قضية شرف

قضية شرف بارت١٧

صباح الورد
ليش التفاعل ضعيف
أريد تفاعلكم حبايب إعجاب وتعليق
تحياتي الكاتب مرتضى الهاشمي
قضية شرف
بارت ١٧
مرتضى الهاشمي
لؤي يلزم حياة
إنتي مخبلة همزين ما مات الولد
حياة وانت شعليك ليش توخر المسدس أني أريد اموته أني أريد اشرب من دمه إلي سوى مو شوية  قليل بي الموت
لؤي بس مو هذا إلي إحنا إتفقنا عليه
حياة أني بكيفي و بمزاجي أخلي الخطط و ما التزم بأي إتفاق
لؤي راح تضعينا بسبب تهورچ
مهند إنطيها المسدس
لؤي متعجب شنو شتگول
مهند إنطيها المسدس خل تكتلني إذا هذا الشي يريحها خل تسوي موتيني ملاك إذا هذا الشي يريحچ و أكفر  بي عن ذنبي كتليتي
لؤي مصدوم شلون انطيها المسدس هاي تسوي جريمة
مهند عادي خل ترتاح خليها إطفي نار گلبها
لؤي إنت معليك حياة لا يستفزچ
حياة تهجم على لؤي وتاخذ المسدس و توجهة على مهند
مهند ضربي ليش صافنة مو قبل شوية ردتي تكتليني ضربي ملاك
حياة الدمعة تنزل من عينها و تشمر المسدس بالگاع
لؤي الحمدلله كافي تلعبين بأعصابنا
مهند أني حافظچ ملاك إنتي متكتلين و عرفت الجرح إلي بگلبچ شگد چبير من رميتي عليه أول مرة اني أسف و أعتذر سامحيني يا ملاك أني مستعد أكتل روحي إذا ما كتلتيني خليني اساعدچ ونعرف منو الكان السبب بحملچ
حياة تتنرفز وتگوم تصيح
بعدييييييييش بعديش هسه جاي تريد تعرف و تساعد  وين چنت قبل وين گلي وين
تضربه بحرگة وتبچي
مهند متغير شي ونگدر نرجع من جديد واخلي إيدي بعين أكبر واحد
حياة هسه تريد تصلح وين چنت قبل انت كسرت شي بعد ميصلح ولازم تموت
ترجع تشيل المسدس
مهند متگدرين
حياة أگدر من اسمع هذا كلامك أگدر كلشي اسوي
لؤي كافي منستفاد من موته حياة إفتهمي
حياة تندار على لؤي وتخزرة لأن غلط وگال إسمها
لؤي يحاول يغطي الغلطة ويصلحها ويگللها
منستفاد من موته يفيدنا وهو على قيد الحياة يعني عايش شبيچ ملاك إفتهمي
حياة شوف لك مهند ممنوع بعد لتجيب طاري الإعتذار والندم هذا الشي ينرفزني
مهند ليش أريد أكفر عن ذنبي اريدچ تسامحيني
حياة بعصبية تحچي ويا وتقترب من وجهة وتخلي عينها بعينه
أني ما اسامحك ولا ذنبك ينغفر و النار إلي بگلبي متبرد ولا تطفى وأني گتلك إلي إنكسر ميصلح والي كسرته مو شي سهل
مهند خليني اساعدچ و اريد أني انتقم بإيدي
حياة ما أريد اسمع منك شي هسه
تعوفه وتطلع بره
الإسعاف والشرطة ملتمين بيت ليان
الإسعاف ياخذون الحجي للمستشفى
الضابط يسأل وائل
وين رايح
وائل للمستشفى ويه الحجي
الضابط اليوم تبات يمنه
وائل ليش أني ممسوي شي
الضابط نريد نعرف منك وناخذ اقوالك
وائل أني گتلك بكلشي اعرفه بعد شتريدون مني
الضابط لا ما گلت كلشي الحجي جاي بيت أختك و إنكتل واختك ماكو شتريد بيمن نشك
وائل شتقصد
الضابط إنت وأختك مستدرجي
وائل لا سيدي لا ولله أني جيت ولگيت الحجي هيچي أني مالي دخل
الضابط يگول للشرطي أخذه وصعده بالسيارة و أخذو للحجز
فهد هسه الأربع شدات حاضرة الله يحفظچ يمه ضامتها بالمكان إلي گتلها عليه
يذكر من حچه ويه أمه
فهد أگلچ يمه هاچ هاي الفلوس ما اريد تجيبين طاري لأحد عليهن ولا حتى لرسل أني اليوم بليل أخذها منچ
ام فهد  يمه شنو هاي الفلوس منيلك كلها دولارات
فهد يمه هاي فلوس الحجي اليوم بليل اوديها لناس هو وصاني اوصلها
ام فهد  صار يمه راح اضمها بالبوفيه بين ملابسي
فهد سكتي يمه جتي رسل ولا تجيبين طاري يمها
ام فهد أني رايحة اضمهة يمه
رسل هاي عمه وين رايحة
أم فهد لغرفتي شوية وجايه
رسل اليوم تروح لسامر
