قضية شرف

قضية شرف بارت ١٢

قضية شرف
البارت ١٢
مرتضى الهاشمي
سارة خايفة هاي شنو يا ستار ليش الأضوية تروح وتجي وليش الجرص ميسكت ومنو يضرب الباب هيچي
فراس خل أگوم اشوف
يطلع فراس ويتفاجئ
البارد مال البيت مگطوع وهو السبب الي يصير بإطفاء وتوهج الكهرباء بقوة وفولتية عالية
والواير إلي يوصل للكامرة مگطوع
بس تفاجئ بالكتابة المكتوبة على الحايط
أني بريئة بالصبغ الأحمر
ولما دخل للبيت شاف الكاميرات تفاجأ بمره لابسه عبايه من وصلت يم الكامرة طلعت صورة ملاك ووجهة شاحب ودم على وجهة
سارة هاي شنو فراس گمت أخاف هاي بس لا روحها جاي تنتقم
حجي أحمد منين تنتقم يعني
ساره تتهستر روحو بلغو الشرطة جيبو سيد شيخ طردو روحها من البيت
فراس يعني شگول للشرطة اكو جنية بالبيت إنتي مخبلة
فراس يابا هاي بفعل فاعل لازم نروح نبلغ
حجي أحمد وصورتها إنوب واضحة هاي مو تأكد هي روحها
مهند يابا هذا مكياج وواحد مسوي
حجي أحمد لا مو مكياج هاي روحها ومبين على وجهة
ساره تبلغون الشرطة لا ولله أروح أعوف البيت وأروح لبيت اهلي أني ما ناقصني جنون إنوب بالبيت
فراس باچر من الصبح أروح اقدم بلاغ
ساره وليش الصبح متروح هسه و أخذني وياك عفيه
حجي أحمد وين تروحين ويا للمراكز
ساره اي أروح ويا وما ابقى هنا لوحدي أخاف
حجي أحمد أني اروح إنتي أبقي هنا يله مهند تعال ويايه
لؤي و حياة يصفكون ايدهم سوه ويضحكون
حياة هههههههه شلون طلعت منك هاي الفكرة
لؤي متدرين بيه أحب الاكشن
حياة بس نور ورهف اذا درو راح ميرضون على السوينا لا نخرب الخطة
لؤي لا يرادلها اكشن تصير حلوة ههههه
حياة صدگ لؤي عرفت مكان گبر ملاك
لؤي اي عرفت بس لتگولين لرهف هسه تجي
حياة شلون عرفت ولله ذيب
لؤي أسرار دولة حبيبتي إنتي فاهية متستوعبين أني شلون عرفت
حياة تضربه على صدره
ولك أني فاهية بسيطة أني أعلمك
لؤي صدگ عندي طلب يمچ
حياة گول
لؤي أني معجب برهف وما اريدها تحسبني أخوها ترى اني إبن عمها يا ناس
حياة عزى بعينك ولك هسه وكتها تصارحها متشوف الدنيا محترگة وتريد تاخذثار أختها
لؤي ترى اني مو غبي مثلچ بس أقصد مهدي الطريق سولفيلها عني گليلها لؤي سوى هيچي ولؤي هيچي سويني رامبو فاندام
حياة تعيب عليه
يامبو يايدام ولك هاي قديمة مو مال جيلنا إنت تبقى غبي وأني أعلم بيك
لؤي ولچ إحترمي أني أكبر منچ
حياة ما احترم شسوي يعني
لؤي ولله الصوچ بأبويه ميخليني اربيچ ومطوله لسانچ عليه ولچ أني اختي الصدك إذا تحچي هيچي اكسر سنونها بحلگها
حياة ليش أني مو اختك الصدك
لؤي اختي وحبيبتي بس لسانچ طويل
حياة تشاقه ويا
يبقى طويل وغصبا عليك لتنسى رهف ترى ما اتوسط
لؤي غضب الله على راسچ اتحملچ إذا حاجتك يم الچلب
حياة تكمل
گله لؤي
تضحك وتنهزم لغرفتها وتسد الباب عليها
لؤي إذا إنتي مره فتحي الباب
المحامي يبارك لفهد
الف الف مبروك البرائة
فهد على شنو مبروك گتلك لو ميت احسن لي
المحامي ليس كاره حياتك هيچي
فهد شنو إنت متحس يعني أمي ميته و زوجتي عافتني وخاينتني و إبني طلع مو إبني و أني ما اخلف شتريدني افرح
المحامي مو گتلك اكو اشياء راح تفرحك بس اصبر
فهد شنو إنت متحس شلون افرح صير بمكاني هم تفرح لو إنت ما عندك ٱحساس أصلا
المحامي ما اگدر أوضح هسه بعدين كلشي تعرف و تذكرني بس نصيحة لازم تسافر
فهد شنو اسافر شنو بعد ما خسرت كلشي اسافر مو گتلك أريد أطلع حتى انتقم من مهند ومن رسل
المحامي هسه لازم تتعالج
فهد إنت شبيك هيچي مهتملي حتى أتعاب ما اخذت مني
المحامي مو گتلك الحجية إنطتني قبل لا تموت زايدة مو ناقصة وبعدين هي وصتني بيك و أني إتعاطفت وياك لو حتى هاي متريدها
فهد ما اريد واحد يتعاطف ويايه أريد أموت وإذا تريد تساعدني إدليني بمكان رسل
المحامي ما أگلك إذا ما تتعالج
فهد يعني تندل مكانها
المحامي شبيك وشعندي وياها واندلها بس احاول ادور عليها
حياة تزور گبر وتبچي
