علاقات مشبوهة

علاقات مشبوهة 12

#علاقات_مشبوهة
#بقلمي  : #مشاعر_مبعثره
الجزء الأول
الفصل الثالث (الوجه الأخر)
الحلقه (12)
ما تميت خمسه دقائق حسيت بطمام مشيت الحمام استفرغت الفي بطني كلو تلفوني كان برن عاينت لقيتو إياد ابيت ارد له وهاله برضو اتصلت بي انا كنت مرعوبه شديد من الحصل لي دا عرفت ليه مناسك بتخاف منو كدا واحد خطير ومسلح كمان وشكلو كدا شغال في الممنوعات انا ما قدرت انوم بسهوله وصحيت تعبانه مشيت الشغل متأخره لقيت إياد جاء خفت يشاكلني عملت له القهوه ومشيت باستعجال شايلاها انكشحت مني قعدت اعتزر له انا اسفه اسي بنضفا واعمل لك واحده تانيه : انتي مالك الليله اهدي شويه  : ما انتبهت  : وجيتي متأخره كمان  : اسفه  : طيب تعالي مشيت وقفت قدامو قال لي اقعدي
اها امس مالك مشيتي من غير ما تكلمي زول سألت عنك هاله قالت ما عارفاك وين وفتشتك في اي مكان ما لقيتك  : الزمن اتأخر وما حبيت ازعج زول عشان كدا مشيت  : تقومي تطلعي براك بليل دا تاني ما تكرريها  : حاضر  : اها في شنو تاني ليه اتأخرتي وما رديتي على تلفوني وما مركزه من الصباح  : تعبت من السهر  : انا ما حاضغط عليك بس......... قام من محلو وجاء وقف قدامي وكمل كلامو لو في حاجه انا مستعد اسمعك ومسك يدي الاتنين الباب دقا انا طوالي سحبتهم وقمت من الكرسي جاء داخل جمال وبعاين لي ساااي كان عاوز يتكلم معاه بس إياد اختصرو وقال له شغالين بعد طلع قال لي اقفلي الباب وتعالي قفلتو وقعدنا نتونس وانا عاوزاه بأي طريقه يضمني لفريق التصميم قال لي انا ممكن اساعدك بس في حاجه لازم تعرفيها انتي حاتتعاملي مع أمجد مباشرة  : امجد؟  : ايوا لانو دا اختصاصو هو بكون رئيس القسم دا واي شغل تشتغليه لازم يمر عليه انتي مستعده تتواجهي معاه؟   :  ايوا  : تمام انتي قويه وبتقدري يلا عندنا شغل كتير الليله وعاوزك تساعديني  :  اكيد طبعا  :  وحاياخد زمن فطورك  : ما عندي مانع قعدنا نشتغل لزمن الفطور وطلب لي معاه اكل اكلو كلو نواشف وسلطات
يا بنت انتي مالك ما بتاكلي عامله رجيم ولا شنو  : هو الاكل دا كلو دايت قعد يضحك قال لي ايوااا فهمت شكلو الاكل ما عجبك  : لا ما كدا  : طيب انتي عاوزه شنو خليني اطلب لك البتحبيه بيرغر؟؟   : لو حاتاكل معاي  : انا ما بحب اللحوم دي  : نباتي  :  هههه لا بس ما بحب اللحوم الحمراء  :  طيب نجيب بالفراخ  : لالا حاطلب لك انتي انا ما عاوز  : حيرتني معاك انت قول نباتي وخلاص مافي حاجه بتخجل  : والله ما نباتي بس بحب الاكل ينطبخ بطريقه معينه ما تشغلي بالك واكلي البتحبيه طلب لي بيرغر اكلنا وعملت القهوه اليوم كلو شغالين لحدي بليل طبعا شعري عشان كويتو للحفله بقى ناعم شديد الباندا ما بتثبتو وكل شويه الطرحه تقع كنت بكتب على اللابتوب وهو بمليني وانا عشان ما أقيف بس بحرك راسي عشان الشعر ما يجيني في وشي وهو مشغل المكيف بقوه كالعاده واغنيتو زحمة خواطر انا زهجت من كترة الحركه وقلت احسن اضفرو قبل ارفع يدي حسيت بيدو في وشي لمن انخلعت بقى يلمو لي لورا
