻)*
ْ
أستيقظ راجح من نومه و قام بتأدية تمارينه الرياضيه و بعدها دلف إلي المرحاض ليأخذ حمام ساخن و يبدل ملابسه .. و بعدما أنتهي هبط من غرفته باحثًا عن تلا فوجدها تجلس في غرفة المعيشه بجوار دهب يتحدثان في أشياء غير مهمه بالمره .. فذهب تجاهها و أردف .
_راجح : تلا .
نظرت له تلا و أردفت .
_نعم .
_راجح : أنا أتصلت بأنس بس تليفونه مقفول ممكن....
_تلا بمقاطعه و ضحك : ممكن تروحي تيجيبيلي تيَّم عشان عايز أشوفه قبل ما أروح الشغل .
_ضحك راجح و أردف : إيه ده أنتي حفظتي بقا .
_تلا بضحك : عيب عليك .. راجح أنت مش شايف أنك بتقعد ما تيَّم أكتر ما بتتنفس .. حرام عليك يا راجح ده أنا بحس إن أروي مشافتش الواد قدك .
_أبتسم راجح و أردف : مش عايزه تروحي تجيبيه ... "صمت قليلًا و بعدها أردف" .. يرضيكي يعني أروح أنا و أجيبه من أروي .. أفرضي أنس مش هناك ميصحش يا تلا .. يلا قومي زي الشاطره و هاتيه و تعالي .
أبتسمت تلا و أردفت .
_ماشي يا راجح ... بس عد الجمايل .
_راجح : عدتهم يلا بقا .
توقفت تلا من مكانها و ذهبت خارج الفيلا و من الخارج أتجهت نحو الحديقه الخلفيه و هي في طريقها إلي فيلا أنس .. وجدت أنس يخرج منها و هو يحمل تيَّم فضحكت و أردفت .
_خد تعالي هنا رايح فين بالواد .
_أبتسم أنس و أردف : هوديه لراجح .
_ضحكت تلا و أردفت : هووف الحمدلله أفتكرتك هتروح بيه حته .. ده كان راجح ولع فيا لو رجعتله من غيره .
_أنس : إيه ده حقيقي .. ده أنا أخد تيَّم و أهرب بيه بقا .
_تلا بعدم فهم : ليه!
_أنس بضحك : عشان أنتي تستاهلي الحرق ههههه .
فتحت تلا فمها بصدمه و كادت أن تتحدث ولكن أوقفها صوت من خلفها .
_تستاهل الحرق! يابن الجزمه يا أنس ده أنا هولع فيك .
نظرت تلا خلفها و أردفت .
_شوفت يا راجح .
_راجح : ده أنا شوفت و سمعت .
ضحك أنس بهدوء و أردف .
_علفكره أنا كنت بهزر معاها .
و ذهب ليعطي تيَّم لراجح .. فحمله راجح عنه و أمسك أنس من تلابيب ملابسه و أردف .
_بتهزر معاها و عايز تحرقها .. أمال لو بتكرها كنت عملت إيه .
_تلا بضحك : خلاص يا راجح سيبه و أنا عن نفسي مش مسامحه في حقي ههههه ... "صمتت قليلًا و بعدها أردفت" .. أروي صحيت .
أبتعد أنس عن راجح و أومأ لها ... فأبتسمت تلا و أردفت .
_تمام .. هروح أنا بقا أوزها عليك عشان تلحق تفضي الفريزر ... و أبقى هات معاك أكياس .
_أنس : ليه!
_تلا بضحك : الله ... إيه اللي ليه .. أمال أنت هتتحط في إيه لما أروي تقطعك حتت .
و تركته و دلفت إلي الفيلا .. فأبتلع أنس ريقه و أردف .
_مراتك عايزه أروي تقطعني و تحطني في أكياس .
_راجح ببرود و هو يلاعب تيَّم : طب ما أنت كنت عايزني أولع فيها و قولت أنها تستاهل الحرق .
ْ
__________________________________________
ْ
_هاجر بملل : حمزه عشان خاطر بقا يا حمزه .
_حمزه : لأ يا هاجر .
_ضحكت هاجر و أردفت : ليه بقا إن شاء الله .
_حمزه بملل : عشان أنتي متعرفيهوش ولا هو متعود إنه يشوفك .
_هاجر : بس أروي بتروح عنده عادي .. أشمعنا أنا بقا .
_حمزه : خلاص روحي .. خليه يفطر بيكي .