الله يرحمچ يا رويحتي وعد مني يا ملاك اثبت برائتچ وأدخل معركة علمودچ لا اخليچ تنامين مرتاحة بگبرچ و أبرد ناري ونار رهف أكيد إنتي تسمعيني وتشوفيني و دمچ بعده حار أني اختچ التوم أني حياة عرفتيني يا حبيبتي اكيد عرفتيني ومنتظرة جيتي أني سامعة الأموات يدرون بكلشي وانتي كلشي عرفتي من متي
تمسح دموعها من عيونها
وتقره قرأن على گبرها و تروح
الضابط طلعنا نجدة عليكم من الفجر وما لگينه شي ولا أي دليل ولا إنتو تاهمين واحد شلون تريد هسه على منو اقبض على بنيه ماتت صارلها اشهر
حجي أحمد يعني شلون سيدي مدورون على إلي سوه هاي الدگه
الضابط إحنا نحقق ومن نشوف دليل واحد ضد شخص نتحرك عليه
بس مال تريدني اقبل تقيم دعوة على مره ميته لو جنية هاي واگفة حجي إذا إنت شاك بواحد گلي
حجي أحمد ما شاك بواحد وما أريد اظلم بشر بس أني شفت ملاك بالصورة وشوفتك الصورة
الضابط لحد الان إلي سواها مجهول من نعرف الله كريم
إعلان على قناة تلفزيون وعلى كل التواصل
مرحبا الإعلامية نور ترجع وياكم برنامج جديد و ملفات ساخنة هاي المرة قضية مو عادية حقيقية وراحت بيها سيدة بريئة ملاك السيدة التي خسرت حياتها من أجل جرم لم تفعله ولم يتحقق منه احد
إنتظرونا مع برنامج قضية شرف
عصام حياة لؤي طلع الإعلان
حياة تباوع على لؤي يعني بدت الخطوة الأولى والجاي عليه
عفيه خايفة ومرتبكة
لؤي من بدايتها خايفة
حياة مو بيدي
لؤي صيري سباعية إنتي گدها
عصام عمو حبيبتي إنتي گدها جيتي لبغداد علمود هذا الشي لا تخافين من البداية
حياة اي عفيه حفزوني أكثر
لؤي لو مو نحفزچ تبقين ثولة
حياة شوفه عمو هذا هو يخليني خايفة وميشجعني
عصام يرزل لؤي ليش لك متستحي بدال ما تشجعها
حياة ورى عمها وترگص شمتانه بلؤي
لؤي اشاقه وياها شبيك يابا شوفها شلون ترگص وتشمت
يندار عليها
حياة تسوي روحها مقهورة بسبب لؤي
مهند شلون يعني يطلع وعلاقته ويه ملاك
حجي أحمد إبني إحنا لازم نعتذر منه ونصالحه الولد طلع ميخلف
مهند كذب أكيد كذب مستحيل ميخلف لعد شلون عنده طفل
حجي أحمد إبني كافي ظلم خليتني اظلم الولد أني لازم اروح اعتذرتله و اشوف منو سوه عملته ويه ملاك و ويه منو خانتك
مهند كافي يابا راح أتخبل كاااافي يومية
تگولون شي و يومية خيانة ملاك ويه واحد ثاني
حجي أحمد الحق حق وإحنا لازم نعتذرله و نعترف بغلطنا
مهند ومنو نشك بي هسه منو سوه هاي العملة القذرة
حجي أحمد كلشي يبين بوكته
ليان ترى سويتها بدون ملح شعندك يومية جاي لبيتي الا يومية أطردك واهينك
سامر بلگوة يحچي لأن سكران
هاي شبيچ فوگ ما اسأل عليچ
ليان إنوب سكران لا ياالله بس لا يجي الحجي يسويلي بلوة ولله
سامر والحجي شعنده جاي هنا
ليان روح لا ولله اخابر أخوية يجي يطيح حظك
سامر خابري عادي هو أني أريد اتعرف عليه وأخطبچ منه
ليان استغفرالله ياربي هاي شلون بلوة هسه شسوي أصيح أعيط
سامر أني جاي اشوفچ إنتي مو وجه نعمه أني رايح بالسيارة
ليان ولي يله ولي
هي إدفعه ويصعد بالسيارة تنصدم بدفتر عالكشن
ليان صاير تقره عشتو
سامر يا أقره هذا دفتر إلي گتلچ بي لهسه ما قاري هو أني مال قرايه بس جاي اذكرچ بي
ليان تاخذ الدفتر وتقره مكتوب عليه مذكراتي
ليان هذا الدفتر يبقى عندي
سامر لا ما أنطي إلا بشرط
ليان شنو شرطك
سامر نسهر سوه
ليان إمشي ولي يا طايح الحظ ولله لا أكول للحجي عليك
سامر ياخذ الدفتر منها ويگللها
زين روحي گولي هذا يمي
ليان تفكر وتحچي ويه نفسها
هسه خل أنطي ليلة وحدة من عمري هذا الدفتر إذا صار بيدي أگدر ألعب بيهم لعب أكيد بي أشياء مهمة وهيچي خايفين عليه
سامر يريد يروح
ليان تصيحه
تعال حبيبي زعلت چنت أشاقة وياك تعال اليوم أحلى ليلة بحياتك
سامر يصفگ هلا يعني اليوم شرب و عربدة و إعتداء على المواطنين
ليان ولك صوتك منا الناس فضحتنا تعال جوه تعال اليوم أسويلك گعدة بالملهى مشايفها
هي تجره وتاخذ منه الدفتر ويدخل للبيت وياها
يتبع البارت ١٣