ငါကဗီလိန်ရဲ့ပါးပါး

Chapter 17

Chapter 17

ကျိယွီရှောင် တစ်ဖက်လူက ဖုန်းချသွားသည်ကို‌ မြင်သောအခါ တစ်နေ့လုံး မသက်မသာဖြစ်နေ‌သည့် စိတ်ခံစားချက်က ပြောင်းလဲသွားပြီး ပျော်ရွှင်စွာ ရယ်မောလိုက်သည်။

သူ လင်းလော့ချင်းကို ဗီဒီယိုကောလ်များ ထပ်ခေါ်ခဲ့သော်လည်း လင်းလော့ချင်းက မတုံ့မဆိုင်း ငြင်းပယ်ခဲ့လေသည်။

ကျိယွီရှောင် : [ဒါဘာလုပ်တာလဲ...မင်း နှစ်တွေအကြာကြီး ကြိုက်ခဲ့တဲ့ မင်းရဲ့နတ်ဘုရားက မင်းကို ဗီဒီယိုကောလ် ခေါ်နေတာလေ...မင်းတကယ် မကိုင်ဘူးလား...]

ကျိယွီရှောင် : [ချပစ်တာ နှစ်ခါရှိပြီနော်..]

လင်းလော့ချင်း :"..."

'ကျိယွီရှောင်က တကယ် နတ်ဘုရား ဖြစ်ချင်နေတာလား...

လင်းလော့ချင်း : [တချို့ခံစားချက်တွေက တိတ်တခိုးဖြစ်‌ရတာ ပိုကောင်းတယ်လို့ ငါ ခံစားရတယ်...]

ကျိယွီရှောင် မျက်ခုံးကို ပင့်လိုက်၏။

[အဲ့လိုလား...]

လင်းလော့ချင်း : [ငါချစ်တာက ငါ့ရဲ့စိတ်ကူးထဲက မင်းကိုဖြစ်နိုင်တယ်...တကယ် အပြင်က မင်းကို မဟုတ်လောက်ဘူး...]

ကျိယွီရှောင် : [အဲ့လို‌ဆို မင်း ထိန်းမရသိမ်းမရ ပျော်၀င်နေတာက ငါ့ရဲ့ စိတ်၀င်စားဖို့ကောင်းတဲ့ စိတ်ဝိညာဉ်မ‌ဟုတ်ဘဲ ငါ့ရဲ့ကြီးကျယ်ခန့်ညားတဲ့ သွင်ပြင်လက္ခဏာလား...]

လင်းလော့ချင်း :!!!

မင်း အဲ့လိုပြောတာ မရှက်ဘူးလား...

မင်းမှာ စိတ်၀င်စားဖို့ကောင်းတဲ့ စိတ်ဝိညာဉ်ရှိတယ်တဲ့လား...

မင်းက ငါ့ရဲ့စိတ်ဝိညာဉ်ကို ဒေါသထွက်အောင် လုပ်နေတာပဲ...

ကျိယွီရှောင် : [ကောင်းပြီ...ဗီဒီယိုကောလ် ထပ်ခေါ်လိုက်မယ်...ဒီတစ်ခါ ကိုင်လိုက်...]

ထို့နောက် ကျိယွီရှောင် ဗီဒီယိုကောလ် ထပ်ခေါ်လိုက်သည်။

လင်းလော့ချင်း ကူရာမဲ့စွာ ကိုင်လိုက်ပြီး ပါးဖောင်းလိုက်ကာ တစ်ဖက်လူကို ကြည့်လိုက်၏။