فهد اي بليل
رسل يومية فهد أحس سامر ضرتي متلاحظ صارت بدون ملح هسه لو مزوج وحدة عليه هم يوم اليه ويوم إلها
فهد هذا شغل و طلعتي و جيتي ويه سامر مو بلاش كلها بفلوس متشوفين شگد الحجي ينطيني
رسل الحجي بالنهار يمه وبليل يم سامر وأني شوكت
فهد شغلي ويه الحجي هذا ثابت بس سامر فترة صغيرة وينتهي بس ماشاءالله خير من الله احصل من الحجي بسببه خليها نعمة عليه
رسل أني ما رافسه النعمة بس هم لتسووها بدون ملح
فهد إمشي روحي للغرفة حتى اجي اراضيچ
رسل تبتسم و أمك وإبنك فوك راسنا لو تبقى بليل انطيك كلشي تريد
فهد هانت حبيبتي ولله هانت ما ضل شي  هذا الحجي يخاف على سامر ومخليني ويا أحمي و سامر يومية بالملاهي أني مستفاد من الحجي ومن سامر الحجي ينطيني بين ما تفض سالفة الحجي ويأمن على سامر و سامر ينطيني حتى ما أگول للحجي على روحته للملاهي
رسل وإنت  مستفاد تروح للملاهي ويه سامر
فهد تدرين بيه ما اشرب
رسل هم زين كتلي واگول ليش مكيف شوف فهد تعوف شغل سامر لا ولله ما ابقى بالبيت
فهد اهووو ياريتني ما حاچي
رسل خوش ولله الا أگول لملاك وتحچي ويه عمها
فهد ملاك مدخليها
رسل ولله الا أدخلها واكللها لو تعوف شغل سامر
فهد بعد ما إتذكر
ياريتني سامع كلامچ ومقلل طباتي و طلعاتي عليهم چان متهموني بعلاقة ويه ملاك ولا كل هذا الشي يصير بيه
خل أروح أفتر على العالم وأخذ منهم الأقساط حتى ارجع أمي و مرتي وإبني
تلفون فراس يرن
فراس يرد الووووو .... نعم اني فراس أحمد .....
فراس مصدوم شنوووووو وين يا مستشفى جاي هسه
ساره خير شبيك طفرت شكو
فراس أبوية بالإنعاش وحالته خطرة
ساره عزا العزاچ ساره ليش شبي الحجي
فراس شمدريني شبي إنطيني ملابس خل أبدل وأروح
ساره يا مستشفى
فراس بمدينة الطب
فراس يوصل للمستشفى يشوف شرطي واگف حماية على غرفة الإنعاش إلي بيها الحجي
فراس حجي أحمد هنا
يرد عليه الشرطي
إنت شصير منه
فراس أني إبنه الچبير فراس
الشرطي ابوك تعرض لضربة على راسه
فراس شنوووو ومنو سواها
الشرطي الضابط راح ياخذ اقوالك وكلشي تعرف منه
حنين بت الحجي
(تذكرون من بداية القصة گلت عدهم اخت إسمها حنين بس مجبت طاريها)
حنين مصدومة وتبچي وتجي للبيت
وين بابا أخوتي وين
ساره تحچي بإستفزاز و معاجبها
شعجب جيتي صارلچ هواي مشايفين طولچ بيت ابوچ
حنين إنتي مالچ دخل و تسكتين لا ولله أطلع قهر الله بيچ
ساره مو أني گلت متجين الا بفاتحة أبوچ
حنين لتفاولين على أبوية لا أدفنچ ولله
ساره تدفني عشتو ما ضل عليه غير وصخ رجليه
حنين تصيح عليها ولچ تگليلي أبوية  وين بدون حچي زايد  لا ولله ابتلي بيچ
ساره من خابرتچ گتلچ أبوچ بالمستشفى شنو متسمعين إطرشيتي
حنين لا مطرشيت بس غير أعرف يا مستشفى
ساره بمدينة الطب روحي عليه هناك بس مو تسوين مشكلة هناك ما بينا حيل
حنين ولله ماكو غيرچ حيه والمشاكل من جوه راسچ بس خل يطيب أبوية هالمرة ما اعوفچ  و اكسر راسچ و أگول لمهند منو چان يريد يخرب زواجه من ملاك لو نسيتي شگد نگيتي فوگ راس أبوية
ساره إدافعين على ملاك شنو حبيبتي حنيتي إلها صدگ مو نسيت إنتي وياها متعلمين حياتكم كلها علاقات وحب ورومانسيه حتى من تزوجت معافت علاقاتها وصارت حامل متعرف من منو
حنين إذكروا محاسن موتاكم لو لازم تشهرين بالبنية
ساره أني ما اشهر بالبنية بس هذا الواقع حبيبتي لو نسيتي يا بعد أختچ أكيد الخبر وصلچ مسويه علاقه ويه منو
حنين بإستهزاء
ويا منو بله إذا تعرفي متحچين
ساره تجي يمها وتحچي وياها بإستهزاء
