علاقات مشبوهة

علاقات مشبوهة 7

#علاقات_مشبوهة
#بقلمي  : #مشاعر_مبعثره
الجزء الأول
الفصل الثاني  (ذوات الدم البارد)
الحلقه (7)
انت دخلت هنا كيف بالجد انت مريض اطلع برا يلا بقيت ادفر فيه قال لي يا سمر اهدأي حبيبتي  : ما بهدأ اطلع برا غرفتي قعدت اصرخ وانا بدفر فيه وهو بقول لي يا بنت الناس اسمعيني بس انا بحبك الحصل زمان دا ما حايتكرر تاني ما حأطلب منك تجي معاي الشقه ولو مصره بتزوجك ذي ما عاوزه : لا ما عاوزه انا حاليا ما بحبك ولا عاوزاك في حياتي : قلت لك بتزوجك افهمي : بس انا ما عاوزه اتزوجك يلا برا قوم اطلع برا انت فاكر بيتنا مفتوح ذي بيت الانين تبعكم عشان تدخل له وقت ما عاوز اطلع برا قلت انت لسه قاعد؟ دفرتو بقوه وهو زعل شديد قام قفل الباب بالمفتاح قلت له انت بتعمل في شنو جيت عليه لزاني في السرير وقلع قميصو قلت له عاوز تعمل شنو : انا حاولت معاك بكل الطرق ما باقي غير دي  : عاوز تعمل شنو  : حاأخد حقي فيك انا مافي بنت اشتهيتا وما حصلت عليها قعدت اصرخ وانادي في امي امي قعدت تدق الباب
افتح يا أمجد ما تعمل في البنت كدا امجد امجد لمن ما استجاب لكلاما مشت جابت مفتاح اسبير وفتحت الباب جرتو مني وهو دفرا هي زاتا ابعد من بنتي يا حيوان انا حضنتها وقعدت ابكي
امي انتي  كنتي وين الحيوان دا دخل كيف قام رد لي هو ما دخلت بالباب دا حايكون بوين عاينت لامي قال لي هي الفتحت لي  : شنو؟ امي قالت له امشي اطلع برا قال لها طالع بس عاين لي وقال لي ما تثقي لي بأمك دي كتير يعني لو ما هي القاعده تدخلني بيتكم اصلك كيف مش امك دي ولا مرت ابوك قلتي لي  قلعت عيوني
امي؟؟  : ما تشتغلي بكلامو دا كلب طوالي طلع تلفونو وراني صوره له معاها في عربيتو كمان قال لي انتي قلتي لي مرت ابوك وانا صدقت بعدها هي اتواصلت معاي وسألتني اذا كان في علاقه بيننا قلت لها لا عشان ما تعمل لك مشاكل مع ابوك وهي برضو مشت كذبتك الحاجه الماتوقعتها انو امك تطلع خاته عينا على قروشي لمن عرفت انو نحن منفصلين حاولت تتقرب مني ولمن سألتا عن زوجها قالت طلقه ساعتا عرفت انو هي امك الحقيقيه وما عندك اي زوجة اب بعدها انفصلنا وانا اتواصلت معاها الفتره دي عشان تخليني اشوفك وهي ما خزلتني ذي ما شايفه انتي القزاره محيطه بك ما تعملي لي نفسك نضيفه قال كدا وطلع
امي انتي عملتي كدا؟؟  : كذاب  : ما تنكري والصور دي شنو دا الشغل بتاعك يعني؟ مصاحبه الاولاد الاصغر منك عشان كدا شاكلتيني لمن حكيت عن أمجد غرتي صح؟؟  : الموضوع ما كدا ياخ يا بنت : انا ما عاوزه اشوف وشك تاني يا امي عاوزه امشي مسكتني من يدي استني هنا واسمعيني انتي مجبوره تسمعي انا لمن شفتك معاه يوم كنتو ماشين الحفله شكيت انو في شي بينكم كنت عاوزه الاقيه وافهم منو بس اليوم داك ابوك طلقني وحصل الحصل بعدها انا شلت رقمو ولاقيتو واتفجأت لمن كلمني على اساس مرت ابوك ومشيتو سألتو عن الشي بينكم قال لي اشاعه ذي ما قالت لك سمر ما اكذب عليك انا ساعتا فكرت اغيظ به ابوك لانه طلقني بالطريقه دي كنت في فتره صعبه وما عارفه بعمل في شنو بس والله العظيم ما حصل بيننا شي لمن عرفت فهمو نويت انسحب اصلا هو اول ما عرف اني امك فصلني يوم حكيتي لي عنو اتصلت به وشاكلتو بس هو هددني بالصور الفي عربيتو وما اكتفى بكدا كمان قال لي عاوز اشوف سمر اتصرفي قلت له ما