"اللى ربى بتاع مربى" 😉🙄

هزقنى شكرا😂

انقضاء ليلة غريبة
رحيل الجد مصطفى والجدة مجيدة
نوم الجميع في فراشهم هادئين
وأخيرا حل الصباح
فى يوم جديد حيث يرجوا الجميع بلا استثناء أن يمر عليهم كالبشر العاديين
لا مصائب لا اختطاف لا استدعاء للجد أو الجدة مرة أخرى............

فى الصباح الباكر في الساعة السادسة صباحا فتحت منة شقتهم و خرجت منها ليان لتدق على الشقة الأخرى ففتح خالد الباب.........
منة وهى تقف على باب شقتهم وهى تنظر لليان بدهشة:مين ده
ليان وهى تنظر لخالد بدهشة:هو ده خالد ولا عنيا اتفقعت من المذاكرة
منة وهى تقترب منها:لا ده هو يا بت يا ليلو
ليان لخالد بشك:خالد؟
خالد:لا واحد شبهه
ليان وهى تلتفت لمنة:شوفتى انا قولت مش هو برده
خالد بضيق:انتوا فاطرين ايه على الصبح كده
ليان بدهشة:بانجو
خالد:مالك؟
ليان بإدراك:ها...قصدى احنا لسه مفرطناش
منة:هو انت...انت صحيت لواحدك يا خالد من بدرى كده
خالد بسخرية:لا لسه نايم...استنى أما أدخل أصحينى من جوه
منة و ليان:ها
خالد بضيق:ها ايه وانا واقف مع شوية بقر في المزرعة السعيدة ؟...انتوا مالكوا كده على الصبح
منة وهى تنظر لليان بحذر:ولا...ولا حاجة يا خالد احنا بس مستغربين
خالد:ليه يعنى هو فيه حاجة في شرع ربنا بتقول حرام إنى أصحى بدرى ده حتى حديث الرسول عليه الصلاة والسلام بيقول بورك لأمتى في بكورها
ليان بفرحة:ما شاء الله ده عنده معلومات عن الإسلام يا بت يا منة
منة بفرحة:هعملكوا رز بلبن النهاردة
خالد بتهكم:ده على روحى ده ولا ايه
منة:لا عشان الحمدلله حالك ابتدا يتصلح وقومت بدرى لواحدك بدل ما كنت بتقوم الساعة تسعة إلا خمسة تلبس في خمس دقايق وتطلع تجرى ولا كأنك انت الحرامى اللى هربان من البوليس
خالد بفخر:أومال بقى لما تعرفوا إنى صليت الفجر
ليان ومنة:بجد والله
خالد بضيق:بجد ايه هو أنا كنت ملحد قبل كده ما أنا كنت بصلى برده
ثم نظر على استحياء:سا... ساعات يعنى
ليان:إيه
خالد:أقصد ساعات كنت بفوت كده ربنا يسامحنى يعنى
منة: ربنا هيسامحك إن شاءالله طالما نويت تتوب وتبتدى بداية جديدة ولولا إننا الساعة ستة والناس لسه نايمة كنت زغرطت انا وليان والله
مايا وهى تخرج لهم:تزغرطوا على إيه
خالد وهو ينظر لها:أصلى هخطب عقبال عندك
مايا ببرود:فى داهية
ثم دخلت ورزعت الباب في وشهم كلهم
ليان لخالد:ايه الاستفزاز اللى انت فيه ده
خالد:استفزاز؟ ده انتوا حاجة غريبة على الصبح والله
منة:يا ربى يعنى اليوم الوحيد اللى الحاج محمد مسافر فيه لبنته وهيسيبنا في حالنا مش عاوز يعدى بسلام
ليان وهى تطبطب عليها:سلام الله عليكى يا أما
مازن وهو يأتى من وراء خالد:ها يا منة هتفطرونا إيه
ليان وهى تغلق بابهم بسماجة:شاى من غير سكر
ثم ذهبت منة وليان ليطرقوا الباب على مايا ففتحت لهم ندى
ندى وهى تتثائب:ف..فيه إيه يا جماعة هى ميوش مين اللي مزعلها
ليان:المحروس
ندى لمنة:مين محروس ده
منة بيأس:ده واحد ساكن معانا في العمارة متاخديش في بالك يا ندى
ندى: حاضر مش هاخد
ليان وهى تشد ملابسها: يا حزنى
ثم نظرت لمنة:منة خدينى عند عجوة مرات أبوكى دى خلينا نرتاح وأقولك جوزينى ابنها سيد ده ولا أقولك انا خليه يكتب عليا عرفى
منة بضيق: ربنا ياخدها هى وابنها بلاش السيرة دى على الصبح
ندى وهى تحك رأسها:انا مش فاهمة حاجة
ليان وهى تنظر لمنة:اتفضلى
