قضية شرف

قضية شرف بارت ١٥

قضية شرف
بارت ١٥
مرتضى الهاشمي
ساره تباوع على الحجي وعلى سامر وخايفة من تهديد سامر
سامر يباوع عليها بنظرة حقد ويصير ورى الحجي ويأشرلها على رگبته ويمشي أصبعة على رگبته
بمعنى أذبحچ بس تحچين
حجي أحمد يصيح على ساره
متگولين شبيچ شكو شنو صاير بالبيت ليش صياحچ واصل لراس الشارع
ساره تباوع على سامر ودمعتها بعينها وهي خايفه وتگول للحجي
ماكو شي عمو هيچي
حجي أحمد ماكو شي شنو وصوتچ واصل لنص الفرع تحچين لا هسه أرگعكم راس براس  و بشنو راح تفضحي و شنو الي ما راح أصكت عليه
ساره تبچي
عمو راح أكلك كلشي ترى سامر تباوع على سامر وتسكت
حجي أحمد شبي سامر إحچي متحچين ليش خايفة
سامر يباوع على ساره ويگللها
متحچين شبيه شبيچ الله خرسچ
ساره إنت تنچب ولا كلمة
سامر يريد يضربها
حجي أحمد يلزم إيده
ادب سيز متستحي تضرب مرت اخوك إذا إيدك تمدها بعد أكسرها
سامر متشوف لسانها شطوله
حجي أحمد اكيد إنت مأذيها ادري بيك واحد سافل ومنحط ويومية منزل راسنا لا عبالك سوالفك نسيتها أريدك تنعدل بس متنعدل الظاهر لازم تتربى من جديد
سامر هاي بدال متحچي وياها إلها
حجي أحمد لتلغي لغوة زايدة لا أكسر راسك
سامر إذا هي مره خل تگول هي شنو سوت
حجي أحمد متحچين شنو سوالچ
ساره تصيح وتبچي ما اگدر ما أگدر أحچي تعوفهم و تدخل جوه
حجي أحمد يلزم سامر من ياخته ويگله
اليوم متخلص مني شمسوي للبنية تريد توگعنا بمصببة ثانية
سامر إسألها إلمن جاي تعاركني
حجي أحمد تبقى هنا  أروح اسألها وأجي ولله اذا متحارش بالبنية لا أبتلي بيك ويكون اخر يوم بعمرك
يروح حجي أحمد وسامر يصنت ويترقب شنو راح تگله ساره
حجي أحمد يدخل جوه البيت و يسأل ساره شبي وياچ سامر
ساره تحچي بداخلها
شلون ياربي هسه اگله لو اسكت أخاف يسوي شي لشبل دخيلك ياربي شسويله هسه شگله
حجي أحمد متحچين لو تريدين تذبين تهمة براسه وخلص
ساره راح أحچي ولله احچي
سامر يحاول يصنت ويسمع بس ميسمع شي لان همه بداخل البيت وهو يم الباب مال الطرمة بعيد عليهم
ساره عمو سامر ضربني لأن مأخرة الأكل وفشر عليه ويگلي إنتيساقكة مو شريفة أم الولد وتاليتچ مثل ملاك ترضاها هيچي يگول عليه ترضاها كله بسبب الأكل تأخر أني ممجبوة أسمع منه هيچي كلام لا هو زوجي ولا ابو زوجي حتى يعاملني بهيچي طريقة
حجي أحمد حسبيها عليه بنيتي هذا واحد ميستحي ولسانه متبري منه
أني اليوم أعلمه
يروح حجي أحمد على سامر ويصيح بكل صوته
ولك اليوم أشرب من دمك صرت رجال وطلع لسانك مو أني أگول كل المصايب تجي من جوه راسك ولله لا أگول لأخوك عليك
سامر يصيح ويرد على الحجي
شتريدون تسوون سوو أني أصلا طالع من البيت وبعد ما أدخل لهذا البيت
سامر ينهزم ويصعد سيارته
حجي أحمد يلحگ ورى بس ميلحگه
سامر بعد ما تحركت بي السيارة
هاي الحيوانة أكيد گلتله على موضوع المذكرات أني اعلمچ ساره ولله لا اطيح حظچ إلا أشرب من دمچ من صدگ الا اندمچ
هسه اني وين اروح وين أنطي وجهي أني تاليتي انطردت بسببچ يا ساره بسيطة
بعد ما وصلو حياة و لؤي لسيطرة اربيل و صلهم مهند
مهند عيني هاي الإقامة جبتها هسه نتوكل
لؤي حاير و مخبوص
أخي أني راح ارجع لبغداد
مهند ليش الفلوس و حليتها إلك
لؤي لا هسه من فتحت الجنط لگيت تحاليل الحجية مسويها بغداد قبل نسيت اجيبها ويايه ومن غير اكو زرع مسويته لازم أجيب النتيجة مالته نسيته هناك
مهند إعذرني تعبان و ما أگدر أرجعك هسه
لؤي لا ميحتاج ترجعني أني ارجع بس عندي طلب يمك
مهند تفضل گول
لؤي توصل أختي للفندق وراها توديها للمستشفى و تشوفها شتحتاج لتعوفها بين ما اجي عفيه مثل اختك هاي ومطفية متندل ولا تعرف شسوي هنا
مهند تدلل أخوية إنت تؤمر
لؤي ينزل من السيارة تجي رسالة من حياة كاتبله بيها
ولك الأثول أني تگول عليه مطفيه
بس ترجع أطفي عينك
لؤي يضحك هههههه عود اشوفچ شسوين
حياة مو ترجع لبغداد من صدگ تسوي الي إتفقنا عليه
لؤي لا توصين قابل اني مطفي مثلچ
