علاقات مشبوهة

علاقات مشبوهة 21

#علاقات_مشبوهة
#بقلمي  : #مشاعر_مبعثره
الجزء الأول
الفصل الخامس  (إختطاف)
الحلقه (21)
عارفه حبيبي بس انت زعلتني في الوقت الغلط كنت عاوزه اوريك اني حامل عيونو لمعت من الفرح قال لها بالجد حبيبتي  : ايوا بالجد
بعد الخبر دا إياد اتنازل عن حاجات كتيره كان ناوي يعملا اما انا ما قدرت انسى الحصل لي وفضلت في مكاني ما غيرت من نفسي ولا طورتا بقيت بس محبوسه في البيت وامي واقفه معاي المره دي بالذات بقت تهتم بي شديد وتدعمني وتحنسني لمن ازعل او ارفض الاكل مرات ببكي بدون سبب وهي بتجي تتكلم معاي امكن خايفه اني انتحر الحصل لي خلاها تفكر مية مره في علاقتنا والوصلا لحدي هنا حست اني كرهتا وعاوزه تكسبني انا مرات بتجيني حاله ما اطلع من الغرفه نهائي واقعد منكوشه الا هي تجي تسرح لي وتمسحني علياء برضو جات وابوي لمن سمع اني اتسممت حسب كلام امي قعد معاي انا انبسطت شديد بجمعتنا دي وفكرت لو امي تطلق وترجع لابوي بس بعاين لرحيق واخوانا الصغار وتعلقهم بيننا
انتي قلتي الصديق سافر قطر في شغل؟؟  : ايوا  : عايني انا ما عاوز اخوفك بس عندنا صاحبنا انسجن بحادث حركه ولمن مشينا له انا شفت الصديق مع المساجين النصري جاه زياره  : بالجد؟؟  : والله العظيم  : امكن عمل حادث هو زاتو : لا انا سألت صاحبي عنو تهمتو كبيره ومسجون مؤبد تقريبا تجارة ممنوعات انا ختيت يدي الاتنين في خشمي
ممنوعات؟؟ لا ما قادره اصدق  : ما تكلمي امك احتمال مخبي عنها : انا بديت ا...........  : شنو  : ولا شي كلامك صح المفروض نسكت
انا طبعا اتزكرت الحصل  في عربية أمجد الكيس داك كان فيه بدره وحبوب ما عارفاها شنو كنت عاوزه اقول لابوي شاكه انو الناس ديل تجارتهم ما نضيفه بس اتزكرت تحزير امجد ونظرتو المخيفه اليوم داك والمسدس عشان كدا سكت مالي ومال المصايب ابوي رجع السعوديه وعلياء وراجلا اشترو لهم بيت في بورتسودان واستقرو هناك وفضلنا انا وامي والاولاد عاملين جو حلو في البيت ابوهم بتصل بهم طوالي وبسلم عليهم وكل ما يسألوه جاي متين بقول لهم لسه خليكم مع خالتكم كوثر واسمعو كلاما انا شويه شويه بقيت اطلع وامشي الدكان والسوق مرات شايفه نظرات الناس لي ما ياها في المواصلات في واحد لمسني كم مره قمت شاكلتو قال لي يعني حرام علينا نحن ناس حيك وحلال على ناس العربات  : انت باي حق بتتكلم معاي يا تافه  : ما تعملي نفسك شريفه في الحي انتو خلاص انكشفتو الناس كلها عارفه فضايحكم من ابوك سافر وانتي وامك قالبين البيت دعاره يوم امك جايبه راجل ويوم انتي يا بيتي برا سمعتكم كعبه  : انا اشرف منك يا حيوان يا تافه ما انت البتحكم علي ويدك دي تاني تمدا علي بكسرا
رغم اني شاكلتو وكل الفي الحافله شاكلوه بس ما حسيت اني اخدت حقي بالجد سمعتي بقت كعبه وناس الحي بطلو يتعاملو معانا بقيت صغيره عديل قعدت الفلف في الشوارع ما عارفه ماشه على وين عاوزه اروح ما أعرف انا وين وافقد زاكرتي انسى انا منو وعملت شنو في الدنيا دي من اغلاط اذيت منو ومنو الاذاني الحرب الإنفرضت علي دي اخرتا شنو
