الجوزاء والفيصل

الجوزاء والفيصل ٥

#الجوزاء_و_الفيصل
#روز_الفياض
#ح٥
.
.
.
الحزن هو أن لا تجد أحداً لتخبره عن حزنك 💔..
.
.
.

خفت اكتبلها اسمي بصراحة اخاف احد يشوف حسابها وتصيرلها مشكلة فجاوبتها :
جاي اراسلج من السويد حتى اشكرج عالرواية ..

مينا :
اي رواية ؟؟

فيصل :
الهدية ..

مينا :
اي هدية ؟
واي رواية ؟
واي سويد ؟
منو حضرتك ؟
ومنين تعرف اسمي ؟؟

كلت لا هاي شكلها دايخه اكثر مني ومامتوقعة اراسلها حقها فقررت احجي وياها بصراحة واكللها انه منو :
انه فيصل ، اخو ابو رعد ، اجيتكم وسديتي الباب بوجهي هههه بعدين هديتيلي رواية .
حبيت اشكرج عليها لان خوش رواية قريتها كذا مره ..

مينا :
منو انت ؟
وشتريد ؟؟
منو فيصل ؟ هذا يافيصل ؟؟؟
ومنين عرفت اسمي ؟؟
كافي عيب عليك تره شوية استحي شنو هالتصرفات اعرفك تعرفني !!!
شهاللزكة ؟؟ شنو ماعندك كرامة ؟
ماعندك احساس ..

ماكدرت اكمل قرءاة الحجي الكاتبته كبل حضرتها ..
هاي شبيها ؟!!!
شكتلها ؟!!
وشنو هالاسلوب عبالك جنت افتر وراها من شارع لشارع !!!

زين تسوي بيك ..
مجلب الا مثل بت عزام ..
هاي بت عزام هزأتك وهانتك واتجاوزت عليك ..
شنو يعني ضحكت وياك عبالك حبتك ؟؟
لو لان اطتك كتاب عبالك صدك انعجبت بيك ؟؟؟
حيل وياك ..
حيل ..
حتى اتوب وترجع مثلما جنت ..
ابتعد عن موضوع الزواج الف متر ..
دير بالك تتقشمر ...
انه على تالي عمري تجي وحده تحجي وياي هيج ؟!!!!
وسفه ...

بقيت ( ٣ ) ايام مكتئب ومقهور حيل ..
لدرجة مارحت لبيت علي ولا شفتهم ولا طلعت لاي مكان غير الشغل ..

قررت انسى حتى اسمها ..

وره ايام اجاني علي :
ميت عدل ؟

فيصل :
لا عدل الحمدلله .

علي :
جا شبيك ماتمر علينه ؟
زعلان ؟

فيصل :
ليش زعلان ؟
شصاير ؟

علي :
ماادري ..
ماصاير شي على حد علمي ..
انت كول اذا صاير شي .. خاف انه ماسامع .

فيصل :
لا الحمدلله كل شي ماصاير .

علي :
جا شمالك ماتجي ؟؟

فيصل :
مالي خلك والله ..

علي :
اي هنا الحجي ..
ليش مالك خلك بالله ؟

فيصل :
هيج بدون سبب ..
ملل ..

علي :
متأكد ؟

فيصل :
جا شتريد اكلك ؟

علي :
دكوم ..
امشي وياي ..

فيصل :
وين ؟

علي :
نبأ مسوية كبة حامض وكالتلي لاتجي الا هو وياك يجي يتعشى ..