علاقات مشبوهة

علاقات مشبوهة 18

#علاقات_مشبوهة
#بقلمي  : #مشاعر_مبعثره
الجزء الأول
الفصل الرابع  (الحرب الباردة)
الحلقه(18)
إياد دا الخلعه ظهرت في وشو قالت له دي منو يا إياد قال لها تعالي افهمك  : تفهمني شنو يوم عرسنا واقف تتونس مع البنت دي يعني كلام امجد القالو لي عنك صح انت عامل علاقه مع واحده غيري مش دي ياها البنت التافهة الاسما سمر بنت كوثر صح؟؟ قلت لها احترمي نفسك انا ما بسمح لك تزليني قالت لي انتي بتنكلمي معاي انا؟ وعن عن الاحترام كمان؟  : انا محترمه غصبا عنك إياد قال لي كفى ما أسمع صوتك واياك تتجاوزي الحدود مع زوجتي يلا امشي من هنا قبل ما اخليهم يطلعوك برا ومشى لحق منى الكانت جاريه لجوا وخلاني واقفه براي ندمت على السبب الخلاني اطاوع امجد وارخص نفسي بالجيه لهنا عشان يزلوني وينزلو من قيمتي اكتر مشيت البيت بسرعه وقعدت ابكي تاني امي جاتني قالت لي اسكتي ما اسمع صوتك دا عاوزه تبكي لمنو ما دا الزرعتيه يلا احصدي فاكراه حايعرسك بعد لفيتي معاه؟؟ ما تعملي نفسك مكسوره وغيرانه من مرتو  : يا امي خليني في حالي  : انا لمن خليتك في حالك مشيتي صعتي مع الاولاد وضيعتي شرفك : انا ما عملت حاجة ذي دي يا امي والله العظيم مافي زول وصل معاي للمراحل دي انا لسه بنت والله العظيم ما فرطت في شرفي : بس هم قالو شافوك معاه  : ما حصل شي صدقيني يا امي قعدت ابكي قالت لي تاني ما بخليك تقعدي براك في البيت دا ولا دقيقه  : وانا ما حأمشي اسكن معاك في بيت أياد : اطمني ابوه اخر حاجه عاوز يشوفا في الدنيا وشك هو الما قبل  : لكن متقبل ولدو وداعمو كمان حملتوني كل المسؤوليه براي  : انتي بنت وغير سمعتك دي ما عندك حاجه اما هو ما فارق معاه اعتبرك نزوه وعدت انتي عارفه ابوك لو عرف بعمل فيك شنو ابوك العامله نفسك طالعه له قعدت ابكي قالت لي دموعك دي ما بتحلك ما بتجيب حاجه من الانتي ضيعتيه انتي حاليا بدون شغل وبدون سند ولا في راجل بعاين لك حتى ثقتي فيك فقدتيها يا سمر ناويه تعملي شنو  : اعملي البتشوفيه انتي انتصرتي خلاص قدرتي علي في النهايه مشيت مشيت غرفتي كالعاده وبقيت ما مهتمه بأي شي يحصل اتسلبت ارادتي واي حاجه تتقرر عني انا اكيد حا أعملا في الفتره دي اكتشفت اني اتخليت عن حاجات كتيره بعدت عن ناس كانو محور حياتي ابوي وعلياء وغلا ما كان يومي بكمل بدون ما اتكلم معاهم بس حاليا بقعد ايام ما برسل لهم ولا حتى رساله ومستعده القى المكالمه اطنشا الحاجات الدخيله دي اخدت وقتي كله اتصلت بأبوي كان قلقان علي وشكلو ما عارف حاجه وعلياء برضو وعلاء الدين وغلا قربت ابكي في التلفون امي جابت اولاد راجلا وقعدت معاي انا ما كنت بقعد معاهم اصلا ولا كونت معاهم علاقه كانو بسموني الانطوائيه امي بتبزل مجهود معاهم اكتر من اللازم يعني بقت لهم ام انا ما كانت بتعمل معاي كدا ولا بفرق معاها حتى الان قعدت معاهم ما قعدت اكلت نمت صحيت أخر همها انا اعلنت علي الحرب هي التانيه وبتضرب بي المثل لهم اعمل كدا وما تبقى ذي سمر كرهت حياتي شديد وبقيت بفتش خيط نجاة لمن قلت لها عاوزه اشتغل قالت لي عاوزه تفتحي لينا ابواب جديده وتورطينا في قصصك وعلاقاتك الوسخانه انا طوالي لغيت الفكره من غير ما أرد شخصيتي اتبدلت تماما
سمر يا بنتي انا ما عاجبني وضعك دا رايك شنو تجيني  : انا زاتي فكرت في الشي دا بس ما حبيت ازعجك  : انتي ما بتزعجيني يا بنتي