منى اتصلت بي ما عرفتا زاتو وبقت تقل ادبا علي وتقول لي ابعدي من راجلي وهو ما بحبك وكلام ذي دا قلت لها طيب امسكيه عليك ولا أقول لك حاجه احبسيه في البيت عشان عينو ما تجي علي بالغلط وتزعلي وطق قفلت فيها فارت ودفقت مشت عبتا شكله معاه قدر ما حنسا ما هدت قالت له انا  حامل وماشه بيتنا ارتاح هناك وصلا لحدي البيت ومشى بيت في فندق 
اثناء ما كنت ماشه في الشارع لمحت الراجل الشفتو مع امجد داك واتزكرت الكلام القالو لي لو شفتيه مره تانيه معناها دا اخر يوم لك خفت خوف مبالغ فيه وقمت جاريه بعيد منو ما عارفه هو شافني ولالا بس انا كان همي ابعد عنو اطول مسافه ممكنه حتى ما عاينت وراي فجأة اصطدمت براجل اعتزرت منو وعاوزه امشي مسك يدي قلت له فكني بس هو ما فكاني صفر بخشمو جات عربيه طالعه من قدام قلت له انت عاوز مني شنو قعدت اصرخ قفل لي خشمي نزل واحد تاني من العربيه وركبوني غصبا عني طعنوني بحقنه في رقبتي تاني ما حسيت بشي
ما عارفه مر علي كم صحيت حسيت اني مربوطه ما عارفه نفسي  وين حتى خشمي وعيوني عاوزه اصرخ ما قادره فجاءة سمعت صوت رجلين جايات علي انا خلاص ختيت في بالي الموت واستسلمت له فك لي عيوني لقيتو نفس الراجل داك عاوزه صرخت ومافي صوت طالع مني وسامعه برا صوت ضرب نار ما باقي لي الا اعملا على روحي الراجل فك لي يديني ورجولي وجاريني لبرا كان المحل مليان عربات ذي الكأنو بنشر ولا موقف ما بعرف غايتو تجع عربات كان في اشتباك وسطهم ومتخبين وراهم هو سايقني وسط الاشتباك والعربات دي انا خلاص قنعت من نفسي شايفه الطلق بعيوني وحولي صد ورد ظهرو قدامنا اتنين انا فكيت خشمي من الربطه وقعدت اصرخ ضربو طلقه مباشره علينا قام الراجل رماني على الارض طلع مسدس من خصرو وبقى يضرب ويتخبى ورا العربيه ضرب كم طلقه لورا وقال لي اجري من هناك واوعا تقيفي لأي سبب حتى لو انضربت رجلك ما تقيفي شفتو بعيني بضرب واحد من الراجلين في بطنو لمن وقع ودمو سال  انا طوالي قمت جاريه جاتني طلقه جنب رجلي وقفت طوالي انخلعت وقعدت اتلفت لقيت راجل شايل مسدس موجهو علي قال لي اياك تتحركي قعدت في الارض أرجف واصرخ قال لي خشمك ما تفتحيه وجاي علي وانا بزحف على الارض لورا فجاءة سمعت صوت طلقه غمضت عيوني وصرخت كنت فاكراه ضربني بس ما حاسه بأي ألم اتحسست جسمي مافي شي عاينت قدامي لقيت الراجل واقع على الارض ودمو سائل قمت جاريه ذي المجنونه كان في مفترق طرق حسيت بيد بتسحبني على اليمين عاينت كدا لقيتو امجد وجاري بالاتجاه التاني وبضرب طلقه ورا طلقه وانا مغطيه اضاني بيدي قمت جاريه عليه اول ما وصلتو حضنتو بدون وعي وقعدت ارجف وابكي ما اهتميت بالمسدس الشايلو في يدو ولا العملو فيني كل المشاكل