حاسمح لك تأذيها قال لي عاوز اتكلم معاها بس لانها فاصلاني انا بحبها ومستعد اتزوجا لو قبلت وانا على الاساس دا دخلتو البيت افتكرت الموضوع خلص بس تاني رجع طلب نفس الشي ولمن انا رفضت قال لي حاحكي لها عن علاقتنا واقول لها انك قاعده تجيني الشقه وتاخدي قروش مااتوقعت اصلا يفكر يدخل غرفتك ويعمل فيك كدا  : تدخلي راجل غريب لبيتك وبنتك قاعده براها وانتي عارفه هو فهمو شنو  : بس هو قال لي بحبا وعاوز اقنعا تتزوجني  : ما بحبني ولا انا انا طلعت الانسان دا من حياتي خلاص انتهى بالنسبه لي وانتي زاتك طلعت من البيت اليوم داك وما عارفه اعمل شنو ولا امشي لمنو قعدت مع غلا يومين بس في النهاية رجعت البيت ما عندي مكان غيرو وامي هي امي غصبا عني  مافي مجال تطلع من حياتي بقينا عايشين اي زول ملتهي بشغلو ولا بنتكلم مع بعض حتى ولا بنقعد في طاولة أكل البيت دا بالنسبه لينا بس مكان للنوم اي واحده بتطلع من الصباح على شغلا تاكل وتشرب برا وترجع تنوم وهي شكلا شكتني لابوي قام اتصل بي
مزعله امك مالك وما بتسمعي كلاما  : انت عارف عمايلا ما تخليني اقول كلام يزعلك ساي  : انتي اسي ما عندك غيرا اتحمليها بس  : وانت راجع متين؟  : والله يا بنتي ما معروف يداب استقريت في الشغل والسكن  : عاوز تتزوج؟  : لا والله يا بنتي ما فكرت في موضوع ذي دا  : عاوزه اجيك محل قاعد انا ما بقدر اتحمل امي دي والله العظيم  : ما تقولي كدا  : انا خايفه بسببا اتخد قرارات غلط في حق نفسي
وفعلا انا بسببا قربت اضعف قدام ضغط امجد لي وامشي له عشان اتخلص من العيشه معاها بس تاني اتراجعت لمن اتزكرت انو كان على علاقه معاي انا وامي في نفس الوقت من غير ما يخجل بكذب وهو بعاين في عيوني الخائن قررت افضحو عشان ما يكرر فعلتو دي تاني مع اي بنت خليت مناسك تحكي لي كل التفاصيل الخاصه والفظائع البتحصل في بيت الانين
كنت خايفه شديد بس خلاص مافي تراجع بديت البث بتاعي وقعدت اتكلم بحريه بس من غير زكر اسماء وبحزر من الشخصيات الزيو الناس كلها كانت متفاعله مع المحتوى وفي ناس قدرو يوصلو لأنو دا امجد النصري نفسو لمن صرحو بالشي دا الصباح تلفوني ما هدأ والباب بخبط بعنف امي مشت فتحت ولقتو امجد قلت لها دا منو جاء داخل ذي الوحش وقال لها وينا بنتك ال.........  دي  : احترم نفسك طوالي دفرا واقتحم غرفتي للمره التانيه انا كنت خايفه شديد
كمان وصلت بك الجرأة تتكلمي عني وتشوهي صورتي في الميديا انتي فاكراني بلعب معاك ولا شنو؟ عشان قلت بحبك تتجاوزي الحدود  : انت الاتجاوزتا بالاول وتستاهل الحصل معاك  : انتي الجنيتي على نفسك انتي والتافهه مناسك انا ما حأرحمكم عاوز يضربني امي جات وقفت له وقالت له اطلع برا ولا اصرخ والم عليك الناس عشان يعرفو انو انت المقصود بالجد عاين لي وقال لي كدا يا سمر؟ براك جبتيه لنفسك حاتشوفي ايام سوداء معاي اصبري لي بس طلع خلاني ميته من الخوف ونظرتو المرعبه ديك بعد يومين اتصلت بي مناسك وقعدت تشتمني