مستر إياد  : كملي شغلك عشان ما نتأخر  : بس : انا برفعو لك هو كان بس بحركو بيدو زي البلعب به ويقربو لوشو قلت له طرحتي وقعت شداه بيدو لمن وجعني قربت اصرخ قال لي حقيقي يعني : انت فاكر شنو يعني بتتأكد؟ : شعرك دا عامل لينا ازعاج اعمل فيه شنو اسي : احسن اقصو صح  : ما اظن عندك الجراءة شال الباندا من الارض رفعو لي فوق ولسه واقف ما عارفه خلصنا متين بس كل شويه بمشي بعمل قهوه كنت نعسانه شديد وفرحت لمن خلصنا قربت انط وهو جاء حضني وهو بقول واخيرا زحيت منو قال لي أسف كنت مبسوط بس  : عادي ولا يهمك الحمدلله انو خلصنا قربت انوم في الكرسي  : باقي ساعات من الصباح ما بقدر امشي البيت واجي تاني راجع  : بس بكرا في شغل بدري  : ما دي المشكله هنا الا انوم في المكتب  : بس كيف تنوم في الكرسي  : انتي حاتمشي؟  : ايوا  : الزمن اتأخر ما حاتلقي مواصلات معناها لازم اوصلك : مافي داعي بتصرف : بس انت تعبان هو انت كسلت تمشي بيتك تقوم توصلني انا لالا كدا انا ما بقبل هو كان بقفل في المكتب قال لي وانا ما بقدر اخليك براك اها الحل شنو تعزميني ابيت عندك؟ قلعت عيوني وقلت له ع عندي وين في البيت قصدك؟  : ايوا مش انتي قاعده براك؟ المشكله شنو  : ااانا اسفه يا مستر بس بس انا ما توقعت تطل........  : تمام اسف يلا خليني اوصلك  : انا قصدي........ : فاهم قصدك يلا خليني اوصلك وامشي البيت انا زاتي
هو كان بستدرجني بالواضح ومن البدايه بس انا ما ختيت فيها حاجه حسيتو نسخه من امجد بالتصرفات دي وكمان زعل مني وصلني البيت في صمت وانا اتضايقت بس برضو ما بقدر اعمل له الهو عاوزو دا كيف يعني يبيت معاي انا ما كدا انا غلطت قبل كدا في علاقتي بأمجد وإياد انا شايفاه انسان نضيف ما عاوزاه يختني في القائمه السوداء وصلني ومشى بليل حسيت بحركه ما طبيعيه في البيت واصوات خوفتني اول زول فكرت فيه إياد اتصلت به ما رد علي تاني اتصلت فصلني وقفل تلفونو انا أيقنت انو زعل مني حتى في اليوم التاني اتعامل معاي برسميه بقى جامد معاي وانا ما عارفه اتصرف كيف يعني كانو بقول لي يا تجيني كدا او ننفصل انا ما فاهمه ليه كل الرجال فكرو فيني بالطريقه القزره دي ومافي واحد فيهم عاوزني لقدام كبير على صغير عاوز جسمي بس وبالحرام كمان انا قربت اجن بعد اسبوع أياد وداني لمكتب امجد وفهمني طبيعة الشغل قال له امجد انا عارف انو في بينكم مشاكل بس سمر حاليا سكرتيرتي بتمنى ما تزعجا انا ما مطالبكم بانو تحبو بعض بس على الاقل ما تعملو مشاكل وتخربو الشغل امجد قال له انا عارف شغلي كويس انت فهم سكرتيرتك انو لازم تسمع الكلام لو حابه تستمر إياد عاين لي وقال انا حأخليكم تتفاهمو مع بعض انا طبعا اتوقعت إياد يدافع عني قدامو ويتوصى فيني بس لا خلاني فريسه لامجد اول ما هو طلع امجد قال لي
انا عارف انتي جيتي لشنو يا سمر وهدفك دا ما حايتحقق الا لو انا عاوز عشان كدا ما تتعبي نفسك : انت فاكرني طلبت الشغل دا عشان اتقرب منك؟  انت بالجد ما معقول بالجد فظيعه الانا العندك انا عاوزه اشتغل وبس لو سمحت بدون مشاكل انا من جيت هنا حصل قربت منك ولا اتكلمت معاك لا طبعا انت البطل تزعجني مدام ما عندك حاجه لي : ماشي يا سمر اشتغلي بس لازم تعرفي انو اي حاجه تعمليها لازم تمر علي انا اول مفهوم؟  : مفهوم  : شايفك بقيتي تسمعي الكلام يلا امشي على شغلك
مشيت المكتب لقيت أياد قافل الباب اتصلت به قال لي معاي ضيوف ما تدخلي لي زول بعد شويه اتصل قال لي اعملي كبايتين قهوه لمن دخلت لقيت معاه نفس البنت الفي الحفله لابسه بنطلون كبير وكاب مغطي نص وشها ولا مديه اهمية لوجودي عاينت له قال لي شكرا ممكن تمشي
طلعت زعلانه مشيت لهاله قلت لها ما شفتي البنت دي : ياتو بنت : لقيتا في مكتب إياد التافهه قاعده معاه وقافلين عليهم الباب طلع ذي باقي الرجال نسونجي : انتي بتحبيه بالجد يعني يا سمر؟ اوعك تتعلقي انا من الاول حزرتك : مافي شي بيننا اصلا بس البنت دي مستفزه اتجاوزتني مش المفروض تاخد اذن قبل تدخل له ويوم الحفله برضو كانت مطرفه معاه : ايوااا انتي قصدك منى؟؟ : منى منو؟ : بنت عمو