_أبتلعت هاجر ريقها و أردفت : هو ممكن ياكلني .
_تؤ مش ممكن .. ده أكيد هياكلك .
_هاجر : بس.....
_حمزه بغضب : خلاص يا هاجر روحي ليه .. بس لو حصلك حاجه أنا مش مسؤل تمام .
_هاجر بدموع : متزعقليش .
نظر لها حمزه فوجدها علي وشك البكاء فأردف بهدوء .
_خلاص متعيطيش .. "صمت قليلًا و بعدها أردف" .. تعالي .
_مسحت هاجر حدقتيها و أردفت : أجي فين .
توقف حمزه من مكانه و أردف .
_تعالي هوديكي عنده .
توقفت هاجر من مكانها سريعًا بسعاده و أردفت .
_بجد .
ضحك حمزه و أردف .
_أه بجد .
و قام بإمساك يدها إلي أن خرجوا من الفيلا  ... و ذهبوا سويًا إلي خلف فيلا أنس و تحديدًا بمكان ما يوجد به قفص كبير حديدي و بداخله "لبلاك" النمر الأسود الخاص بأنس و ما أن رأته هاجر حتي أبتلعت ريقها و أردفت .
_الله حلو .. تعالي نمشي بقا .
_ضحك حمزه و أردف : لأ أبدًا لازم الأول ندخل نصبح عليه .
_ن...إيه!!! ندخل .. أنا مش داخله .
_رفع حمزه أحد حاجبيه و أردف : ليه! أنتي مش كنت هتعيطي عشان تيجي .
_أبتسمت هاجر ببلاهه و أردفت : كنت بس دلوقتي مش عايزه .
نفخ حمزه و أردف .
_هتقُليلي تاني وديني عند لبلاك .
هزت هاجر رأسها بِـ لا .. فأبتسم و أردف .
_ماشي يلا .
أومأ لها و عادوا سريعًا و كادا أن يدلفوا إلي الفيلا الخاصه بهم ولكن أوقفتهم تلا و هي تردف .
_هاجر .
نظر لها كلًا من هاجر و حمزه .. فأردفت هاجر .
_نعم .
_تلا بهدوء : ااا .. كنت عايزاكي أنا و أروي .
أومأت لها هاجر و نظرت إلي حمزه فأبتسم لها و أردف .
_روحي .. أنا كده كده كنت رايح لراجح .
أومأت له هاجر و ذهبت تجاه تلا .. و دلفتا إلي الدخل عند أروي .
__________________________________________
ْ
كان أنس في طريقه إلي منزل سيف ولكن أوقفه صوت هاتفه الذي لم يكف عن الإتصال .. أوقف السيارة و نظر إلي هاتفه .. فوجد أن المتصل مجهول .. ففتح الخط و أردف .
ْ
_أنس : الو .
_الو .. أزيك يا أنوس .
تشنجت ملامح أنس و أردف .
_أنوس! .. مين معايا .
_مش مهم تعرف مين معاك .. بس أهم حاجه إن .......
أتسعت حدقتي أنس مما سقط علي مسامعه و أردف سريعًا .
_أنس بغضب : إيه .... أزاي ... رأفت .. طب ليه ... مين أنت... أزاي يعني مش مهم أعرف ... آجي فين! ... أنت مين يا**** .
أغلق ذاك الشخص الهاتف في وجهه .. فنظر أنس للهاتف و عاود الإتصال به ولكن لم يجيبه ذاك الشخص مرة أخري .. نفخ بغضب و ألقي هاتفه بجواره و أدار سيارته و ذهب إلي سيف .
لم يأخذ الطريق وقت طويل حتي وصل إلى منزل سيف .. هبط من سيارته و ذهب تجاه منزله و طرق الباب .. دقائق وفتح له سيف ...فدفعه أنس و دلف إلى الداخل و القي بحالة علي الأريكه التي بجوار التلفاز .. نظر له سيف بعدم فهم .. و أغلق الباب و ذهب تجاهه مردفًا .
ْ
_فيه إيه يا أنس .
نفخ أنس و أغمض عيناه و أردف .
_مفيش .
_سيف : مفيش! مفيش إزاي يعني؟
_أنس : مخنوق شويه .
ضحك سيف و أردف .
_شكلها أروي منكده عليك .
_حاول أنس أن يبتسم و أردف : حاجه زي كده ... "صمت قليلًا و أردف" .. رماح فين؟
_سيف : جاي في الطريق .
