علاقات مشبوهة

علاقات مشبوهة 44

#علآقآت_مـشـبــوهة
#بــقلمـي  : #مـشـآعر_مـبــعثـره
آلج ـزء آلثـآني
آلفصـل آلعآشـر  (  آلدون  ج ـوآن  )
آلح ـلقه   ( 44)
انا شاكر فهمي عشت طفوله معقده شديد كرهت المرا الخاينه او المتاحه والسبب امي الخانت زوجها مع واحد سوري عجبا شكلو وسمحت لنفسا تقرب منو لمن حملت وانجبت الطفل بس ما قدرت تخدع زوجها بسبب الشبه الواضح بين المولود الهو انا وصاحبا السوري  والدي فهمي كان عندها طفلين قبلو الطفلين ديل بشبهو ابوهم وعشان ربنا كاشفا طلع المولود الجديد ما بشبه اخوانو وانفضحت زوجها طلقا من دون ما يسمع مبرراتا وهي مشت لعشيقا اجبرتو يتزوجا بس مات بعد فترة قصيره من العرس دا وخلاها وحيده بعد ما اهلا اتبرو منها ما لاقيه حتى تاكل ف اضطر زوجها الاول يرجعا ويربي ولدا اعتبرو واحد من اولادو وما قصر منو في شي لمن كبر وورثو مع اولادو كمان ما كان في زول عارف بالفضيحه دي غير الاسره ولمن الاولاد كبرو لفقو القصه الكل الناس بتعرفا انو هي اتطلقت بالثلاثه اتزوجت السوري عشان تحلل راجلا واول م هو اتوفى رجعت لراجلا الاول قصه مثيره للشك ومليانه ثقرات انا قدرت ببساطه اخترقا واوصل للحقيقه نشأت وعشت في العز كل البطلبو بحصل عليه عملت شراكه مع ولد خالتي النصري مع بعض اسسنا الشركه العريقه دي اشتغلنا عليها ليل ونهار لمدة 10 سنوات لحدي ما حققنا الانجاز واتزوجنا وشغلنا اولادنا كنا عايشين في نعيم خفنا او انا خفت ينقطع عن اولادنا واحفادنا بموتنا واسمنا العملناه دا يسقط بسقوط الشركه مع اصغر غلطه والحل انو نجمع قروش ما تاكلا النيران اضعاف اضعاف البنكسبو ونخليها للاجيال اخترنا اقصر طريق وهو التجاره في الممنوعات وبدينا بالبنقو اقنعتا النصري باول عمليه وهو كان خايف شديد  وقرب يتراجع بس لمن شاف حجم الارباح والنجاح السريع ما قدر يوقف كنا بنحصل على كل شي بنتمناه ببساطه وبرفع في ارصدتنا البنكيه واصلنا بقلب قوي بقسى بعد كل عمليه وعملنا شراكات مع ناس كبار فتحنا حسابات بنحول فيها كل الارباح ونكتفي بعوائد الشركه الهزيله لمعيشتنا عشان ما نلفت الانظار امجد النصري بطبيعتو انسان فضولي  وما زول مكتب والتزامات ذي اياد مشى ورا شكوكو لحدي ما اتعرف على سايكو الشاب المميز في الشغل دا عرف منو كل الحاصل وجاء واجهنا بها والدو كان خايف من ردة فعلو بس هو م انزعج بالعكس كان عندو نفس الطمع والطموح دخل في الشغل بقوة وحنكة كل م ابوه يبعدو انا بقربو اكتر لاني شفت فيه نفسي بسافر وبخاطر ما بخاف عندو قلب شجاع ذي الأسد مستعد يخاطر بأي حاجه عشان ينجح العمليه البقوم بها كل يوم ابوه بلومني على دعمي له وانا بقول له دا خليفتنا  : واياد ولدك ليه مخبيه في الشركه ومبعده عن المخاطر والشغل الممنوع  : اياد ما زي امجد دا لو عرف ما بعيد يسجنا كلنا انت ما بتعرفو اما امجد هو الراغب الشغل  : بس الولد انخرط معانا ويديه اتلوثت  : دا ولد المفروض تفتخر به انا كنت متمني اياد يطلع زيو بس خيب ظني
انا كنت ببرر له بكدا بس على قدر ما كنت معجب ب امجد كنت بحمد ربنا انو ولدي ما طلع زيو لانو وحيدي وبخاف عليه
كنا ماشين تمام في الشغل لحدي م حصلت المشكله الكبيره مع ادهم وامجد وابوه منعو من الشغل نهائي بس كان المقابل انو يحصل على نسبه من كل العمليات وهو اصلا كان بياخد نسبتو من كل عمليه يعملا غير نصيبو الاساسي ونحن كنا عارفين بس بنسكت لانو بتعب في الشغل دا
