التفت سياف لسلمان الي باقي منصدم من طعنة اسر
والفاعل نيااف نطق : سلمان انا ما ودي اضغط عليك بس انت تعرف نياف لو شوي ولو هو بوعيه ماسوى فعلته بس اسر استفزه ونياف عصبي وغزه الشيطان
رد سلمان بعصبيه : سياف لانه عصبي يحق له يسوي الي سواه ؟ .. بعدين اسر ماراح يرد عليه عبث شف وشهو متكلم فيه
رفع نظرة بحر ونطق وهو يقاطعهم : الي فهمته من اسر انه تكلم على اختك .. استغربو الاثنين من الكلام ونطق سلمان : ميلاف ؟ شفيها .. نطق بحر بتردد : لا الثانيه
تعجب سلمان !!! اي اخت ثانيه
دقايق وشد على قبضة يده وهو يردد اسم اسر بحسره : اسر اسر
مع الايام يستغرب من اسر وتعلقه بالموضوع الي بنظر الكل منتهي ظل دقايق ساهي وقلبه يوجعه على اخوه والنقطه الي عالق فيها للحين .. فز من وضعه على صوت بحر الي انتبه لملامحه ورجع تكلم من جديد وهو يتسائل : السالفه مو منتهيه؟
سلمان جاوب بدون وعي وهو مقهور : منتهيه منتهيه عندنا بس عنده هو زي ما انت شايف
سياف : سلمان تكفى ياخوي كلمه انت ان كان لي خاطر عندك حاول تقنعه .. نزل راسه وهو متفشل ويحاول يكتم عبرته ثم رفعه وهو يقول : اعرف ان مو من حقي اطلبك بس اخوي ماراح يقوى عيشة السجن وانا اعرف انك منتب راضيها عليه ..
مد سلمان يده وهو يطبطب على كتف سياف
ثم تكلم : والله اني ما أرضاها بس اعرف عقدة اسر تجاه الموضوع واعرف ان الوضع صعب لكن ابشر
بكلمه واحاول فيه هد نفسك انت وان شاء الله مب صاير إلا كل خير
بحر تكلم بجديه : الوضع مو إقناع وخرابيط انا مقدر اترك نياف كذا بدون ما أوقفه والتفت لسياف وهو يتأسف له : اعذرني ياخوك بس ملزوم وهذا شغلي .. كمل كلامه وهو يوجّهه لسلمان : وانت شف وحاول باخوك بسرعه
انقهر سلمان وهو تو يستوعب انه تكلم مع بحر بأمور كثيره وقاعد معاه بنفس الجلسه .. نطق بغضب :
انت سد حلقك ولا هو انت الي توجه لي الكلمه
بعدين مو معناته يوم شرعت لك باب بيتي ان قلبي
يشرع لك من جديد او يغفر لك غلطتك الخبيثه ، والحين دام تفاهمنا عالسالفه ومن غير مطرود تفضل اطلع
انقهر بحر وانصدم من سلمان وحقده للحين
وطرده له قام فز طالع تاركهم وقام وراه سياف يلحقه
لكن وقفه سلمان وهو يقول : سياف لاتدخل بينا وخلنا بموضوعنا كلم نياف وشف وينه يمكن اذا جا واعتذر يهدا اسر .. هز راسه سياف وتكلم : نادلي اسر قبل اطلع ..
سلمان : ابشر
راح ينادي له اسر
ورجع له وجمبه اسر الي رافع يده ويتألم منها
وماله خلق لاكن نطق بعصبيه : سياف أنا قلت الي عندي ولا في غيره اقوله ياخوي
سياف تقدم يسلم عليه ويتحمد له بالسلامه ثم ابعد
وقال : بس حبيت أتحمد لك بالسلامه واقولك
ثلاث او خمس سنوات سجن ماهيب شوي تكفى لاتعيش أختي نفس الشعور ، وأنت خابر قسوته ومرارته
وراح تاركهم متعجبين من كلامه
التفت اسر لسلمان وبعصبيه : وش يقصد ذا
سلمان : مدري عنه يمكن يقصد اختهم توأم نياف
عند نياف
طلع من البيت يمشي من شارع إلى شارع في السيارة
يحاول يكتم شهقاته لاول مره يحس بالوجع والوحده بهالشكل مسح دموعه وكلم نفسه يواسيها : نياف تبكي تبكي على كلامهم انت مابكيت يوم أجرمت فيه مابكيت يومك صغير وش يبكيك الحين .. ضرب المقود بعصبيه وصرخ : ماهيب اول مره ماهيب اول مره عشان تبكي ياحمار .. شتم نفسه وماهي دقايق إلا وهو ساحب الفرامل و .....
انتهى