انا طوالي طلعت اليوم داك بدون ما أرجع له ولا أفكر في شي عاوزه اطق مشيت البيت لقيت امي قاعده اول ما دخلت لمت فيني شكل سلام ما سلمت علي
انتي يا بنت يعني ما بتعرفي تقعدي ساي بأدبك لازم تجيبي لينا الكلام؟  : خير سمعتي عني شنو  : الناس كلها في سيرتك من حضن راجل لراجل  : امي انا ما بسمح لك تتكلمي عني بالطريقه دي شفتي فيني شنو  : اهل امجد واهل مديرك إياد ما عندهم سيره غيرك انا اجتمعت معاهم ما خلو كلمه ما قالوها فيك يوم الحفله  : خليهم يقولو اخر همي دخلت المطبخ لحقتني وقالت لي شاكر شافك في الحفله بترقصي مع ولدو واتضايق منك والنصري ما قصر قال له البنت دي ما محترمه كانت على علاقه مع امجد ولدي ومقضياها فنادق وشقق ولمن قنع منها ورماها رسمت على إياد اعملو حسابكم منها وقال لشاكر خلي ولدك يبعد منها حتى هبه وجمال اتكلمو فيك كل الناس يا سمر قرفانين منك : وانتي طبعا واقفه في صفهم ما خلاص بقيتي من العائلات المرموقه يا امي اقول لك حاجه طنشي واعملي نفسك ما سامعه  : انا ام يا بنت وقلبي عليك ما بقدر اشوفك في وضع ذي دا واخليك ساي ما تغلطي تاني وتجيبي لنفسك الهواء ابعدي من الولد دا عاوزه به شنو دا واحد متزوج  : متزوج؟  : ما عارفه يعني عاقد على بنت عمو منى ختيت يدي في صدري وقلت اخت مناسك؟؟ في اللحظه دي اتزكرتها البنت دي انا شفتها في بيتهم لمن مشيت لخالتو هبه اول مره قلت لها عقد عليها متين؟؟  : من زماان فما تحلمي انو يسيب بنت عمو عشانك بنت حلوه وصغيره وكلها طاقه يداب بتقرا في الجامعه انتي بالنسبه لها جقه يا سمر وبايره  : م بهمني انا اصلا ما عندي علاقه به علاقه امشي مشيك ما تتاخري على اولادك كنت ماشه الغرفه عشان ابكي لحقتني قالت لي يا بنتي انا ما عاوزاك تندمي بعدين خليه انتي الف راجل غيرو بتمناك الدنيا ما وقفت عليه ذي ما طلعتي امجد من قلبك طلعيه هو  : امجد ما كان في قلبي اصلا داك كان عبث انتي ساهل عليك الكلام دا لانك بسهوله انفصلتي عن ابوي واتزوجتي وعايشه مرتاحه بس انا ما زيك قعدت ابكي حضنتني قلت لها يا امي ما تعملي حنينه علي امشي اقعدي مع اولاد راجلك الفضلتيهم علي حتى في غياب ابوهم  : انتي عرفتي من وين : عرفت وخلاص  : انا مضطره يا سمر الاولاد صغار اهل امهم  ما شغالين بهم غير كدا يا سمر نحن حاليا قاعدين في بيت شاكر البيت هناك ما امان كم مره بجونا حراميه قاصدننا عديل  : يا سلام ومافي مكان تاني تمشو له الا بيت إياد صح؟ ما كان تجيبيهم هنا  : رفض الصديق شغال معاه وهو السفرو للشغل دا يعني قاعد يحمينا في غيابو لو جبتهم هنا ما بكون عملت حاجه اسي لو ما هبلك العاملاه مع ولدو دا كان سمح لك تجي تعيشي معانا   : على اساس انا مموتا عليكم في بيتكم ما بقعد خلي بيت الراجل دا انا عاوزه انوم امشي خلاص  : الليله عاوزه انوم معاك مشيت منها استحميت ورقدت وهي مشت المطبخ تعمل لي اكل إياد اتصل بي فصلتو قام رسل لي ريكوورد انتي مشيتي وين من غير ما تستأذني رجعت له لقيتو زعلان قلت له انا رجعت البيت تعبانه  : انتي فاكراه لعب تمشي وتجي على كيفك؟ والبشتغل لك منو يعني؟ انا اشتغل شغلك؟ السلوك دا ممنوع يتكرر تاني  : خلاص تمام انا جايه وتاني ما بطلع الا بعد انت تمشي : انتبهي لكلامك وما تردي اصلا تاني تجي لشنو بكرا لمن اجي لازم القى الشغل بتاع اليوم خلص انتي فاهمه؟ : فاهمه قفل فيني وانا من الغيظ غلبني اعمل شنو قعدت ابكي امي جات رقدت وعملت نفسي نايمه
يتبع