اخر عمليه قام بها النصري كان مخطط ومتكتك لها تمام بس فيها مخاطره لانو الضاعه عباره عن مواد مخصبه وادهم جهز كمينو النصري غير الخطه في اخر لحظه وطلع منها امجد نهائي كان حاسي بالخطر ووصاني عليه قبل يسافر قال لي لازم تحميه وما تخليه يبقى زينا امجد م كان حايوافق لو ما صادف اليوم داك زواج اياد وسمر وكان مخطط يفضحا قدام اهلا ويخرب عليها اليوم دا بس حصل الحصل والمتوقعو النصري ادهم قتلو بدم بارد وحرق قلبنا عليه انا حسيت بالضعف والانهزام لاني فقدت جزء مني وفقدت السيطره ما كنت قادر اقود المركب براي  وبدل انفذ وصية صديقي واحمي ولدو استعنت به وحولتو لشريك عشان يملا خانة ابوه بقى يخطط ويدبر حتى من دون علمي كان همو ينتقم لابوه من ادهم وشويه شويه عمل الفي راسو وانا متجاهل الموضوع لحدي م كبر وفي لحظة لقيت نفسي بفرط فيه لمن سمر اتخطفت مشيت شقتهم وبالصدفه لقيت الرساله اللهي كاتباها له وعرفت من خلالا انو ادهم هو المسؤول عن خطفا لانها بقت على علاقه ب امجد وماشه له رسلت ناس ورا امجد لمن مشى يرجعا وفي النهايه اياد حسم الموضوع بخطوتو الكبيرة ذي م اتوقعت نهايتنا بقت على يدو هو انا قررت اعمل اخر واجب مع صديقي المقرب واحمي ولدو الوحيد امجد لسه شاب والحياة حرمتو من حاجات كتيره اكبر عقاب له انو المرا الوحيده الحباها بصدق وسط اللخبطه العايش فيها دي ما حبتو ابدا وكمان حبت واتزوجت ولدي انا وهو التاني متعلق بها كونو ما يحصل عليها ابدا ويضطر يشوفا معاه دا اكبر عقاب حتى لمن اجبرا واستباح جسدا قاومتو وما بقت له ذي ما هو عاوز دي الخسارة الح يعيش معاها عمرو كلو
البيت والشركه  دا المال الحلال الفضل لينا بحلف بالله العظيم انو الشركه ما دخلا ولا قرش حرام كل حساباتا واضحه ومدققا بواسطة اياد وجمال دا شغلهم ومجهودهم الخاص  المال الحرام نحن استثمرناه في محلات تانيه وفتحنا حسابات بمبالغ ضخمه وفي قروش نقديه انا مخبيها في بيدوم تقدرو توصلو له من باب المخزن كلها دولارات والنصري عندو زيها في نفس الموقع من بيتو دي ضمانة حياة اولادنا واحفادنا م حاعتزر لاني ما ندمان على اي حاجه حتى لو رجع بي الزمن ح اختار نفس الطريق وراضي بالنهايه
___انتهى التسجيل
كنت قرفانه شديد من الراجل دي ومستحقراه كيف بجمل في الحرام في نظر ولدو عشان يقبل بالثروة الخلفا له اكتر شي غايظني انو ما ندمان على العملو وبدافع عن امجد انا بالجد ندمت على الساعه السمعتو فيها اتصلت ب اياد رد لي بلهفه قلت له عندك امانه معاي   : من منو  : بعد تاخدا بتعرف  : اوك برسل السواق  : انت قاعد في البيت يعني؟ : لا نازل في فندق  : دقيقه دقيقه انت فاكرني عاوزه اجيك يعني؟  : انا ما قلت كدا  : رسل العاوز ترسلو  وطق قفلت فيه رسل لي السواق اديتو الفلاشه هو م ابدى اي ردة فعل والشركه امورا جايطه بقت على وشك الافلاس لانو مافي زول يديرا جمال تعب والامور طلعت من سيطرتو اصلا عندو اشغال تانيه قام مشى لاياد قال له انت عندك مرا وولد وفي بيبي جديد جاي في السكه حاتخليهم كدا والشركه بتنهار انا ما عارف اتصرف لازم ترجع الشغل  : طيب اشتريها  : بقول لك ماشه تنهار اشتريها وتخسر في يدي اصلا ما عندي سيوله انت ليه ما عاوز تفهم انو الشركه دي ما لها علاقه بالشغل المشبوه بتاع بتاع ابوك الشرطه حققت ودققت اسبوع كامل لو كان في شك بنسبة 1٪ كان حجزو عليها  : طيب وسمعتنا الحاتكون في الارض منو الحايتعامل معانا ولا يشتري مننا بعد بابا اتوقق بتهمة ذي دي   : مافي زول عارف اصلا التحريات والمحاكمه حاتتم بسريه لانو الموضوع حساس وفي اسماء كبيره ومؤثره متورطه فيه انت ممكن تتبرع من الارباح لو عاوز ترضي ضميرك واستلم مرتبك ذيك وذي اي موظف شغال
