رُزِقتُ بِكَ♥️✨

البارت ٧❤️

أسأل الله لكم ف شهر رمضان حسنات تتكاثر ،، وذنوب تتناثر ،، وهموم تتطاير ،، وأن يجعل بسمتكم سعادة ،، وصمتكم عبادة ،، وخاتمتكم شهادة ،، ورزقكم ف زيادة ،، وبكل زخة مطر وبعدد من حَجَّ واعتمر أدعو الله أن يتقبل صالح العمل.🤍

قبل الفجر أدهم اتسحر مع ليلى وروان ونزل راح المسجد .. خلص صلاة ورجع البيت بعت مسدج لريان ...

أدهم : أنا رايح بكرا القرية ان شاء الله لو هتيجى
ريان رد : الصبح ولا امتى!
أدهم : هصلى الضهر واروح
ريان : خلاص تمام هقابلك ونروح ان شاء الله

أدهم : طب انت لقيت مكان الأول تسكنهم فيه!
ريان : اه وهيبقى كويس ليك وليهم كمان بقى بدل ما تقعد تروحلهم كل فترة وتعطل نفسك هيبقوا جمبك .. العمارة اللى لسا مبنية جديد قدامكوا علطول دى اشترتها وكل عيلة ياخدوا شقة فيها

أدهم : اه كويس .. ماشى نتقابل بكرا بعد الضهر ان شاء الله
ريان : ان شاء الله

قفلوا مع بعض وناموا .. الصبح أدهم صحى كعادته صلى ركعتين وقرأ الأذكار ونزل المسجد صلى الضهر ومشى .. اتقابل هو وريان وراحوا القرية ...

أدهم : أنا هاخد جولة كدا اشوف لو حد محتاج حاجة واللى هروحله هسأله بردو وانت روح لحد تانى .. يعنى نقسم نفسنا عليهم .. ولو دخلت لحد محتاج حاجة ابقى ابعتلى مسدج بس
ريان : تمام

اتفرقوا على بيوت القرية وبدأوا مهمتهم هما ال٢ زى ما اتفقوا .. ف ناس كانت معترضة ورافضة فكرة انها تسيب بيتها بس عرفوا يقنعوهم ان المكان التانى أفضل ليهم والحمد لله كلهم وافقوا .. خلصوا جولتهم ومشوا .. ريان راح شركته وأدهم راح دار التحفيظ وقعد مع الأطفال يحفظهم القرآن ويحكيلهم قصص دينية ...

طفل حوالى ١٢ سنة : هو ممكن اسأل سؤال!
أدهم : أكيد
طفل : هو ابليس عصى ربنا مرة واحدة بس فربنا طرده من رحمته .. لكن البنى آدم لو ارتكب ذنوب كتير واستغفر الله وتاب ربنا بيغفرله وكأنه معملش حاجة ولا ارتكب أى ذنب

أدهم : بص ياحبيبى هى الفكرة مش ف الذنب نفسه .. الفكرة ف اللى بعد الذنب .. يعنى شوف ابليس عمل ايه بعد ما ارتكب الذنب وف المقابل شوف مثلاً سيدنا آدم عليه السلام عمل ايه بعد ما ارتكب الذنب .. يعنى ف القرآن ربنا سبحانه وتعالى بيقول : {وَإِذْ قُلْنَا لِلْمَلَائِكَةِ اسْجُدُوا لِآدَمَ فَسَجَدُوا إِلَّا إِبْلِيسَ أَبَىٰ وَاسْتَكْبَرَ وَكَانَ مِنَ الْكَافِرِينَ} بعدها ربنا سبحانه وتعالى عاقبه علطول؟! .. لا ربنا سبحانه وتعالى سأله وعاتبه قال الله تعالى {قَالَ مَا مَنَعَكَ أَلَّا تَسْجُدَ إِذْ أَمَرْتُكَ ۖ} يعنى ربنا بيقوله مسجدتش ليه لما أمرتك! بيسأله .. رد ابليس كان ايه! كان معارضة واستكبار .. {قَالَ أَنَا خَيْرٌ مِّنْهُ خَلَقْتَنِي مِن نَّارٍ وَخَلَقْتَهُ مِن طِينٍ} بيعارض أمر ربنا سبحانه وتعالى .. ارتكب الذنب وبعد الذنب مش توبة واستغفار لا دا معارضة واستكبار .. ف المقابل بقى تعال شوف سيدنا آدم عليه السلام لما ارتكب الذنب وربنا بردو سبحانه وتعالى معاقبوش علطول .. سأله .. قال تعالى : {أَلَمْ أَنْهَكُمَا عَن تِلْكُمَا الشَّجَرَةِ وَأَقُل لَّكُمَا إِنَّ الشَّيْطَانَ لَكُمَا عَدُوٌّ مُّبِينٌ} كلتوا من الشجرة ليه! مش أنا نهتكوا عن الشجرة! مش أنا قولتلكوا ان الشيطان ليكوا عدو مبين .. بعدها رد سيدنا آدم والسيدة حواء كان ايه! هل قالوا احنا خير الخلق ومن حقنا نعمل اللى احنا عايزينه! طب احنا نسينا .. طب ارتكبنا الذنب وخلاص! .. لا ردهم كان ايه! .. {قَالَا رَبَّنَا ظَلَمْنَا أَنفُسَنَا وَإِن لَّمْ تَغْفِرْ لَنَا وَتَرْحَمْنَا لَنَكُونَنَّ مِنَ الْخَاسِرِينَ} عشان كدا ربنا سبحانه وتعالى ف القرآن الكريم بيقول : {فَتَلَقَّىٰ آدَمُ مِن رَّبِّهِ كَلِمَاتٍ فَتَابَ عَلَيْهِ ۚ إِنَّهُ هُوَ التَّوَّابُ الرَّحِيمُ} طب ليه ربنا سبحانه وتعالى تاب على سيدنا آدم لأن لما سيدنا آدم ارتكب الذنب تاب واستغفر إنما ابليس بعد الذنب عصى وتكبر .. فالفكرة مش ف الذنب نفسه الفكرة ف اللى بعد الذنب .. ف بنى آدم كذلك .. الرسول [ﷺ] قال : "كُلُّ بَنِي آدَمَ خَطَّاءٌ، وخَيْرُ الْخَطَّائِينَ التَّوَّابُونَ" يعنى كلنا بنغلط .. بس بعد ما بنغلط بنعمل ايه! بنتوب .. عشان كدا تلاقى ف مجموع الأدلة ف الأحاديث والقرآن الكريم ان ربنا سبحانه وتعالى مش هيعذب اللى بيستغفر .. هو ربنا مش بيعذبك على الذنب هو بيعذبك ع اللى بعد الذنب .. تُبت واستغفرت ولا عصيت واستكبرت .. فأنت لو تُبت واستغفرت ربنا سبحانه وتعالى يغفرلك .. تلاقى ف القرآن الكريم {وَمَا كَانَ اللَّهُ لِيُعَذِّبَهُمْ وَأَنْتَ فِيهِمْ وَمَا كَانَ اللَّهُ مُعَذِّبَهُمْ وَهُمْ يَسْتَغْفِرُونَ} .. تلاقى ف الحديث القدسى اللى النبى [ﷺ] يرويه عن رب العزة جل وعلا .. ربنا سبحانه وتعالى يقول ف الحديث القدسى : "يا ابن آدم .. إنك ما دعوتنى ورجوتنى غفرت لك ما كان منك ولا أبالى  .. يا ابن آدم .. لو بلغت ذنوبك عنان السماء ثم استغفرتنى غفرت لك ولا أبالى" فاللى بعد الذنب هو اللى بيحدد مش الذنب نفسه .. فهمت ! فهمتوا؟!

