الجوزاء والفيصل

الجوزاء والفيصل ٧

#الجوزاء_و_الفيصل
#روز_الفياض
#ح٧
.
.
.
حاشاه أن يُحيي فيك أملاً ثم يقتله 🌼🌼🌼
.
.
.
شوفة مينا بالحالة الي هي بيها اذتني ..
انقهرت عليها ..
بقيت الليل كله سهران .
ظليت افكر ...
هاي شلون راح يكلولها رجلها مات ؟؟
موقف صعب ..
الله يساعدها ، ويساعد اهلها ..

ثاني يوم ام رعد فتحت موضوعها عالغدا فكتلها :
الظاهر الولد جان خوش ولد فطكوها عين ..

ام رعد :
اي امها تكول خوش ولد وخوش عايلة وبس هو وامه لا اخو عده ولا اخت ..
بس عليمن يطكونها عين لاغني ولا يخبل هي احلى منه ..

فيصل :
اكيد يعني هي احلى منه ..

ام رعد :
لا هاي مو عين ..

فيصل :
قضاء وقدر يعني ؟..

ام رعد :
لا ...

سكتت شوية بعدين كالت على كيف :
هذا واحد نفسه بيها ..

باوعتلها :
واحد نفسه بيها ؟؟
شنو هاي ؟؟

حجايتها استفزتني ..

ام رعد :
اي واحد عينه عليها ..
احنه نكول نفسه بيها ..
لذلك ماتتوفق حتى لو اتزوجت عشر مرات ولاترتاح ..

فيصل :
منو هذا العينه بيها مدري نفسه بيها ؟؟

حسيت الحجايه ضايقتني ..
جني غرت عليها !!!
معقولة ؟
توه مات رجلها فيصل على كيفك ويه روحك ..
سكتت وعفتهم يحجون ..

آيات :
خطيه بعدها زغيره ..

ام رعد :
اي والله امها تكسر الخاطر .
بعدها جاهل وترملت وهذا الجاهل كاسر ظهرها ..

آيات :
اي ..
بعد ماتكدر تتزوج ..

قصي :
ليش ؟

ام رعد :
جا خاله ياهو يتزوجها وهي عدها ولد محد يقبل يربي ابن الغريب ..
الا اذا واحد متزوج وعده درزن جهال ..

قصي :
اذا يحبها يتزوجها حتى لو عدها ولد ، بعدين ليش مايربي ابنها مو ابنها هو يعني المفروض يصير ابنه مو ابن الغريب ..

ام رعد :
ماكو هنا هذا الحجي ، منطقتنه شعبية التترمل يجيها واحد شايب لو ميته مرته لو مطلكها وعده عشيرة جهال يريدها تربيهم ويشرط عليها ماتجيب ابنها وياها ..

آيات :
والله حرام ..
انه ضد زواج المره بعدما يموت رجلها ..
تكعد على جهالها تربيهم المن متزوجه بعد ..

قصي :
يعني رجلها مات هي هم تموت روحها ؟

آيات :
اي ..
اذا مات الرجال خلص بعد عيب عليها تتزوج ..
تكعد تربي جهالها المره عيب يومية رجل ماتستحي ..

باوعت لقصي كتله :
خالي ..
كمل غداك وعوف هذا الحجي انت بعدك مامحصل وظيفة وحتى لو حصلت اياك تفكر بيوم من الايام تحب وحده مطلكة لو ارملة ، زين .