جاني وأنا مالي بالمحبة ميول وحببني بسواليف ماكنت أحبها

من بارت ١٦٦ الى النهاية

بارت ١٦٦
الجزء الاول
يوم السفر بالطريق

تناظر الطريق من الشباك اللي بجنبها في السيارة هي ومرام وابوها وبدر وسيارة علي وراهم فيها علي وسارة
بدر وهو يناظرها بالمرايه
" بيعيني بالسوق ياام سلمان"
التفتت عليه وابتسمت وهي تقول
" اشتريك بعيوني يابعدي انت"
" شكلك اشتقتي لسلمان "
" يالبى عينه "
" تبينا نرجع "
باستنكار
" وين نرجع ؟!"
" نرجع لسلمان "
" انت صادق .. "
" قسم بالله لو تقولين ارجع لرجع اللحين كم ام سلمان عندي"
كمية مشاعر اضطربت في داخلها
" يا بعد عيني يا بدر الا لا ولله كمل دربك بنروح ونفرح فيك ونشوف عروستنا وبنرجع وسلمان ماعليه شر عند جدانه وابوه"
احتضنت مرام كف جد بكفها..
حركه بسيطه لكن كفيله انها تهدي فيك صراعات كثيرة
______

في سيارة علي وسارة
" علي جوعانه "
التفت عليها
" حبي .. انتي ملاحظه انك صايرة تاكلين بزيادة "
مطت شفايفها
" عمري ترى هرمونات.. "
ضحك وناظر الطريق ثم ناظرها بنص عين
" طولت هالمره سالفة الهرمونات"
" لا طولت ولا شي بس ترى جد جد جووووعاااانه"
" انزين خنوصل الجوازات خبري في محطه قبلها وابشري هالمره بشتري لك كيس قايم قاعد ههههههه ".
ضربته على كتفه
" تطنز ؟؟!!!"
" لا حشا بس اقول "
صدت عنه
علي " عمري ولله امزح معك لا تتحسسين .. يوووه نسيت صح فترة الهرمونات هذي تصيرين نار وشرار "
طالعته بنص عين ورجعت صدت عنه واكثر شي قهرها انه كان يضحك
————
دق سعود على بدر اللي قال له انه يبي لهم ١٠دقايق ويكونون عند الباب
وقف بوسعود عند الباب وبس نزل بدر وراح صوب ابوه يسنده وهو ينزل
وصلهم صوت بو سعود
" يا مرحبا .. يا مرحبااا فيكم اسهلت وانورت واستهلت وامطرت "
بو بدر اللي كان يتكئ على عصاه وابتسامته تسبق رده
" ماعليك زود يابو سعود "
وبس قرب بو بدر من الباب نزل بو سعود يسلم عليه
" ياهلا وغلا حياكم الله نورتوا ديرتكم الثانيه "
بو بدر " منوره بأهلها "
سلم بدر عليه وباس راسه
" عز الله مقدارك هلا بمعرسنا "
بدر بثقه وابتسامه
" هلافيك عمي شلونك عساك طيب "
" بخير جعلك بخير"
التفت بدر على علي اللي وقف بعد خطوتين منهم
" هذا علي صاحبي واخوي ونسيبي"
اقبل عليه بو سعود وسلم عليه وهو يقول
" الغالي على بدر غالي علينا حياك الله شلونك عساك طيب "
" بخير جعلك بخير انت شلونك عساك طيب ".
" طيب طاب حالك حياكم حياكم "
دخل بو سعود وانتظر لين دخلوا الشباب ثم قال لبدر
" بدر خل يدخلون اهلك الاهل ينطرونهم داخل "
" ابشر ".
اشر بدر بيده للبنات اللي تقدموا له
جود " هذا ابو العروس؟! "
مرام " اي شفتيه ".
" ماشاء الله تبارك الرحمن ولا كأنه أبو "
الجزء الثاني
سارة " اي الله يخليه لعين ترجيه "
جود " ماتزوج ؟!"
سارة " لا اللي سمعته انه من ماتت زوجته ربى عياله ولا تزوج بعدها "
دخلوا البناات وصوب السيب اللي قالهم عليه بدر راحوا ولا يلقون الباب الكبير
كانت اخت بو سعود واقفه تستقبلهم
" حيالله من جانا ونور مكانا "
جود " يحييك ويبقييك "
بعد ما سلمت عليهم دخلتهم الصاله
"عسى ما تعبتوا "
جود
" لا الحمدلله الطريق مامن تعب "
" شلونكم وشلون السعودية واهلها "
سارة " بخير جعلك بخير "
ودخلت مها اللي كانت راده شعرها كله لورا ومو حاطه اي شي في وجهها غير قلوس شفاف وكحله في داخل العين
لابسه فستان قطن نص كم وطويل مخصر من عند خصرها صدره عالي
" حيالله من جانا "
سلموا عليها البنات وبس جلست بجنب عمتها قالت لجود " اكيد انتي جود "
" هالله هالله "
" حيل كان ودي اشوفج واسولف معاج" .
جود وهي تبتسم
" وكيف انطباعك بعد ما شفتيني "
قالت مها " مثل ماتوقعتج قمر ماشاء الله "
جود وهي تبتسم " الله يجبر بخاطرك انتي اللي تبارك الرحمن كامله والكامل الله " .
". حبيبتي هذا من ذوقك ".
قامت العمه واتبعتها مها وبعد شوي رجعوا
" حياكم ع الغدا .. "
وقاموا البناات يتبعونهم لغرفة الطعام
————-
بعد الغدا جلسوا يشربون الشاي بالمجلس واخذت السوالف بو سعود وبو بدر
سعود يسولف مع علي وبدر طلع جواله وارسل لمها
" وينك ؟"
بعد ربع ساعه ردت
" نورت الكويت"
" بنورك اللي باخذه معاي وانا راجع السعوديه "
ارسل بعدين كتب
" وينك "
وارسل
" بدر يعني ويني اكيد بالبيت داخل "
ارسل
" بشوفك "
" استهدي بالله يا رجال شنو تشوفني "
" تدرين اني ماشفتك من اكثر من شهر "
" ماعليه ترى باقي اقل من ٢٤ساعه"
" ما يمنع بس اشوفك "
" لا بدر لا بكرا العرس وانا مشغوله الصبر ترى يمدحونه "
بدر
" الله يرزقني الصبر "
جاه صوت سعود
" بدر !!!"
رفع راسه بدر وقال لسعود
" هلا ؟"
" شفيك .. اناديك من اليوم "
ابتسم بدر برتباك
" السموحه كنت اكلم صاحبي شنو كنت تقول "
جت عين بدر بعين علي اللي ابتسم وصد وبدر قلب لونه احمر من الاحراج بس تدارك وهو يرد على سؤال سعود..
————-
يوم الزواج
سعود وصل اخته وعمته لصالون
بينما البنات كانوا متفقين مع ميك أب ارتست تجي تسوي لهم المكياج والشعر في بيت بوسعود في نفس القسم اللي خصصوا لهم يوم جوهم اول مره
اما بدر راح يشوف حجز الفندق وأخذ معاه علي
اول وحده خلصت جود راحت لابوها وجهزت له ثوبه وغترته وساعدته باللبس بعدين عطرته وراح للمجلس رفعت جوالها واتصلت على سلطان رد عليها
" هلا.."
"هلابك شلونك"
"الحمدلله إنتي شلونك "