الجوزاء والفيصل

الجوزاء والفيصل ٦

#الجوزاء_و_الفيصل
#روز_الفياض
#ح٦
.
.
.
أحياناً من نحبهم لايبادلونا المشاعر نفسها.
.
.
.
فيصل :
هاا ؟؟
شكو ؟
ياهو مات ؟

رعد :
محد مات ..
بس انه تاليها اموت روحي واخلص .

فيصل :
خير ولك احجي ؟

رعد :
عمي ..
لو تجي ..
لو تشوفولي حل ويه اخوكم ..
لو اشرد من البيت كله ..

فيصل :
شني هالحجي ؟
شبي ابوك ؟
هههه شني تشرد من البيت هههههه شمالك ولك اتسودنت ؟

ضحك ..

رعد :
هههههه .. والله عمي موتني ..
راح يسودني صدك ..

فيصل :
ادري شبي ؟

رعد :
انه صارلي ( ٨ ) شهور من خطبت ومااكدر اطلع ويه البنيه الا اعقد عليها وهو لهسه مايقبل اعقد بحجة ابن عمه ميت ..
ادري يعني ابن عمه مات انه شنو ذنبي ؟؟

فيصل :
ادري قابل ابن عمه بحده ؟
مو ابن عمنه هم ؟
هو الميت نفسه بته عرست مو قبل اسبوعين ؟

رعد :
اي .. هسه بته عرست وانه لازم اتاني السنة تدور تره هاي ماطلعت ..

فيصل :
جا شني بعد طلابه ..

رعد :
لاااا ..
يكول بته بنيه وخذوها بدون عرس بس زفه ومخطوبة وعاقده قبل لايموت ابوها .

فيصل :
اي وانت هم تريد تعقد قابل راح تسوي حفله بالعقد ؟

رعد :
عمي مايقبللل ..
مايقتنع ..
خبلني والله خبلني ..
واهلها كلما يشوفوني يكلولي طولتها ، المفروض هسه انتم متزوجين وانت لهسه ماعاقد ..

فيصل :
اي حقهم ..
حقهم ..
ابوك هذا بلوه مثل بلوة عمتك ايمان ..
لاحول ولاقوة الا بالله ..
انه شمسوي عدك ربي وبليتني بهيج اخوان حقنه ..
ميخالف عمي ميخالف ..
هسه اخلي عمك وعماتك يحجون وياه .

رعد :
يكلي افسخ الخطوبة ولاتعقد لو تعرس ..
واهلها كلولي هذا الشهر اذا ماعقدت والشهر الوراه تتزوج معناها نطيك فليساتك المهر والذهب والله وياك ..
يعني انه شكللهم ؟؟
والله من كتلهم علمود ابن عم ابوي ظلوا متعجبين شنو ابن عم ابوك متوفي وشدخل بتنه بالموضوع ؟
شدخل العقد ؟
شجاوبهم ؟؟؟
انت كلي شجاوبهم ؟

فيصل :
عمي انه لو من اهلها والله وبالله اطيك المهر العاوي مالك واكلك روح الله وياك مادام هذا ابوك ..
ادري شالقصه ؟؟؟
هههههه والله بلوه هاي !!!

رعد :
والله ماادري ياعمي كلش تعبني اخوك وفشلني كدام الناس..

فيصل :
شرايك اتبناكم انت وقصيوا ههههههه انتم الاثنين مضطهدين ههههه ..
والله ماادري ياهو المظلوم انتم لو انه الابتليت بيكم ويكلك ليش ماتعرس ههههه ادري العروس شتفتهم مني اذا ( ٢٤ ) مكابلكم احل بمشاكلكم ههههههههههه .