اياد اقتنع بكلام عمو وبسبب ضغوط الحياة نزل شغلو وانا برضو رجعت اشتغل هناك كنا بنتلاقى عادي وبجمعنا الشغل بس بنتصرف برسميه طبعا منى مستحيل ما تعمل فصول ناقصه معاي كل يومين ناطه لينا في الشركه تستعرض نفسا قدامي ولمن تشوف بطني بتغير لانها ما عارفه انو في احتمال م يكون من اياد اصلا علاقتي ب امجد مافي زول عارفا غير انا واياد وابوه
حبيبي خلينا نمشي المقابله مع بعض  : بس انا مشغول  : لا لازم يلا  : تمام انتظريني في العربيه  : اوك
هي طلعت وانا دخلت
دي الاحصائيه الطلبتا مني  قلت له كدا وشايله شنطتي في يدي قال لي ماشه وين؟  : طالعه  : بس لسه موعد الدوام  : اخدت اذن عندي مقابله
قعد يعاين لي في بطني خبيتا بالطرحه قال لي لو حابه بنوصلك في طريقنا نحن برضو ماشين  : ما ماشين نفس الدكتور انا دكتوري واحد  : من الاول قلت لك تتابعي عند دكتورة منى في داعي يعني تتابعي عند دكتور راجل  : انا من قبل اتزوج قاعد امشي له انت ادرى بالحصل لي  : مهما كان راجل وانتي كل شهر بتمشي تكشفي عندو صريت وشي وقلت له انت ما عندك فيني سبب الكلام دا تمشيه على مرتك م انا تمام؟؟  : انتي لك كم اسي  : وانت ليه بتسأل  : عادي انتي موظفه عندي عشان لو محتاجه اجازه نديك  : لا اطمن انا لسه في الشهر السادس  : ما دخلتي السابع يعني؟؟  : عن اذنك
انا عارفه هو بلمح لشنو عاوز يستفسر اكتر او بحاول يقول لي انو الجنين دا صغير ومستحيل يكون مني
المهم مشيت قابلت دكتوري لاني بثق فيه
سمر انتي حصل معاك نزيف؟؟  : ايوا بس ما حاجه بتخوف  : اعملي حسابك حاليا مافي خطر بس برضو في مؤشرات مهمه ما تتجاهليها  : تمام
كلام الدكتور خوفني لمن حكيت لامي قالت لي الشغل دا خليه بتعبك  : لا مافي اي تعب بمل في البيت
بعد الحصل دا ب اسبوعين بقيت احس ب الام غريبه وثقل شديد في بطني ما متحمله الجنين عديل وحاسه ب إرهاق بس بكابر وما عاوزه اوقف شغل من اسي
كله غلط في غلط انتي ما بتشوفي يعني؟  : انا اسفه  : اسفه شنو لو ما بتقدري على الشغل دا خليه واتحركي بسرعه ساعه ياخ حتى تجي؟  : اسفه مستر جمال
مشيت من مكتبو زعلانه ومن شدة الارهاق رجولي ماتو ووقعت في الأرض تاني ما قدرت اقوم اتصلت بهاله
مالك يا بنت  : تعالي طلعيني لبرا انا ما قادره حاسه اني بنزف  : يا بنت قولي بسم الله نزيف شنو  : والله العظيم اطلبي لي ترحال برضو
هاله جاتني جاريه ساعدتني وجابت لي العربيه
خليني اجي معاك  : لالا انا كويسه مرهقه بس
مشيت البيت رقدت ونمت جمال مشى لاياد متضايق
البنت دي انا زهجت منها خلاص ما بتعرف تظبط حاجه وبقت بطيئه في الحركه اسي طلبت منها تعيد الشغل مشت وتاني ما جات   : سمر قصدك؟  : ايوا في غيرا؟ انا ح اضطر افصلا  : لا خليها بتكون تعبانه من الحمل  : وانا ذنبي شنو معاها  : خلاص انا بناديها وبفهما براحه  : ما تتعب نفسك مشت البيت حتى بدون ما تخلص شغلا او حتى تستأذن  : المفروض تطلب اذن
يتبع