كلو منك كلو منك يا سمر انا وثقت فيك تعملي فيني كدا  : مالك في شنو  : انتي فضحتيني وخليتي الدنيا كلها تعرف انو انا حامل من أمجد  : بس انا ما قلت اسمك ولا في زول زكرك اصلا  : بس اهلي عرفو وامجد امجد انت عارفه عمل فيني شنو ظهر قدامي بعربيتو وانا ماشه على بيتنا طلعني فيها غصبا عني ووداني شقتو ديك هناك ضربني بوحشيه لمن نزفت وطلع مسدس ختاه في راسي قال لي لو جبتي سيرتي بفرغو كلو فيك كان انسان مختلف خالص حتى نظرتو ذي المجرمين انا قربت أموت يا سمر رماني في الشارع ومشى الا اتصلت بأهلي لحقوني وعرفو اني كنت حامل انا بتعذب حاليا وما بقدر اقول لهم امجد العمل فيني كدا  : ليه ما تقولي  : انتي ما حسيتي بالرعب دا ولا  جربتي الانا مريت به عشان كدا بتقولي كلامك دا بس جاييك الدور وانا ما حاأشفق عليك لانك تستاهلي انتي السبب في معاناتي ياريتني لو ما سمعت كلامك وما اتحديتو انتي دمرتيني قفلت فيني طوالي اما انا عشت في حالة رعب حقيقيه وكل ما أطلع من البيت بتخيل انو متابعني وعاوز يخطفني ذي ما عمل مع مناسك الكوابيس بقت تطاردني اي عربيه سوداء بخاف منها حتى رنة تلفوني بتخوفني بقيت ذي الانسان المريض وهو كل يوم بتوعدني مره جات عربيه جاريه بسرعه وراي ولاحسيت بها زاتو قربت تضربني انا أيقنت انو دا هو البعمل في الحاجات دي ما عارفه دوري حايكون متين وانتظار البلاء أصعب من وقوعو لمن لقيت اني بموت بالبطيئ اتصلت به وقلت له عاوزه أشوفك ضروري وصف لي مكان مشيت له طبعا المكان فاضي وهو واقف بتجبر وثقه كدا عمياء عيونو بتقول لي دي نهايتك انا بدون ارادتي قعدت في الارض ابكي قلت له اعمل العاوزو فيني اسي وما تأجل انا تعبت من الألم النفسي دي ياها طريقتك في التعذيب يعني؟؟  : لك انتي بالذات لانك تستاهلي اكتر حزرتك من البدايه انا خليت مناسك تكذب كل القلتيه خلاص فقدتي مصداقيتك يا شاطره انا كنت لسه ببكي على الارض قال لي ارفعي راسك : اعمل العاوزو اسي ما حاأمنعك بس بعدها خليني في حالي  : لا انا ما برضيني كدا  : عاوز مني شنو يعني هدي انا جيتك بنفسي وانكسرت لك  : انا ما بكفيني يوم واحد وترجعي تعيشي حياتك عادي عاوزك دائما : يعني ناوي تتزوجني بالجد بتحبني يعني؟  : زواج وحب؟؟انتي مسكينه شديد انا ما عاوز ولا مفكر اتزوج اصلا ولمن اجي اتزوج اكيد ما حاتكوني انتي لانك ما بنت ناس واحده ابوها مخليها كدا بدون رقابه وامها فاكاها لاي راجل عندو الرغبه حاتكون زوجه وأم كيف اصلا البنات نوعين بنات للزواج وبنات للمتعه زيك كدا كلامو كان اقسى على قلبي من اي حاجه تانيه قلت له طيب مدام انت شايفني كدا جاري وراي ليه؟  : لأنك خليتيني في نص الطريق ومديتي يدك علي دي إهانه ما حانساها لك طوالي فتحت سستت فستاني ووقفت قدامو قلت له طيب كمل البديتو لو دا برضيك ولا حتى حأعترض زعل زعل وعيونو بقت ذي الشرار لأنو تصرفي استفزاه قال لي ما بكيفك انتي فاهمه؟ : بكيفي بكيفك اعمل العاوزو وخلصني : ما عاوز كان فيك حاجه مميزه مرغباني فيك بس مدام خسرتيها خلاص فقدت الرغبه فيك يلا البسي وامشي ما عاوزك  : شنو؟؟  : البسي وامشي اهلك ما ألمح خيالك تاني صلحت فستاني ومشيت من قدامو مقهوره ومزلوله دي كانت نهاية قصة حبي لامجد نهاها بطريقة بشعه قدر يزلني ويمسح بكرامتي الارض رجعت البيت جارا وراي الخيبات والدموع مغرقه عيوني وامي كانت خايفه شديد من تاخيري قالت لي اوعا يكون حصل لك حاجه  : ما حصل  : كيف ما حصل انتي كنتي بتبكي  : الغريب شنو في الموضوع ما طول عمري زعلانه وببكي  : لو ما حابه تشتغلي مع الناس خلي الشغل انتي ما مجبوره عليه  : الموضوع ما له علاقه بهم اصلا امجد ما حايزعجني تاني  : متأكده؟؟  : ايوا
يتبع