علاقات مشبوهة

علاقات مشبوهة 1

#علاقات_مشبوهة
#بقلمي  : #مشاعر_مبعثره
الجزء الأول
الفصل الأول  (سعاده لحظيه)
الحلقه (1)
انا سمر الفاتح الليله كملت 21 سنه وبكرا تخريجي واخيرا انتهت سنوات الدراسه والدفاتر والاقلام والمحاضرات بس حأفقد لمة الاصحاب والجامعه حتى الدكاتره حافقدم انا حاليا ماشه على الديزاينر عشان أعمل بروفه بالفستان بس أكيد ماحأصورو لانو حايكون مفاجأة الحفله يلا باي
ممكن شويه؟
اوك
طبعا كنت بعمل بث كالعاده لمتابعيني في الفيسبوك والتيك توك اليوم داك ملحت لانو ما عندي حق المواصلات العربيه كانت مبالغه وفاضيه انا ركبت ورا وماخده راحتي في البث على اساس حقت ابوي لحدي ما بتاع العربيه ركب الولد الغليظ الاتكلم معاي قبل شويه دا وهو بدل يركب قدام مع بتاع العربيه جاء لصق فيني ورا وظهر في بثي كمان
تلفوني دقا غطيت خشمي بالطرحه وقعدت اتكلم براحه
جايه يا علياء ما تتصلي تاني  : ما تجي انا ما جبت لك الفستان ارجعي له  : انتي بالجد فظيعه يا علياء يعني اسي اصفق لك؟ ما كفايه اني مشيت لكم السوق وجبت الخبائز والحلاوة؟ كمان ابسط حاجه اكلفك بها ما تعمليها انا من الصباح رسلتك عشان ماشه الجامعه تجي اسي تقولي لي ما جبتو  : انا ما عاوزه اصدمك بس للترزي وشوفي بقول لك شنو  : خلاص انا في المواصلات كلمة ترزي دي ما تقوليها ما عاوزه فضايح انا قربت للبيت بعد اصل نتفاهم الولد القاعد جنبي بقى يضحك حمرت له وقفلت من علياء كنت عاوزه اموت من الغيظ بعد خلاص قربت من البيت لازم أرجع السوق تاني دا بدل مأمشي اتظبط واعمل عروكات لجسمي وشي لمن حمر من الشمس وعشان تكمل معاي الولد بقى يعمل لي حركات وعاوز يتحرش بي طوالي قمت فيه لم نفسك يا قليل ادب يا متحرش رد لي ببرود معاي انا انتي؟  : ما تعمل نفسك بريئ انا شايفاك من قبيل قوم يلا من جنبي  : اقوم؟  : ايوا يلا قوم ما عاوزاك جنبي بتاع العربيه كان ساكت بس فجاءة وقف قلت له اي احسن نزل التافه دا  قام صدمني وقال لي انزلي يا بنت قلعت عيوني وقلت له شنو قال لي انا حنيت عليك من وقفة الشمس وركبتك كمان عاوزه تقلي ادبك مع صاحب العربيه عاينت للولد وقلت له انت صاحب العربيه؟ ابتسم لي وقال للسواق كمل طريقك خلاص مافي داعي تنزلا  قلت له شكرا ما عاوزه معروف منك نزلت وركبت حافله من الشارع من الاول قلت للكمساري انسرقت وما عندي حق المواصلات وهو ماتعابط معاي رجعت السوق وبدت الشكله مع الترزي لقيتو مبوظ لي الفستان تماما وغلطان في المقاسات قعدت انبذ فيه وهو يرد لمن في النهايه قعدت ابكي قلت له انا من الصباح قاعده في الجامعه وبعدو مشيت الاستديو قبل ارجع اهلي رسلوني اجيب الخبائز والحلاوه وفي المواصلات في واحد ضايقني واسي طلعت لي انت خلاص خليتو التخريج دا زاتو  : خلاص خلاص انا اسف ما تبكي برجع لك قروشك  : واعمل بها شنو ماشه تجيب لي فستان جاهز؟ وبكرا التخريج
طبعا الزمن اتأخر وهو كان في ناس واقفه له واموره جايطه قام عمل شنو طلع كل الناس وقفل الدكان قال لي اختاري اي قماش من هنا وانا اسي بقصو لك بس قصه بسيطه عشان الزمن هدا غيرت جدولي كلو عشانك قربت اقول له لأنك السبب بس خفت يتراجع وانا ما عندي أمل غيرو قعدت اوصف له عملتو فستان أحمر ساده بودي بس خليتو يضيف لي قماش دانتيل رفيع من ورا درجه من الفستان وحصلت البيت مع اذان العشاء والحمدلله ابوي كان لسه ما جاء طبعا امي الفستان ما عجبا كالعاده قالت لي زحيو من وشي بكره تتبهدلي وتنفضحي في الميديا دا فستان تلبسيه يوم تخريجك؟  : شكرا  : ما شفتي الفستان الصممتو لعلياء اختك لتخريجا عمل ضجه كيف؟ لكن انتي عامله نفسك عنيده وما بتسمعي كلامي  : تصبحو على خير
