قلبي رهيفٍ للأحباب

عنوان الجزء

وثاني يوم بعد الظهر رجعو للرياض بحكم ان كان وقتها اختبارات نهائية وكلن رجع لحياته
فايز اللي لقى شريكة حياته ومعاد يهمه شي
تركي اللي شايل هم امه وحالة ابوه المزريه وحياته متعسرة من دراسة ومن مال وما الى ذلك
ونايف اللي بدت شهرته بدون تخطيط وصار كل همه انه يطلع باحسن صورة ويعجبهم
وعبير اللي انتشرت قصتها مع نايف وتعلقت فيه وحبته حب تعلّق
ونورة اللي خلصت دبلوم وكل همها اكلها ومسلسلاتها والطلعات
وديم اللي عايشة بقصة من طرف وراضية فيها
ورهف اللي تاقلمت على حياة الثانوي وكل همها تجيب درجات عالية وتدخل طب
والعنود اللي تجهز لزواجها
وخالد اللي شايل حمل البيت وقافل باب الهوى وينتظر محبوبته اللي بنذكر قصتها بالاحداث القادمه
وسلطان وخلود اللي كل همهم  مولودهم الجديد ريان اللي خذاهم من الدنيا وزادهم حب

مرت الايام وكل يوم تتاقلم رهف اكثر واكثر بالعيشه فبيت جدتها وعلى الرغم من كبر فقدها الا ان جدتها ما كانت تحسسها باي نقص وحتى العنود وخالد بدو يشتغلون عليها عشان تتقوى اكثر واكثر
خالد اللي علمها  السواقه وركوب الخيل والرمي والقصيد والمحاورة والعنود اللي علمتها الطبخ والخياطه والسباحه وكانت تعطيها كتب تطوير ذات وتسجلها بدورات قدرات وتحصيلي وانجليزي
ورهف فعلًا كانت مجتهده جدًا وعندها رغبة بالتعلم ولا تبي تجلس بدون ما تسوي شي عشان ما تفكر واجد وتحس بالوحده فحتى الدراسة كانت وسيلة هرب من مشاعرها
وكل يوم رهف تتعلم شي جديد وحتى جوال ما كانت تبي بس عندها واحد بسيط جدًا للمكالمات والرسايل المهمه اما باقي مواقع التواصل الاجتماعي ما تدخلهم ابد من كثر الانشغال بيومها كانت تحصد وتحصد والشي ذا صار يبان بنظرتها ووقفتها وثقتها بنفسها وكلامها
عكس نايف اللي خذته السوشال ميديا ولعبت بعقله وصارت كل افعاله ما منها فايدة ابد وصار مدمن جوال ولا يقدر يفكه من يده وصار عنده حياة ثانيه ومقتنع انها حلوه لدرجة ان شخصيته الحقيقيه مع الوقت اندفنت لانه صار يظهر للناس اللي يحبونه مو اللي هو يحبه فمع الوقت اقتنع ان هو كذا واختفى نايف اللي نعرفه وماباقي منه الا اثر بسيط

في بيت سلطان قبل صلاة الفجر
كانت ديم على سريرها تناظر حساب تركي المقفل وودها بس تشوف ستورياته وتراقبه من بعيد لكن مره كان انطوائي وفكرت انها تنتحل شخصية احد لان ذا آخر حل وفعلًا سوت حساب وضافته لكن تركي ما قبل الاضافه وطنش بوقت ديم كانت تنتظره احر من الجمر تبي منه بس اشاره لكن مره ماكان يعطي وجه لان تقريبًا تعود على متابعين نايف يجون يطقطقون عليه لان نايف ضايفه بحسابه الاساسي وغير كذا يصوره دايم فصار اللي يعرف نايف يعرفه لكنه ماكان يحب الاضواء ابد بس محترم ان نايف جالس بنصها ونايف خويه

مرت الايام وخلص فايز شقته واستقر بوظيفته وبانتظار الاشارة من العنود عشان الزواج
ولكنها كانت تقوله اصبر مب الحين