وريت امي وشكلا اصلا عارفه وما اعترضت قلت لها انتي كنتي منتظره الفرصه دي عشان تتخلصي مني صح؟  : اصلا انا الاقترحت عليه يسوقك قاعد مرتاح ولا على بالو ناسي انو عندو مسؤوليات هنا تهد الحيل خليه هو زاتي يشيل معاي : مسؤولياتك الهنا بتكفيك  : انتي غيرانه منهم يعني؟ فاكراهم زيك ولا شنو كنت عاوزه اقول لها ياريتك اهتميتي بي بربع الكيفيه دي بس تاني قلت خساره الاهتمام ما بشحدوه والعاطفه خاصة عاطفة الامومه حتى علياء كانت بتفضلا علي عشان بتسمع كلاما ابوي كان مجهز لي اجرأت الزياره مشيت بسرعه كانت المفاجأة انو اصلا هدفو يعرفني على شاب شغال معاه وعاوزني اتزوجو واستقر معاه هنا وضعو كويس وولد ناس ومحترم  : يعني يا ابوي انتو ما عندكم هم غير تخلصو مني  : عاوزين نطمن عليك ونشوفك مبسوطه انتي ما صغيره والعمر ماشي  : طيب ما فكرت انو انا ما عاوزه حاليا  : ليه الناقصك شنو انتي القدرك اتزوجو وانجبو  : لو من الاول قلت لي ما كان جيت  : ما عشان كدا ما قلت لك سمر حبيبتي انا بعيد وكمان علياء وامك مخلياك براك وقاعده مع راجلا واولادو لو بقيتي في بيتك ومع زوجك بكون مطمن عليك اكتر  : خلاص يا ابوي اعمل البتشوفو  : انا عاوز البتشوفيه انتي  : موافقه  : عايني لو في زول في حياتك أنور بنسحب فورا وانا قبلان بالعاوزاه انتي  : مافي اي زول صدقني  : خلاص هو بكرا عازمك لو فتح معاك الموضوع انتي جاوبيه قولي الحاساه
وفعلا تاني يوم طلعنا عزمني غداء شكلو مقبول اكيد ما بتقارن بإياد وأمجد بس امكن دا مستواي انا اصلا ما ضيعت نفسي الا بالتطلع دا وانخرطت في مجتمع وناس ما بتشبهني هو انبهر شديد مع اني كنت لابسه عبايه عادي وما راسمه خط مكياج واحد هو اتلعثم عديل وغلبو التعبير اما انا ما عارضت لمن فتح الموضوع  بعد رجعنا اتصل بي اظنو شال رقمي من ابوي اتكلم معاي ووضح لي انو جاهز وعندو رغبه نعجل في الموضوع وابوي كلم امي برضو اتصلت قالت لي خلي الموضوع دا يعدي على خير واياك تعملي مشاكل واياك يا سمر تقارنيه بالشباب الكانو في حياتك هو ما حايعيشك نفس الحياة الكنتي راسماها مع أمجد او إياد بس هو البسعدك  : امي لو سمحتي انا موافقه خلاص ما عاوزه مواعظ قفلت منها بس مجرد التفكير في اني اكون مرتو بوجع قلبي ما قادره اتخيلو معاي غصبا عني بقارن ما قادره احس بحاجه معاه هو اصلا ما عندو ربع الاحساس ولا حتى الحماس الكان في علاقاتي الفاتت علاقه تقليديه ما ماليه عيني بس مجبوره اقبل بها علياء عرفت اي حاجه عني من امي وسألتني ما قدرت أكذب عليها ووريتا اني ما حاسه بحاجه تجاه انور قالت لي سمر اوعك تفكري في الحاجات دي انتي اتعودتي على الحرام وغرقتي في الملذات عشان كدا العلاقات البريئه بقت ما بتجذبك وبتشوفيها عاديه  : انا ما كدا يا علياء كلامك دا انتي عارفه معناه شنو؟ اني واحده وضيعه  : انتي العملتي في نفسك كدا لازم اي راجل ترتبطي به تخليه يلمسك ناسيه انو دا غلط وحرام لازم تعجلو في موضوع العرس دا قبل ما خيالك ياخدك لمكان ابعد  : انا ما عملت كدا برضاي ليه ما عاوزه تفهمي انا كنت بطاوعو عشان ما ينفصل عني وقعدت ابكي قالت لي انا اسفه كلامي قاسي بس انتي يا سمر غلطتي الواحده لازم يكون عندها كرامه وكبرياء يعني انتي حاجه ساهله كدا عشان اي ولد يحصل عليك من غير مجهود بس عشان ما يزعل منك ويسيبك تسلميه نفسك ما هدا في النهايه خلاك  : انا اقتنعت خلاص بس بفصفض