علياء جاتني قالت لي ما تزعلي من امي  : انا لو تابعت الزعل منها كان انفجرت زمان  : الفستان حلو والله العظيم ما يهمك مش كفايه انو فيه لمستك الخاصه  : ابوي اتأخر الليله  : ايوا صح  : حأتصل به
اتصلت قال لي هدا انا داخل تعالي افتحي لي الباب مشيت لقيتو شايل حاجات كتيره الا رفعت معاه قلت له دا شنو دا كلو يأبوي  : دخليهم يلا وتعالي امي قالت له اخيرا جيت كان تبيت قبلك أحسن قال لها دي هدايا بنتي الحلوه كل سنه وانتي طيبه وكمان بكرا حاشوفك خريجه مشيت حضنتو وقلت له شكرا يأبوي ربنا يخليك لي
كان جايب لي حاجات كتيره وكمان تلفون جديد امي قالت له اسي في داعي لصرف القروش الكتير دا بكرا تجي ترقد لينا في البيت حاجه ما عندك وعاوز يدوك تاكل وتشرب  : امي دا كلام شنو البتقولي فيه دا : انتي ما تدخلي بيني وبين ابوك بس شغال تتصرف من راسك اسي ما كان تشاورني عندنا مية حاجه ناقصه بس كل القروش تخمها حاجات فارغه والتلفون لزومو شنو ما هدا تلفونا قاعد سمح  : كوثر انتي عارفه سمر من زمان نفسا في أيفون ذي صحباتا انتي زاتك غيرت لك تلفونك مرتين السنه دي  : انا حاجه وهي حاجه ما تلخبط : خلاص لو سمحتي خليني احتفل ببنتي واعبر عن فرحتي بالطريقه البتريحني مره واحده ما تدخلي انتي : خلاص كمل المعاك كلهم وادين لو عاوز عشان المره دي تدخل السجن في شيكات  : كوثر؟ ابوي انفعل لمن عروق رقبتو ظهرو وعيونو بقو حمر وانا غضبي ما كان أقل منو كنت ساكته الحوار دا كله بس لمن وصلت لهنا استفزتني شديد قلت لها دائما قاتله اي فرحه في البيت دا تشكي من وضعك وتنقي ذي الشفع ما عشانك حصل الحصل وبعدين زعلانه على الايفون؟ ما ياهو قاعده اعمل ذي ما بتقولي لي اخلي في الطبقه البرجوازيّة وصاحبيهم لازم تبقي زيهم حتى في إختيار اصحابي بتدخلي بس تاني ما حأسمح لك انا بقى عمري 21 سنه ومسؤوله عن نفسي مالك اي علاقه بقراراتي وحياتي  ابوي قال لي : سمر عيب ما تقولي كدا لأمك  : بنت قليلة ادب لازمك تربيه من جديد عاوزه تضربني ابوي قال لها لا يا كوثر وقال لعلياء وانتي سوقي اختك غرفتكم
انا كنت غضبانه من امي شديد وما قادره اهدأ علياء قالت لي سمر ما تتهوري انتي عارفه امي مافي داعي تجاريها في الكلام  : اخليها تقعد تزل ابوي في قدامنا وتعاقبو على ذنب ما ارتكبو عاوزه منو شنو؟ مش كفايه انو معتبرا واحده من بناتو ومدلعا اكتر مننا كمان  : سمر إنتي ليه ما قادره تفهمي انو امي ما اتعودت على الحرمان لسه ماتأقلمت على كدا عاشت حياة الرفاهيه من وهي طفله واتزوجت راجل من نفس طبقتا بس انتكس وهي ما متقبله  : والله هي ما صغيره نحن اتعودنا هي مالا
نمت اليوم داك زعلانه ابوي جاني بليل وفي يدو التورطه الاشتراها عشان عيد ميلادي صحاني وقال لي امك نامت يلا نحتفل بدون مقاطعه قلت له قعدت تعتزر لها وتحنسا لمن نامت صح؟  : خليك منها يلا نطفي الشموع مع بعض انا انبسطت شديد بجيتو والمفاجأة الحضرا لي صحيت الصباح بصوت تلفوني الماعاوز يهدأ والاشعارات خلتو يعلق عديل وانا ما فاهمه شي غلا صاحبتي اتصلت بي
