" غوى بعصيانه قلبي "

٥٦ ج ٢

✨ الفصل السادس والخمسون ✨ ج ٢

فقط في لغة القلوب :
يحتاجُ كل شخصٍ منا
شخصاً واحداً على الأقل
أن يخطي معهُ جميع طرقاتهِ ،وإن يمسكَ يدهُ في كل الطقوس .. وكل فصول السنـة ....

••••••••

-خيـر يا نفادي ، قولولي إنك عايـزني ؟!
قال جملتـه وهو ينزع سترته السوداء ويعلقها على الشماعة الخشبيـة .. عرج نفادي وهو يقترب من مكتبه متألمًا من قدمه :

-تسمح لي أقعد يا بيـه ؟!

رد عاصي بجحود :
-لا .. قول اللي عندك في السريع عشـان مش فاضي ..

هرش نفادي برأسه وهو يستند على ظهر المقعد وقال :
-بصراحة كده أنا كُنت بحور عليك لما قولت لك أننا عايزين قرشين والسلام !!

رفع عاصي حاجبـه باستهزاء:
-ها .. وايه كمان يا نفادي ..

-عدم المؤاخذة يا بيـه ، يعني سيادتك مقامك كبير.. بس التعليمات كانت جايـة من فوق ..

أخذ يلاعب عاصي القلم بيده وقال بهدوء :
-والتعليمات دي بتقول أي ومن مين ؟!

-كانوا عايـزين نبعدوا جنابك عن المكان .. وندخلـوا ناخدوا الهانم بدون شوشرة .. بس هي سهلت علينـا كتيـر بخروجها بره القصـر ..

مط شفتـه بتفكير :
-وتأخدوا الهانم تودوها فين ؟!

-كان في واحد هيستلمها مني في مكان في المقطم وبعدها لا من شاف ولا من دري ..

فسأله عاصي :
-وبعت ليـه اللي مشغلينك يا نفادي وغيرت كلامهم ؟!

عرج نفادي متألمًا :
-يابيـه ده لعب كبار مع بعضيهم ، أما أنا واللي معايا غلابـة .. قلت اطلع بقرشين من سيادتك .. على قرشين منهم وقُضيت المصلحة من غير دم ..

وثب عاصي فجأة فتراجع نفادي بخوف للوراء :
-قلت لي مين هما الكُبار دول يا نفادي ..

-معرفش يابيـه .. اللي كان بيتواصل معانا اسمه حماد ، بس اختفى ومش عارف أوصله تاني ..

كرر عاصي سؤاله بنبرة أشد :
-مين اللي له مصلحة في خطف مراتي يا نفادي !!

-ورحمة أمي يابيه مااعرف .. أنا عبد المأمور ، ولو كنت هعرف كنت هبلغك على طول ..

-طيب يا نفادي وأنا هصدقك .. المطلوب مني أيه !

توسل إليه نفادي بعينيه :
-بلاش موضوع الحكومة ده ، ولو كان على الهانم انا مستعد ابوس راسها ورجليها عشان تسامحني ..

-اتظبط يالا  ..
بصرخة قويـة اندلعت من جوفـه ليضع حدًا لتوسلات نفادي الذي انتفض مذعورًا من نبرة صوته التي تنافس صوت الرعـد .. صمت عاصي للحظـة ثم قال :
-وأنا مش هسلمك يا نفادي ، عشان باين عليك إنك جدع .. بس ده ما يمنعش إنك هتكون تحت عيني لحد ما تسلمني اللي اسمه حماد ..