اتبخرت كانت حاله قريبه للاوعي لمن تكوني في مكان غريب فيه صراع ما بتعرفي فيه اي زول اول ما تلقي زول مألوف تلقائيا بتلجئي له هو وتحتمي به ودا الحصل لقيت في امجد الامان الفقدتو من جيت المكان دا قال لي اهدي حبيبتي وما تخافي : دا شنو البحصل دا فجاءة ضرب طلقه والتف بي وانا لسه في حضنو حسيت انو مشتبك مع زول قال لي اقعدي هنا مشي وجاء ساقني من يدي وبقى جاي بي كل ما نحصل مفترق يوقفني يضرب كم طلقه حتى يسوقني لمن وصلنا عربيتو كانت واقفه بعيد وشكلو جاء ماشي مسافه برجولو ركبني واتحرك تلفونو رن كان في جيب الجاكيت بتاعو وهو خاتيه في المقعد الورا رقد لي مقعدي وقال لي جيبيه رفعت الجاكيت دخلت يدي في الجيب طلعت التلفون  فتحت واديتو له
سايكو  : وين انت  : في العربيه طالع انا اتصلت بالشرطه ابقى مارق انت زاتك : تمام نتلاقى في الشقه
قلت له امجد ممكن تفهمني الحاصل شنو ونحن وين سكت مني قلت له طيب مدام اتصلتو بالشرطه ليه بتهربو انتو؟ ما حاتفتحو بلاغ وتخلوهم يمسكو المجرمين؟؟ صرخ فيني انتي ما تدخلي نهااائي كان سايق بتهور وعرقو سايل مع انو العربيه مكيفه وماشي في اتجاه ما بعرفو زاتو وانا خايفه قعدت اصرخ واقول له نزلني نهرني بنبره بتخوف وعيونو اتحولت ذي المره الفاتت طوالي سكتت كان ماشي على سوبا وعرفت انو موديني بيت الانين وانا خلاص اعصابي ما متحمله اول ما وصلنا الشقه فتح الباب واشر لي بيدو انو ادخل دخلت قدامو واول حاجه عملتها اني شربت كميه كبيره من المويه وبحاول اهدي نفسي وانسى الحصل دا صوت الرصاص لسه في اضاني والخوف الحسيت به امجد دخل الغرفه لحقتو كان قلت له دا شنو الحصل دا انا من الاول كنت شاكه انكم عصابه : سمر انا ما ناقصك  : وانا برضو ما ناقصه اتورط معاك كفايه خلاص خليني في حالي مدام بلغت الشرطه ليه ما قعدت انتظرتهم
كان بطلع في قميصو انا لمن شفتو كدا بقيت ارجع لورا قال لي خايفه مني؟؟ سكت قال لي بصوت هادي للدرجه دي انا بقيت مصدر خوف بالنسبه لك : انا ماشه لانك ما عندك اي تفسير انا كنت مخطوفه وما عارفه الخطفني منو ولأي سبب ولا عارفه اصلا انت عرفت كيف وجيت خلصتني برضو ما رد قمت ماشه لحقني في الباب ومسك يدي الاتنين بقيت اتقاوى معاه ارتمى فيني وخلى تقلو كلو علي افتكرتو حاضني عاوزه ادفعو بقيت الزو فجاءة حسيت بيدي لينه عاينت فيها لقيتا مليانه دم افتكرت نفسي انجرحت وهو كان ما بتحرك وقع لمن وقعني معاه على الارض عاينت له لقيت كتفو بنزف قعدت اصرخ قمت مت تحتو وبقيت احاول اصحيه وهو غايب عن الوعي تماما وضهرو سايح دم جريت برا شلت تلفوني قلت اتصل بالاسعاف بس الباب دق مشيت فتحت لقيتو الراجل داك قال لي امجد وين؟  : قاعد جوا غمران وكتفو بنزف  : وانتي عملتي شنو؟  : عاوزه اتصل بالإسعاف قلع مني التلفون وقال لي اياك تعملي اي تصرف  من راسك طلع فوق وانا لاحقاه قال لي اتصاب متين؟   اتزكرت الحصل لمن كان حاضني ولف بي اكيد اتصاب في اللحظه ديك حماني بجسمو قلت له لازم ناخدو على المستشفى  : اوعك تفكري حتى ساعديني