الأطفال : اه
أدهم : طب الحمد لله .. كفاية كدا تروحوا ولا تحبوا نتكلم ف حاجة تانية!
الأطفال : احكيلنا قصة كمان وبعدين نمشى😃

أدهم : طيب هحكيلكوا قصة قالهالنا الصحابى عبد الله بن مسعود رضى الله عنه .. ف يوم من الأيام كان الرسول عليه الصلاة والسلام قاعد مع شوية من الصحابة رضوان الله عليهم وكالعادة بدأ الرسول عليه الصلاة والسلام يفكر أصحابه واللى قاعدين بتقوى وذكر الله سبحانه وتعالى وكان الصحابة قاعدين يسمعوه .. ووقت ما الرسول عليه الصلاة والسلام كان بيتكلم قام راجل من وسطهم واستأذن منه انه يمشى فالرسول عليه الصلاة والسلام سمحله واداه الاذن والراجل مشى .. ف واحد من اللى قاعدين معجبوش اللى حصل دا .. اللى هو ازاى حد يسيب مجلس الرسول [ﷺ] ويقوم! وقتها اتكلم وقال عن الراجل اللى مشى دا كلام وحش .. فالرسول عليه الصلاة والسلام قاطعه وهو متضايق وقاله تخلل .. التخلل اللى هو تنضيف الأسنان بخِلة الأسنان عارفينها؟!

الأطفال بتركيز : اه
أدهم كمل : ف الراجل استغرب وقاله بس أنا مكلتش لحم يارسول الله فالرسول عليه الصلاة والسلام رد وقاله : "بل انك بحديثك هذا أكلت لحم أخيك" يعنى بكلامك عنه دا انت تعتبر أكلت لحمه .. فهمتوا ايه بقى من القصة!

الأطفال : ان مينفعش نتكلم عن حد مش موجود أو نقول عن حد كلام وحش
أدهم ابتسم : شاطرين

الأطفال بحماس : قصة كمان😃
أدهم ضحك : 😹خلاص بقى معتش غير نص ساعة ع المغرب وأنا هروح افتح المسجد .. نكمل مرة تانية ان شاء الله

الأطفال هزوا راسهم بالموافقة ومشوا وأدهم قفل الدار وراح المسجد فتحه وشغل إذاعة القرآن الكريم .. عدى الوقت وخلص صلاة ورجع البيت ...

ليلى : ايه يا أدهم كل دا؟!
أدهم : كنت قاعد مع العيال ف الدار والوقت خدنى .. يعنى هما كانوا مبسوطين بالقصص وأنا كمان الصراحة كنت مبسوط بقعدتى معاهم وانهم حابين يسمعوا أكتر

روان : وبالنسبة للأطفال اللى هنا اللى عايزة تسمع هى كمان يعنى!
أدهم ضحك وضمها لي : نحكيلك ياعم ومالو

روان : ما تاخدنى معاك الدار واعتبرنى واحدة منهم عادى مش همانع😃
أدهم ضحك : 😹تعالى ياختى
روان بفرحة : اشطا
قعدوا فطروا مع بعض وخلصوا وقعدوا سوا يدردشوا ...

كدا البارت خلص♥️رأيكوا؟؟!!!....