الجوزاء والفيصل

الجوزاء والفيصل ٤٤

#الجوزاء_و_الفيصل
#روز_الفياض
#ح٤٤
.
.
.
يفـوق الحبّ ألف مرّه شعور الإكتفاء
‏أنا ممتلئ بك
‏ولا أخلو منك أبداً
‏ولا لِلحظه .
.
.
.
حولت فلوس راويه وكتلها :
اليوم حولتلج كل فليساتج .
بعد مالج شي عدي ..
كل حلالج رجعلج .

راويه :
ليش ؟

فيصل :
شنو هو الليش ؟
حلالج اول وتالي يرجلعج

راويه :
ادري اول وتالي بس ليش ؟
شنو الي صار ؟
حولت كل شي باسمك حتى محد من عمامي يتدخل واثق بيك وبكل الحالات مااكدر ادير الشغل هذا كله ولا اعرفله .. ليش رجعته ؟

فيصل :
خاف باجر عمامج يكولون باك حلالها ..

سكتت لثواني ومن سكوتها عرفت كايليلها هالحجايه ..

راويه :
خيكولون ..
يعني قابل مااعرفك ..
انت لو تريد حاشاك يعني لو تريد تاخذ شي مني جان ماكتبت على نفسك كمبيالات ..

فيصل :
على طاري الكمبيالات رجعيلياهن لان بعد انتفت الحاجه الهن خاف بعدين تجيج الطنكوره التجي للنسوان وره مايعرس الرجال تذبيني بالسجن هههههه .

راويه :
ماعندي ..

فهيت بوجهها :
شنو ماعندج ؟

راويه :
الكمبيالات مو عندي ..

فكيت حلكي :
جا عدمن ؟؟؟
بس لاضاعن منج ؟؟

هزت راسها لا ..

فيصل :
خذتهن مرت ابوج ؟؟

راويه :
لا

فيصل :
ولج احجي وين وديتيهن ؟؟

راويه :
شككتهن ..

فيصل :
هاا ؟

راويه :
شككتهن ..
وره ماانطيتنياهن شككتهن ..

ظليت صافن بوجهها ..
فيصل :
ينعل ( يلعن ) ابليسج ..
نشفتي دمي ..

ضحكت على كيف ..
حضنتها وبست كصتها :
هذا تصرفج غلط ..

راويه :
عندي ثقه بيك ..
مايحتاج كمبيالات ووصولات .. احنه زوج زوجه اذا نبقى نتعامل بهالطريق راح نخسر نفسنه ونصير مجرد اثنين متزوجين من بعض لمصلحه ..

فيصل :
حجيج صحيح بس انه بنفسي جاي اكلج بالفلوس لاتثقين بأحد حتى انه ..
حلالج اذا بأسمي ويصيرلي شي راح يروح للورثه ..
شيبقالج منه واذا اضمنهم فما اضمنهم كلهم ابن ادم طماع ويحلل لروحه الحرام من توصل للفلوس .

راويه :
اسم الله عليك ..
اذا يصيرلك شي فلوس الدنيا ماتعوضك عندي ..

فيصل :
سمعي مني ..
هذا الموضوع مابي مشاعر ابن عمج مو راد يموتني علمود الفلوس ؟
لاتأمنين بأحد ولاتكولين رجعت كل شي باسمج خلي كل شي مثلما هو كدامهم .

راويه :
اوكي ..

وديت مسج لابو مرتضى :
ابو مرتضى شكد تكدر تطيني ؟