رُزِقتُ بِكَ♥️✨

البارت ٢٧❤️

أدهم صحى قبل الفجر أكل تمراية وشرب ماية ونزل المسجد صلى الفجر وراح المستشفى .. خلص شغل تقريباً الساعة ١ الضهر وريان رن عليه ...

ريان : روحت من المستشفى ولا لسا؟!
أدهم : لسا مخلص ونازل اهو مروح
ريان : طب ما تيجى

أدهم : لسا بدرى وعندى ميعاد ف دار التحفيظ بعد العصر .. هروح اريح شوية ولما اصلى العصر واخلص هاجى علطول ان شاء الله
ريان : خلاص ماشى

قفلوا مع بعض وأدهم روح نام شوية وصحى قبل العصر خد شاور وغير هدومه ونزل المسجد صلى وبعدين راح دار التحفيظ وقعد والأطفال حواليه بعد ما خلصوا تسميع وحفظ القرآن ...

الأطفال بحماس : احكيلنا قصة
أدهم : صلوا ع النبى
الأطفال : عليه أفضل الصلاة والسلام

أدهم : عن أنس بن مالك رضى الله عنه قال : "رأيت رسول الله وحانت صلاة العصر والتمس الناس الوضوء فلم يجدوه فأتى رسول الله بوضوء فوضع رسول الله يده ف ذلك الإناء فأمر الناس أن يتوضؤوا منه فرأيت الماء ينبع من تحت أصابعه فتوضأ الناس حتى توضؤوا من عند آخرهم" .. يعنى ف يوم شاف رسول الله ﷺ وكان وقت صلاة العصر والناس كانت عايزة تتوضى بس مش لاقيين ماية ف جاب إناء وحط ايده فيه وبدأت الماية تخرج من تحت ايديه والناس اتوضوا

وعن جابر بن عبد الله قال : "عطش الناس يوم الحديبية والنبى بين يديه ركوة (إناء صغير من جلد) يتوضأ فجهش الناس نحوه (اتجمعوا) قال : ما لكم؟ قالوا : ليس عندنا ماء نتوضأ ولا نشرب إلا ما بين يديك فوضع يده ف الركوة فجعل الماء يفور من بين أصابعه كأمثال العيون فشربنا وتوضأنا قلت : كم كنتم؟ قال : لو كنا مائة ألف لكفانا كنا خمس عشرة مائة"
يوم الحديبية الناس كانت عطشانة والنبى ﷺ ف ايده إناء صغير كدا جلد بيتوضى منه ف اتجمع الناس حواليه قالهم مالكوا؟ قالوله معندناش ماية نتوضى ولا نشرب إلا من اللى بين ايديك .. حط ايده ف الإناء الجلد دا وبدأت الماية تفور من بين صوابعه فشربوا واتوضوا

طفل منهم : هو احنا ليه متخلقناش أيام الرسول عليه الصلاة والسلام! يعنى أنا لما بسمع القصص اللى بتحكيهالنا بقول ياريتنى كنت موجود أيام سيدنا محمد ﷺ