صدمة ما أگلچ ويه منو بس عرفته وإتأكدت منه والمصيبة الدليل يمه وأخذه
حنين أني ما فارغة اسمع تفاهاتچ أروح لأبوية أحسن بلكي يسامحني ويرضى عليه قبل ما يموت
ساره تضحك بإستهزاء
أخذي رجلچ الشفيه و روحي اكيد يريد يسوي نفسه الملاك گدام عمي ويسامحه حتى يرجع يكتب فد شي بإسمچ روحي لحگي
حنين تباوع عليها بحقد
لتجيبين طاري رجلي عباس على لسانچ و هو مغلط تزوجني على سنة الله ورسوله بس هسه مفارغتلچ حسابي وياچ بعدين خل أروح اشوف أبوية وبعدين اتفرغلچ
سامر و ليان شافو مكان بعيد و أمان ليان تندله
يدخلون بيت متروك ليان تفتح القفل مالته
سامر هذا البيت مال منو وشعرفچ بي
ليان هذا بيت أمي الله يرحمها من ماتت بعد محد إجه بي لا أني ولا وائل
سامر وين رحتو بوكتها
ليان رحنا لبغداد وإتعرفت على أبوك وشغلني بوكتها بالشركة
سامر شعجب شغلچ
ليان چنت مسوية حساب عالتيك توك وعندي متابعين ابوك إستغلها و إتفقنا انشر على شركتكم وسوينا عروض وهدايا وبعدين أشتغلت و لزمني الشركة
سامر هاااا حلو
ليان كافي أسئلة خل انخمد
سامر وين راح تنخمدين
ليان إحچي عدل
تدخل للغرفة وإطلع مخدة وبطانية وتگله
هاك نام هنا وأني أنام جوه بالغرفة
سامر ليش ما إنام سوه بالغرفة
ليان ولك إنت صدگ ما عندك دم تريد تنام ويايه وإنت كاتل ابوك و لا متأثر شنو من گلب شايل
سامر كتلته علمودچ وما ناوي أكتله
ليان إنخمد وبدون حچي زايد خل نگعد باچر الصبح وأريد اشتري موبايلات جدد وخطوط بلكي نشوف واحد يبيع ذاك الي رحناله معزل وصار بعيد علينا جيب تلفونك حتى اتأكد متفتحه
سامر ما افتحه بين ما نطلع برى العراق صدگ إنتي شعندچ مشتريه تلفون هسه من نسافر نشتري
ليان أريد اعرف اخبار وائل أني عندي گلب مو مثلك بدون گلب
ليان بعد ما تدخل الغرفة وتقفلها عليها تشوف صورة أمها و تذكر ذكرياتها ويه أمها وتگوم تبچي
ماما وين رحتي تهت من متي إنذليت و شفت الويل وگمت أتعره و الناس يشوفون جسمي في سبيل اعيش أني وأخوية وقبلت اتزوج واحد بگد أبوية حتى اعيش عيشه بيها خير
ماما أني ضعت من بعدچ مو أني ليان إلي چنت مدلله بيتچ تذكرين من چنتي تشتغلين خدامة للعالم
ياريتني متكبرت و رضيت ياريتني أني أشتغل خدامة بس ماضيي يصلح أني عبالي الفلوس كلشي تالي طلعت مو هي السعادة عندي الوسيلة بس السعادة راحت من تزوجت واحد بگد أبوية و إنحرمت حتى من حقوقي الزوجية أبسط حق اليه إستغنيت عنه أحس حياتي مابيها طعم ولا مشاعر صرت مثل الألة تشتغل ليل ونهار لأجل المال وبس ياريتني اگدر ارجع بنية ولا ضعيت شبابي وياريتني أگدر ارجع أحب ياريتني أگدر احب سامر ماما أني حبيت إبن زوجي ولچ أني ضعت وما اعرف افكر ولا اتصرف بس اواعدچ ماما درت بالي من وائل مثل ما وصيتيني و ضحيت هواي بسعادتي لعيونه
صدگ خل أخابر وائل وأطمن عليه
تفتح تلفونها وتسوي صامت حتى سامر ميسمع
تغطي التلفون جوه المخدة حتى ميطلع صوت إشعار فتح القفل
بعد ما إنفتح التلفون خلتها وضعية صامت
وهي تگلب بالفيس تشوف خبر
محاولة قتل حجي أحمد بظروف غامضة وهو الأن يرقد في مستشفى مدينة الطب وحالته الصحية حرجة و تم إلقاء القبض على وائل شقيق السكتريرة في بيت شقيقته بعد إن تم العثور على حجي أحمد داخل بيتها و مع إختفاء ليان السكرتيرة و سامر إبن الحجي احمد مع العثور على سيارته في دار ليان
ليان عيونها تفيض من البچي وتحاول تضم بچيتها متگدر تخلي إيدها على حلگها
وهي تبچي بصمت حتى سامر ميسمعها
يتبع بارت ١٨