منة:لو كده انا اللى هجبلكوا ورقتين العرفى لحد عندكوا
ندى: أنا سمعت إن الجواز العرفى ده حرام
ليان بتهكم:سمعتى؟
ندى:اه
ليان وهى تنظر لمنة:دى لسه جديده معانا فى الاسلام شبه أبو جهل اللى لسه كنا واقفين معاه بره
منة بضيق منهم وهى تدخل على مايا الغرفة:مالك يا مايا
ليان وهى تدخل ورائها وتجلس بجانب مايا:هيكون مالها يعنى كله من الزفت اللى اسمه خالد عكر مزاجها على الصبح
مايا وهى تبكى بحرقة:هو..هو هيخطب بجد
ندى بعدم فهم:مين ده اللي هيخطب
مايا وليان ومنة:أخوكى
ندى:ومعزمنيش؟قد ايه حيوان بجد
مايا بغضب:شيلوا البت دى من قدامى بدل ما أخليها فى رق ورقة البفرة
ليان لمايا:اهدى يا بنتى الزفت ده كان بيهزر ما انتى عارفة انه بيحب يحرق دمك على طول
ندى:يعنى إيه مفيش خطوبة؟مفيش فستان جديد
منة:مفيش أكل النهاردة ليكى
ندى بغباء: خلاص هبقى آكل في الخطوبة جاتوه
منة لمايا:خالد مش هيخطب ولا حاجة يا مايا ده كان بيقولنا إنه صحى بدرى وصلى الفجر و ناوى يتعدل فكنت بقوله إنى فرحانة بيه وهاين عليا أزغرط قام هو استغل الفرصة عشان يضايقك و بس كده
ندى وهى تجلس بجانب مايا بشرود:تفتكروا يكون عمل كده ليه
مايا: المفروض يا ندى انتى أكتر واحدة تقوليلنا لإنك المفروض برده إنك أكتر حد فاهمه
ندى:ليه
مايا:ليه ايه يا بنتى مش انتى أخته ولا موقعك ايه في حياته 
ندى بشرود:حياة مين
مايا وهى تدفعها:حد يشيل البلوة دى من جمبى أحسن هتنقط
ندى بضيق: يا مايا انتى بتسألينى في حاجات صعبة أوى وانا كنت قعداله جوه دماغه يعنى
ليان لندى:طب فوقى معانا كده تفتكرى تصرفه ده معناه ايه
ندى:معناه ايه؟معناه إيه...ما تسألوا حاجات سهلة شوية
منة:زى ايه مثلا يا ندى
ليان لمنة:انتى هتعومى على عومها يا منة
منة:خلينا بس للآخر معاها عشان أما نضربها يبقى عندنا حق
ليان:ماشى
ندى بتوتر: والله يا جماعه مش عارفة أفسر بس ممكن اللى يعرف يساعدنا مهاب
مايا منتفضة:لا انا مش عاوزة حد يعرف عن موضوعى ده حاجه خالص ده أنا حتى مراد مقولتلوش حاجة
منة:صح برده أومال انتى ناوية تعملى إيه
مايا وهى تضع يدها على خدها:مش عارفه بس كنت بفكر أبدأ أنفذ خطتكوا
ندى بفرحة:هو ده الكلام
ليان بحماس:عاوزين نوقعه و نجيب بوزه الأرض
منة وهى تحتضن مايا:إن شاءالله هتكونوا من نصيب بعض يا ميوشة مش انتى بتحبيه
مايا بغضب:أومال بتهبد في الأرض من ساعتها ليه يا منة عشان بكرهه
ليان وهى تهمس لمنة:حالتها بقت خطيرة
ندى بهمس لمنة من الجانب الآخر:خالص
مايا متخصرة:بتقولوا ايه
منة وهى تدفع ليان وندى:مف...مفيش بقولهم هنروح نحضر الفطار مش كده يا بن.........
فى ذلك الوقت سمعوا صوت طرقات على باب الشقة
مايا وهى تقوم من مكانها بحدة:والله لو كان هو لأخلع وشه وأركبله وش جديد
منة وهى تقوم ورائها:استنى بس يا مايا
مايا بغيظ وهى تقترب من الباب: والله لأهب في وشك يا خالد
ليان وهى تلحق بهم:اهدى يا بنتى انتى ايه بوتاجاز خمسة شعلة
ندى وهى تسير ورائهم ببطئ:يوووه...عما يشاكلوا تكون الساعة بقت تسعة وأبقى فوت الفطار قبل ما أنزل الجامعة
ليان لندى:يخربيت البرود دى قايمة تقتل أخوكى
ندى بعدم اهتمام:وانا مالى يا حبيبتي انا مالى
ليان وهى تشد يدها:نفسى أشلفط خلقتك بس للأسف حرام أضيع نفسى علي......
ليان وهى تنظر للواقفين أمام الباب:مين دول