أدهم ابتسم بهدوء : حلو انك تكون حاسس بحاجة جميلة زى دى بس متتمناش حاجة ربنا غيّبك عنها أصل ربنا عارف قدراتك .. لو كنا قدها كان خلقنا أيامها سبحانه وتعالى .. ف قصة عظيمة جداً رواها سيدنا المقداد بن الأسود دا من أحد كبار أصحاب سيدنا محمد ﷺ .. سيدنا المقداد بن الأسود مرة كان قاعد ف عدى عليه واحد من التابعين .. جيل التابعين كان قلبه بيتحرَّق شوقاً لرسول الله .. ف التابعى دا قرب .. كان شاب صغير راح لسيدنا المقداد .. قال يامقداد ياسيدى .. هل رأيتم رسول الله فقال أجل .. قال هل رأيتموه بأعينكم .. انتوا شوفتوه كدا عادى! كنتم تكلمونه ويكلمكم فقال أجل يابنى .. قال والله طوبى لهاتين العينين التى رأتا رسول الله .. يابخت عينيك وف رواية انه قام وراح مقبل عينيه .. باس عينيه وقاله وددنا لو رأينا ما رأيت واحنا والله نفسنا ولشهدنا ما شهدت .. والله لو كنا أحياء لما تركنا رسول الله يمشى على الأرض ولحملناه على ظهورنا .. يمشى كدا ع الأرض واحنا عايشين! دا احنا ضهرنا مداس لسيدنا عليه الصلاة والسلام فغضب سيدنا المقداد بن الأسود وقال .. يا أخى لا يتمنين أحدكم مشهداً غيّبه الله عنه .. أفلا تحمدون الله ان خرجتم من بطون أمهاتكم لا تعلمون إلا الله عز وجل وتوحدونه وتصدقون ما جاء به نبيكم .. مش تحمد ربنا انك اتولدت مسلم! انى والله رأيت أناساً رأوا رسول الله وأكبّهم الله على وجوههم ف نار جهنم .. طب ما أبو لهب شاف سيدنا النبى ،، أبو جهل شاف سيدنا النبى ودخلوا جهنم .. فلا يتمنين أحدكم مشهداً غيّبه الله عنه .. عشان كدا يتجلى هنا اسم الله الستير .. ربنا من أسمائه الحسنى الستير .. كلنا عارفين ان ربنا ستير بيستر القبائح لأتخيل ان ربنا يسترك عن نفسك .. ممكن ربنا سبحانه وتعالى يستر عيوبك عنك ف ميخلقكش ف زمن تبان نقائصك فيه .. خلقك ف زمن تبان نقاط قوتك لأنه لو كان خلقك ف زمن سيدنا رسول الله كانت هتبان نقاط ضعفك
الأطفال هزت راسها بتفهم : الحمد لله

خلصوا وخرجوا وأدهم راح لريان وقعدوا مع بعض وروان خرجت من المطبخ ...
روان : يلا ياعسل انت وهو كدا ايديكوا معايا .. واجب المساعدة .. دومى باليز قطع السلطة .. وانت ياريرو يلا نلف السمبوسة

أدهم وريان هزوا راسهم بالموافقة وقعدوا يساعدوا بعض ...
روان : اشتريت الحاجات اللى هتتوزع ع الأطفال!
أدهم : اه لما اروح ان شاء الله ابقى اقعد اظبطهم بقى

روان : نظبطهم 
ريان : أيوا أنا ومراتى حشورين وقررنا مع نفسنا كدا اننا هنروح معاك النهاردة وهنبات معاك كمان

أدهم ضحك : 😹تنورونى والله
ريان وروان بغرور مصطنع : ما احنا عارفين😌

أدهم ضحك وخلص السلطة وقام غسل ايده وقعد يكمل معاهم لف السمبوسة ...
أدهم : امال طنط زينة فين!
ريان : راحت عند خالتى ياخويا🙂قالتلى هى قايلالى بقالها كام يوم ومينفعش اجى دلوقتى واقولها لا

أدهم : يعنى هتفطر وترجع! هتيجى معانا يعنى ولا ايه!
ريان : لا هتفضل هناك وتبقى تيجى الصبح .. هبقى اروح اجيبها بعد الصلاة

خلصوا وقعدوا يقرأوا شوية قرآن وقبل المغرب روان قامت تخلص التحضيرات الأخيرة للفطار .. المغرب أذن وفطروا هما ال٣ على تمر وعصير وصلوا المغرب الأول وبعدين قعدوا يفطروا سوا .. خلصوا ومشوا راحوا مع أدهم البيت وبعد صلاة العشا قعدوا يجهزوا توزيعات العيد ...

ريان : جبت العشرات الجديدة دى كلها منين بالله!🙂
أدهم ضحك : لفيت على فكة ف كل المحلات😹كل ما اروح مكان اقوله عايز فكة بس عشرات جديدة

ريان : حلوة التوزيعات المرادى مغرية .. ١٠ جنيه جديدة ومصاصة وشكولاتة وبالونة! دا ايه الدلع دا؟ لا أنا ليا كيس زيهم مليش دعوة🥺
أدهم : ان شاء الله😹

فضلوا قاعدين يظبطوهم سوا وكانت سهرة لطيفة وسعيدة ليهم .. خلصوا وبعدين طلعوا يناموا شوية قبل صلاة العيد ...

كدا البارت خلص♥️رأيكوا؟؟!!!....