بقيت متواصله مع أنور وقال حايرسل اهلو اول ما نرجع كانت الامور ماشه تمام بس فجاءة بقيت أحس بألام حاده في بطني والبريود ما جاتني دخلت في حالة شك عجيبه بس لا ما ممكن يكون البفكر فيه دا حقيقي ما حصل شي بيني وبين امجد وإياد اكد لي انو اليوم داك ما لمسني غير كدا ما حصلت ابوي لاحظ للتغير الحاصل دا وقدر ما سألتني ما وريتو الالم بقى زايد وعليه دوخه ابوي قال لي بتكوني عيانه وعاوز يوديني المستشفى قلت له بجيب حبوب من الصيدليه وابقى كويسه مشيت الصيدليه اشتريت كاشف حمل وعملت التحليل طلع ايجابي قربت اجن قعدت ابكي اليوم كله ولمن ابوي جاء من الشغل قلت له راجعه السودان هو زاتو استغرب واصريت شديد انو امشي بكرا بس قال لي ما بلقى لك حجز انتي مالك ماشه في حاجه  : عاوزه ارجع وخلاص هو احتار واضطر يرجعني في الطياره حصل معاي نزيف ما عرفت اعمل شنو دخلت الحمام غيرت ملابسي كنت لسه حاسه به مشيت المستشفى اول ما نزلت من الطياره وما وريت امي الدكتور شهود عديل لمن كشف علي قربت تجيه صدمه اتأثر تأثر واضح قال لي انتي ما متزوجه صح؟ نزلت راسي قال لي عشان كدا جايه براك في الحاله دي وبدون علم أهلك ما عارف بتعملو في نفسكم وفي اهلكم كدا ليه جيبي لي زول من اهلك انا ما بقدر اتحمل المسؤوليه دي اترجيتو عديل وحلفت له انو ما حصلت علاقه كامله قال لي ما بالضروره عادي ممكن يحصل كمل وانتي عارفه اساس الحمل شنو دي خطورة العلاقات الخاطئه البلجئو لها معظم البنات وفي فهمهم انو الواحده كدا عايشه حيانا على راحتا ومحافظه على شرفا في نفس الوقت ناسين خطورة العلاقه دي الشرف ما معناه انك تكوني عزراء لا الشرف يعني انتي ما عملتي اي علاقه ولا في راجل لمسك ولا حتى اختلى بك دا المفهوم الحقيقي
انا ندمت اشد الندم كل مره بتعاقب بطريقه اقسى على اغلاطي وما قادره اتوب ربنا اراد لي انو احمل بالطريقه دي عشان ينبهني ويفوقني من غفلتي الدكتور قال لي كلمي اهلك افضل لك انا ما بقدر اعمل اي اجراء معاك لاني بكون نهيت عزريتك لازم تجيبي ولي امرك دي مسؤوليه كبيرة ما تحاولي تخبي لانو الموضوع حاينكشف براه الحمل دا خارج الرحم وقاعد ينزل حاتفضلي تنزفي كدا شويه شويه وحاتتألمي الم امكن ما تقدري تتحمليه التقلصات القاعده تحسي بها دي حاتذيد  : انا بتحمل اي الم لو ما حياثر على عل.........  : مافي اي ضمانات انتي عارفه انو في جنين حاينزل حتى لو كان كتل صغيره برضو انا ما بقدر اأكد لك حاجه من غير فحص بعد الإجهاض كتبت لك تقرير بإنك حملتي وانتي عزراء امكن يدعم موقفك قدام اهلك شلت الورق وقلت له بجي المره الجايه مع أهلي كذبت عشان اتفكفك منو ختيت الورق في شنطتي ومشيت البيت امي طبعا ما كانت قاعده اتصلت بأبوي طمنتو ورقدت قبل انوم بدت رحلة الالم والنزيف بقيت ما بقدر حتى امشي على رجولي وبحبى للحمام من شدة الألم وبصرخ بأعلى صوت ملابسي اتوسخت قلعتها وقعدت كدا بس قريبه للحمام لمن النزيف وقف استحميت وغيرت ورقدت نمت وصحيت بنفس الألم تعبت منو شديد ومن الوضع الانا فيه اكتئبت عديل وما قدرت اتحمل ولا دخلت حاجه لبطني لمن جاني هبوط انور اتصل بي قلت له البيننا انتهى هو ما كان مستوعب شي وبستفسر لمن زهجت منو قلت له ما بحس بحاجه تجاهك وانا ما بستحقك قفلت على كدا والتلفون زاتو قفلتو هو طوالي اتصل بأبوي وابوي اتصل في تلفوني لقاه مقفول قام اتصل بأمي وهي ما كانت عارفاني جيت اصلا ولمن قال لها رفضت أنور غضبت مني غصب شديد والشكوك دخلت راسا خاصة انو إياد كان جاي من شهر العسل وانا قاعده في البيت براي خلاص ختت في بالا انو قاعد يجيني انا فجاءة الالم حاصرني وما عرفت اعمل شنو نزفت شديد طلعت من الحمام لقيت انو رجولي ما شايلاني وصلت الغرفه حبيان وبفتش في حاجه تسكن لي الألم لقيت حبوب بلعت منهم من دون مويه الحبه الاولى والتانيه ما عملت لي شي شلت كم واحده بلعتهم دفعه واحده لمن استفرغت وتاني ما حسيت بشي
يتبع