" غوى بعصيانه قلبي "

الفصل السادس ج ٣

🦋الفصـل السادس🦋

أصعب ما قيل عن التجاوز :
‏"يتحدثون عن التجاوز بسلاسة ثوب يُخلع، فيما هو جِلد يُسلخ لِتكشف عن جرحك ثم تمشي عليه من جديد، لكن هذه المرة مُتقمصًا دور الناجي، لعلك تنجو، ولن تنجو بكلك، سيبقى بعضك وفيًا لحزنك".

-مش مرتاح لك يا نوران ...!! اعترفي .

أردف تميم جملته الأخيرة عندما صعد وراء نوران التي أبرأت ذمتها من كل شيء كبراءة الذئب من دم ابن يعقوب .. وهذا الأمر لم يمر مرور الكرام على دهاء تميم ومعرفته الجيدة لأفكار نوران .. تركت الهاتف من يدها :

-الله يا تميم اعترف بحاجة معملتهاش يعني ؟!

ابتلع تميـم ابتسامته وقال :
-قولتِ أيه لحيـاة خلاها تيجي على ملا وشها كده !

تنهدت بنفاذ صبر :
-ده كان عمل خيري ، أنت ليـه حاططني في موضع اتهام كده !

عض على شفته ثم أتبع :
-أيوة .. ويطلع أيه العمـل الخيري ده !!

ردت بهدوء كأنها لم تفعل شيء:
-يرضيك أشوف حيـة بتلف على راجل متجوز واسكت .. تؤ !! ده حتى يبقى حرام عليـا يا تيمو .

أجابها مسايسًا :
-طيبة قلبك دي هي الـ هتغرقنـا .. هااه وتطلع مين الحية دي ..

دنت منـه هامسة بصوت خفيض كي لا أحد يسمعها وسردت على آذانه ما حدث بالتفصيل الممل ، حتى حتمت حديثها قائلة :

-غلطت أنا كده !!

أجابهـا بنظراته الانتقاميـة التي لا تعي ما ستفعله معها :
-لا خالص ، أنتِ ولعتي الدنيا بس ..

ثم غير نبرته واعظًا :
-وبعدين بدل ما تحذرى عاصي ، روحتي فتنتي لحياة !! أنت ياشيخة منك لله ..

اتسع بؤبؤ عينيها ببراءة :
-أنا دايما في صف المرأة ومناصرة لها لأخر نفس !! ده جزاتي عشان خايفـة عليها لتخطفه منها اللي ما تتسمى دي !!

انفعل تميم قائلًا بتعجبٍ :
-وهو عيل صغير !! أي واحدة تشاورله هيروح لها !!

-دي حركات بنات !! مايقدرش عليها غير البنات اللي زينا .. وأنتوا كرجالة على الله حكايتكم ، سيبنا نحافظ عليكم بطريقتنا ..

ثم زفرت باختناق من التفاوض معه :
-تميم شكلك مش مقتنع .. روح شوف مراتك اللي نايمة غيبوبة دي وسيبني بقا عشان بفكر في حاجة كده ..

حدجها بأعينه العاجزة :
-ما هي الكارثة كلها في انك بتفكري ... عارفة لو مابتفكريش كنت عذرتك .. ربنا يهديكي على دماغك دي اللي مسوحاكي ومسوحانا معاها ..

انكمشت ملامحها المعارضة بعتبٍ :
-كده !! دي جزاتي وأنا بلم وراكم !! هي دي متشكرين يا نوران يا عاقلة !! هو الخير راح فين الزمن ده !!

-أنا همشي قبل ما اتهور وازعلك ..

"~ بالأسفل ...."

-"أدينـا بقينـا لوحدينـا .. اتفضلي اتكلمي يلا ، سامعك ومش هقاطعك .. وبلاش لف ودوران يا حياة .. أنا خلاص مبقتش متحمل الطريقة دي . "