هز له أنس رأسه و صمت .. أما سيف فظل يرمقه بريبه و هو يجزم بأن أنس ليس علي طبيعته .. صمت قليلًا و بعدها تحدث .
_سيف : هي أروي نكدت عليك أوي كده .
ضحك أنس و نظر له و أردف .
_لأ .. أروي معملتش حاجه .. تقدر تقول إن تيَّم كان بيعيط طول الليل و أنا مصدع مش أكتر .
ْ
__________________________________________
ْ
_ماشي يا أروي بس فكرك حمزه هيوافق .
كانت تلك هاجر التي كانت تقف بجوار أروي بالمطبخ و معهما تلا .
_تلا : مش عارفه .. و كمان راجح مش هيوافق .
_أروي بضجر : ليه بقا .
_تلا : مش عارفه .. بس فكرة أننا نخرج لوحدنا و كمان مشي و في الوقت ده مش هينفع خالص .. و كمان فيه حاجه مضايقه راجح أوي و موتراه .
_هاجر : و حمزه كمان .. "صمتت قليلًا و بعدها أردفت بقلق" .. أنا حاسه إنه مخبي حاجه عني .
نظرت لتلا و أردفت .
_تلا ممكن تسألي راجح .
_تلا : أسأله أقُله إيه .
_أعتدلت هاجر و نظرت إلي تلا و أردفت : بصي هو أنتي مش هتسأليه سؤآل مباشر يعني .
_أروي بمقاطعة : هاجر متحاوليش لأن حمزه و راجح سرهم مع بعض و إستحاله حد فيهم يخرج حاجه بره .
_تلا : سر إيه بالظبط .. أنا مش فاهمه حاجه .
_أروي : يابنتي ده المفروض أنتي أكتر واحده تبقي عارفه .. و بعدين أنا مش بتكلم عن حاجه معينه أنا بتكلم عمتًا .
صمتت قليلًا و بعدها أردفت .
_بصي يا تلا .. إيه رأيك في علاقة راجح و حمزه .
_تلا : من أنهي منظور بالظبط .
_أروي : علاقتهم ببعض و قربهم لبعض يا بنتي .. يعني تفتكري ممكن راجح يعرف إن حمزه محتاجله و ميساعدوش .
_تلا : إطلاقًا ... طب أقولكم علي حاجه .
أومأوا لها .. فأردفت تلا بضحك .
_من قريب راجح كان رايح مأمورية .. فالمفروض يعني بيسيب وصيته معايا .. عايزه أقُلكم إنه متكلمش غير علي حمزه بس ... و فضل يوصيني عليه أوي و في الأخر راجح قالي كلمتين يتامي عشان يرضيني بيهم .
_نفخت هاجر و أردفت : يعني مش هيقُلك .
_تلا : مش هيقُلي وش يا هاجر ده يطلقني أسهل هههه .
_أروي بضحك : اللي يشوف حمزه و راجح و هما بيتخانقوا ميشوفهمش و هما مع بعض .. يعني قبل كده شوفتهم بيتخانقوا مع بعض و راح أنس يحجز بينهم ههه سابوا الخناق و مسكوا في أنس هههه .
_تلا بضحك : و إيه اللي حصل .
_أنس ساعتها طلّع مسدسه و فضل يزعق زي المجنون و راجح و حمزه فضلوا يهدوه ههههه ... ساعتها أنس كان بيقولهم هضربكم بالنار و أنتحر ههههه .
_ضحكت تلا و أردفت : جوزك ده مجنون ههه .. ده لسه من شويه بيقُلي إني أستاهل الحرق .
_هاجر بضحك : مش عارفه أقول إيه أنا لو مكانك كنت عيطت من الموقف ههه .
_أروي بضحك : راجح و حمزه حاجه و رماح أخويا و أنس و سيف حاجه تانيه .. تقدري تقولي عليهم هما التلاته مصيبه متنقله .
كادت أن تتحدث هاجر و تتسأل ولكن مانعها صوت هاتفها .. فأخذته و أردفت .
_دقيقه يا بنات هرد .
أومأوا لها .. ففتحت الخط و أردفت .
_الو .. أيوه .. إيه! .. "صمتت لبرهه فأردفت" .. متهزرش.. سلام .
أغلقت الخط و نظرت أمامها و هي تفتح فاهها بعدم تصديق .
_أروي : إيه يا هاجر ... حمزه طلع بيخونك .
لم تتحدث هاجر فأردفت تلا بضحك .