دا شنو يا بنت معقوله انا صاحبتك اخر من يعلم  : بشنو  : محنكه امجد وطالع معاك في البث بتاع امبارح طيب مخبين الموضوع ليه : امجد منو  : كمان بتسألي؟ امجد النصري طبعا  : انتي بتجيبي الكلام الفارغ دا من وين ما بعرف اي زول اسمو امجد  : يا بنت ركزي امس في البث كان قاعد جنبك واتكلم معاك وانتي رديتي عايني صوركم معبيه الفيس افتحيه انا استغربت شديد فتحت الفيسبوك لقيت الناس بتعلق على الولد بتاع العربيه الامس ولمن عاملننا كابل سمر وأمجد وكلام كتير وبسألو فيني كمان لمن بحثت اسمو لقيتو عندو متابعين اكتر مني وبنشر صور واعلانات والناس بتتفاعل معاه طوالي اتصلت بغلا قلت لها امجد النصري دا انا ما بعرفو ابدا دا منو  : ملياردير يا بنت وبشارك صورو طوالي  : شفتهم يعني الناس متابعاه عشان ملياردير؟ طيب انجازاته شنو  : انتي انجازاتك شنو اسي ما هدا عندك متابعين وشاغله الميديا  : لالا انا ما تقارنيني به انا فاشونيستا  بدي نصائح للإهتمام بالبشره والشعر وطرق إختيار الملابس وتطقيما حسب الحسم والعمر والمكان...........  : عليك الله بطلي فلسفتك الفارغه دي جبتي فستانك من المرا ولا لسه؟  : اسمها ديزاينر  : ايا كان اسما هي خياطه : بعد تشوفي شغلا حاتخجلي على كلامك دا  : كان نفسي اخيط عندها بس ماما جابت لي الفستان جاهز من مصر  : المهم يكون لونو حلو ولايق عليك  : من الناحيه دي اطمني  : طيب خليني اجهز نفسي ورانا يوم طويل
ابوي اجل شغلو اليوم داك ووقف معاي خطوه بخطوه من الزفه لحدي التكريم وبكى من قلبو كنت مهتمه به هو اكتر من امي الهمها تطلع حلوه وتلفت الانظار كانت مبسوطه من كون الناس بسألوها انتي بالجد ام سمر ولا اختا الكبيره  وطبعا لسه معلقين في موضوع امجد دا وعاوزين يعرفو قصتنا
يا بنات بالجد مافي حاجه بيننا اتلاقينا بالصدفه بس  : كنتي راكبه معاه في عربيتو  : لا طبعا  : ياخي اما تنكري الناس كلها حافظه شكل عربيتو وانتي عامله بث منها وقاعده جنبو عاوزه تنكري كمان : انتو فاهمين غلط الحصل كلو صدفه  : فسري كيف
طبعا ما بقدر اقول لهم ملحت لانو مافي زول عندو فكره عن وضعنا الحالي وفاكرننا عايشين في عز وعندنا عربات وكدا
اللهم زغت منهم جاتني رساله في الواتساب
مبروك التخريج وانا برضو اتشوقت اشوف فستانك رسلت له انت منو  قال امجد قلعت عيوني ومشيت قعدت براي عشان ادردش براحتي رسلت له انت أمجد النصري؟  : ايوا  : بتعرفني؟  : اتعرفنا على بعض امس في عربيتي والناس افتكرونا بنحب بعض : حتى انا ازعجوني بالأخبار البايخه دي  : ولا يهمك  : انت لقيت رقمي وين  : انتي زوله مشهوره وعندك قروبات كتيره ما صعب علي القى رقمك ولقيت الدعوه بتاعة تخرجك كمان قلتي لكل المتابعين وانا بقيت من ضمنهم قعدت اتلفت وقلت له قصدك شنو قال لي انا جيت الحفله بس ما لحقت شفتك على المنصه قعدت ارجف وقلت له انت بتهظر صح ما تكون صدقت الاشاعه الروجوها الناس دي  : انا قاعد برا في العربيه تعالي اسلم عليك  : في العربيه؟ واجيك كمان انت واحد تافه ومتكبر  : تعالي ولا اخلي الناس كلها تعرف انك ملحتي وفصلتي فستانك عند الترزي قلعت عيوني وقلت له ترزي شنو انت غبي؟  : انا سمعت كلامك في العربيه يلا تعالي سريع
انا خفت يعمل لي فضيحه قمت طلعت برا بسرعه وقاعده اتلفت اتصل قال لي شفتك يلا تعالي العربيه البيضاء القدامك دا كان راكب ورا وماخد راحتو على الاخر ركبت قال لي مبروك التخرج  : عاوز شنو  : بالجد واو ما قادر اشيل عيوني منك  : انت جبتني هنا لشنو؟  : ولا شي  بس عشان ناخد سيلفي التخرج مع بعض يلا ابتسمي قبل اتكلم هو كان اخد الصوره قعدت  اشاكل فيه عشان يمسحا قال لي انزلي خلاص انا ماشي  :  انت عاوز تعمل شنو بالصوره دي ما تفكر تنشرا اهلي بقتلوني انا بعد تعب قدرت اكذب الاشاعه الامس  :  يقتلوك ليه الموضوع  ايزي
سمعت صوت امي بتنادي فيني طوالي نزلت بس هي شافتني قلت له امشي بسرعه يلا امي قعدت تعاين لي من فوق لتحت
يتبع