رفعناه في السرير وهو نزل عاينت له بالشباك جاب شنطه من العربيه وجاء طبعا قالبنو على بطنو فتح العلبه فيها شاش وحقن ومقصات حاجات بتخوف قال لي امشي سخني مويه بسرعه قلت له انت عاوز تعمل شنو  : اعملي القلتو له يلا
مشيت سخنت المويه وجبتا له الراجل دا بدون تردد قعد يطلع له في الطلقه بعد اداه حقنه والدم سايل وبقول لي اضغطي انا دخلت في حاله هستيريه وبطني قلبت ودخت قعدت ارجف وعاوزه اقع لاني اول مره اشوف حاجه ذي دي في البيت وبدون دكتور وتعقيم ما عارفه بتخدير ولالا زاتو  قال لي غمضي عيونك واوعا تشيلي يدك بعد طلع الطلقه خيط له الجرح ذي الدكتور امجد كان غايب عن الوعي بس بدا يصحى اثناء الخياطه طلعت منو صرخه مكتومه وداك قلبو قوي جسمو كلو دم ولا متأثر بعد خلص مشى الحمام غسل نفسو من الدم غير ونزل قال لي ما تفارقيه ولا لحظه امجد بقى يتمتم بكلام ما مفهوم وجسمو حار ذي النار وعرقان مشيت جبت قطعه نضيفه نضفتو بها من الدم بعداك جبت واحده تانيه ومويه بارده قعدت اعمل له مكمدات وهو لسه مواصل هلوسه بضاعه وادهم وحاأقتلو وكلام كتير انا ماشه استحم لانو جسمو برضو اتملى دم مسك يدي وبقى شغال البنت دي انا بحبها بقتلك لو لمستها اوعا اوعا تلمسا سمر تعالي تعالي هنا جنبي انا بحبك انا بحبك اكتر من نفسي لمن الراجل داك جاء وانا خجلت شديد في قدامو هو بتكلم ومتمادي بقى يجيب خارجيات عجيبه وكلام يخجل كلو عني اتفكيت منو وقمت طالعه برا هو جاب درب ركبو له وكسر فيه حقنه قعد معاه فوق وانا دخلت الحمام استحميت وغسلت الدم من ملابسي ولبستهم لينات كدا قعد معاه فتره وجاني طالع قلت له انا ماشه البيت لو سمحت وصلني : ماشه تخليه كدا؟  : انا امي........  : امك تتحرق بجاز انتي مغفله ولا شنو الراجل دا خلى اي حاجه وراه وجاء جاري لمن عرف انك انخطفتي وطاردهم حتى انو اتصاب وهو بحميك واسي بهلوس بإسمك وانتي ماشه تخليه تعبان  : بس انا قلت لك خلينا نوديه المستشفى  : مافي مستشفى وطلوع من هنا مافي انتي فاهمه؟ لو زول عرف بالحصل دا انا بقتلك بدون تردد شال مني تلفوني وشنطتي قال لي انا طالع يلا امشي له فوف واهتمي به انا طوالي مشيت لقيتو نايم شكلو ارتاح على الدرب دا امكن فيه مسكن قعدت جنبو وسهرت فوق راسو لمن صحى قلت له امجد انت كويس؟؟  : ايوا عطشان مشيت جبت له مويه شربتو طبعا بقيت قريبه له شديد وهو من غير قميص وعرقان عاوزه ازح منو خت يدو في خصري وقربني منو اكتر قال لي خفتي علي يا سمر؟  : لو اي زول مكانك كان خفت عليه : خليك هنا شويه انا........... : انت تعبان ولازم ترتاح  : مافي راحه اكبر من الانا فيه دا ما اتوقعت اصحى واشوفك قدامي كدا بين يدي وبتهتمي بي نفسي نفضل في الوضع دا العمر كلو سمر انا بحبك
يتبع