_طب طلقك .
لم تتحدث مرة أخري فأردفت تلا بصراخ .
_هاجــــــــــر .
نظرت لها هاجر و أردفت .
_هاه .
_تلا بضحك : هاه إيه .. فيه إيه مالك مسهمه كده ليه .
_هاجر بصدمه : أنا حامل .
_أروي بضحك و سعاده : لولولولي مرات تيَّم جايه في الطريق هههه .
أحتضنتها تلا و أردفت .
_الف مبروك يا قلبي ربنا يتمملك .
_هاجر بصدمه : أنا حامل ... أنا هشيل مسؤلية بيبي هههه .
_أروي بضحك : دي عبيطه دي ولا إيه .
_تلا : و أنا أقول مالها شاكه في حمزه و عماله تقول إنه مخبي عليها حاجه .. أتاريها هرمونات هههه .
_ضحك أروي بشده : صح ههه .
_تلا : طب هو مين اللي كلمك .
_هاجر بضحك : ده حمزه هههه بيرن عليا و بيقُلي مبروك راجح حامل و هنبقا ماما و بابا هههه .
_تلا بصدمه : ثانية واحده .. أنا معنديش مشكله إنه يقول علي راجح حامل .. هو .. هو حمزه بيهزر زينا عادي كده .
_أروي بإبتسامة : حمزه جيه اللي يغيره .
صمتت قليلًا و نظرت إلي هاجر و أردفت بضحك .
_و هاجر جيه اللي يربيها ههههه .
_تلا بإبتسامة : أنتم قمرات أوي .. علفكره يا أروي أنتي كمان غيرتي أنس .. أنس مكنش بيهزر أو بيضحك زمان أسأليني أنا .
_أروي : كان بايخ!
_تلا بضحك : جــــــــــــــدًا هههه .
ْ
__________________________________________
ْ
مرّ أكثر من يومين و أنس مثلما هو يفكر فقط في تلك المكالمة الغربية و في ذاك المتصل و كان أيضًا يفكر في راجح بغضب كيف له أن يعلم كل تلك المعلومات و يخفيها عنه .. لماذا فعل هذا ... حاول قدر الإمكان التماسك و أن لا يظهر أي شيء أمام أصدقائه ، و راجح تحديدًا .. هو قد ترك للأيام أن تمر كما هي بكل طبيعيه ولكن لاحظ تغيره هذا كل من رماح و سيف اللذان ظلّوا يلحوا عليه مرارًا و تكرارًا أن يخبرهم بما يفكر فيه ولكنه أبي و عزم علي الإلتقاء بذاك المجهول في هذا اليوم بعد إتفاقهما علي المكان و الزمان ... ذهب أنس أولًا ليجلس مع رماح و سيف قليلًا قبل ذهابه ولكن ظل سيف و رماح يرْمقاه بحذر .
ْ
_رماح : أنت كويس يابني .
_نظر لهم أنس و أعتدل في جلسته و أردف : أنا عايز أقولكم علي حاجه .
_سيف : قول .
نظر لهم أنس قليلًا و بعدها تحدث بعد تفكير .
_خلاص .. خلاص فككم .
أمسكه رماح من عنقه و أردف .
_لأ ما أنت متعشمنيش و تخلي بيا .
_تشنجت ملامح سيف و أردف : ي.. إيه! يعشمك!
دفع أنس يد رماح عنه و أردف .
_خلاص هقول .. بصوا هو فيه واحد كلمني من يومين و قالي إن رأفت......
_رماح : أبوك!
_أنس بحنق : يعني يا رماح هو فيه حد أعرفه اسمه رأفت غير أبويا .
رامق سيف رماح بغضب و أردف .
_تعرف تسكت ..."أعتدل في جلسته بإنصات و أردف" .. قول يا أنس قالك رأفت ماله .
_أنس : قالي رأفت ...........
أتسعت حدقتيهم و توقف سيف من مكانه و أردف .
_ ...........

يـــــــــتبــــــــــــع ❁......
❁رحـٍٓـٍٓـٍٓـٍٓـٍٓـٍٓـٍٓـٍٓـٍٓمٍٓـٍٓـٍٓـٍٓـٍٓـٍٓـٍٓـٍٓه أحـٍٓـٍٓـٍٓـٍٓـٍٓـٍٓـٍٓـٍٓـٍٓمٍٓـٍٓـٍٓـٍٓـٍٓـٍٓـٍٓد ❁...