حياة أني أعلمك ولك
رهف تروح وتجي و قلقة
صلاح شبيچ يا بنتي ليش متگعدين صارلچ ساعة تروحين وتجين شكو
رهف بابا گلبي يدگ وخايفة كلش ممرتاحة أحس بالذنب لأن أحس بروحي ورطت حياة
صلاح لتخافين بنتي لؤي سبع و يعرف شلون يصرف وهو خطوة بخطوة ويه حياة
رهف مو بيدي اتمنى اني رحت بمكانها
صلاح بابا إنتي تنكشفين كلهم يعرفوچ بس حياة محد يحس بيها ومحد يتوقع أصلا هي عايشة بنتي گولي يا الله ولا تفاولين على اختچ
رهف مو بيدي بابا
صلاح بنتي راح أگلچ شي تزعلين أو ترضين إنتو تلاثتكم بناتي وحبيباتي وافديكم بعمري وخاصة حياة تعرفين ليش لأن تربت بين إيدي وبحضتي وتعلمت أخاف عليها و ما انام الا اطمن عليها بينما إنتي وملاك بعيدات صحيح ملاك بنتي و احبها بس لتصورين أضحي بحياة لأجل وحدة ميته حتى لو كانت بنتي بس اني متأكد حياة گدها و لؤي سبع مأمن بيها يمه
رهف زين أريد أروح هناك ألحگهم
صلاح لا بنتي أبقي هسه بعيدة عنهم بعدين نشوف شنو التطورات إلي راح يسووها
مهند يسوق وعينه على المرايه يباوع كل شوية على حياة
حياة أخي إنت گلت إسمك مهند
مهند نعم أني مهند
حياة زين أكدر اسألك سؤال وتجاوبني بصراحة
مهند تفضلي ملاك سألي
حياة هو هذا سؤالي ليش تصيحلي ملاك و اول ما شفتني تگلي إنتي ملاك منو ملاك وشنو علاقتها بيه اتمنى ما أزعجك بالسؤال
مهند لا ماكو إزعاج وراح اجاوبچ على السؤال
حياة ياريت كلش تشوقت
مهند ملاك وحدة أحبها أموت بحبها سبحان الله مثلچ كلش حلوة و الكل يحسدني على جمالها
حياة اي و تزوجتها لو عفتها لو أهلها منطوها اشوفك تحچي وإنت متألم
مهند تركتلي جرح چبير بصدري بالرغم ما متألم منها باقي حبها بگلبي و ينبض گلبي بإسمها بس هاي قسمتي كرهت بسببها الحب وكرهت كلشي بحياتي
حياة شنو السبب
مهند أسف ما اگدر اگول أكثر
حياة وأني اسفة سألتك
حياة إطلع نستلة وتاكلها
مهند ليش ضجتي
حياة أني مضجت بالعكس أني اخاف سببتلك إحراج لأن لحيت بسؤالي وياك
مهند لا بالعكس ماكو إحراج بس لتكذبين عليه إنتي ضجتي
حياة شلون عرفت أني ضجت
مهند هم سامعة المثل إلي يگول يخلق من الشبه ٤٠  إنتي من ذولة ال٤٠ إلي يشبهون ملاك أني عرفت بيچ ضجتي لأن ملاك چانت من تضوج و تتعصب تاكل شي حلو كاكاو أو نستلة لو برتقال
حياة تنصدم
مبين عليك هواي تحبها ومتأثر بيها
مهند وصلنا للمستشفى تفضلي تحبين ادخل وياچ لو لوحدچ
حياة لا الجنط ابقيها يمك أشوف ماما وأرجع حتى نروح للفندق توصلني
مهند تمام تفضلي نزلي أني انتظرچ هنا
حياة تدخل للمستشفى
ليان بلهفة اي شنو سويت
سامر عفت البيت وطلعت أني عفت أهلي و كلشي ورايه و ما أعرف هسه شسوي وين اروح الصبح
ليان لتهتم كلشي ينحل
سامر أريد المذكرات اقراها شنو بيها
ليان مرتبكة
اااا بصراحة ما أعرف شگلك
سامر شنو صاير شي شنو تريدين تگليلي
ليان من سويت عملتك السودة وطلعت چنت عصبية شگكتها وحرگتها
سامر بعصبية إنتي مخبلة شلون تشگيها
ليان لتلومني ترى روحي طگت منك شگد چنت متحمسه اقراها بس حرگتها بسببك
سامر أني أسف چنت ناوي اتزوجچ بس الأمور طلعت عن السيطرة بس أني لهسه عند وعدي وياچ
حياة طالعة من المستشفى وتخابر
أگلك حضرت كلشي لو لا
لؤي كلشي جاهز بقى على التنفيذ
حياة مسافة الطريق وأني يمك يله راح اسده باي
حياة توصل للسيارة ومسويه روحها تبچي
مهند خير ليش تبچين أمچ بيها شي
حياة  حضي المصخم أخوية لؤي من راجع صاعد بسيارة وعلى طريق دهوك مسلبي
مهند شودى على دهوك
حياة حظه أبو السيارة ماخذ العبرية و وداهم على طريق دهوك هو ميندل ومسلبي كل. فلوسه وهو هسه شامري بمكان مگطوع
مهند منين خابرچ لعد
حياة صار شاطر وضم التلفون بجواريب الحذاء تكرم
مهند لتخافين هسه إحنا نروح على طريق دهوك واشوفه وينه
حياة راح اتعبك ويايه
مهند لا بالعكس تؤمرين
يطلع على طريق دهوك و يمشون بمكان طريق مابي بناء
حياة تخلي المسدس على راس مهند وتگله
أطبگ لا ولله أفرغ المسدس براسك
للقصة بقيه
يتبع بارت ١٦