خرجت جيهان وهي غاضبة جدا من تجاهل فتحي لأولاده، وذهبت إلى العمارة التي يسكن فيها، وعندما صعدت ظلت تدق على الباب بقوة ولكن لم يفتح أحد. نزلت بسرعة لحجرة البواب وسألته عن فتحي، فقال إنه لم يأتي إلى البيت بعد أمسكت هاتفها واتصلت به، وكان الهاتف لا يزال غير متاح. خرجت من مدخل العمارة وهى في منتهى الغضب، ورأته يركن سيارته أمام البوابة. اندفعت إليه بسرعة وقالت: بذمتك إنت أب إنت؟ نظر لها فتحي بدهشة وقال: جيهان إيه؟ بتعملي إيه هنا؟
بعمل إيه هنا؟ كمان بتسألني إنت زي ما تجيش تآخد الولاد؟
دق فتحي على جبينه بقوة وقال : آه. نسيت خالص
رفعت جيهان يدها في وجهه وهي تقول: نسيت. نسيت ولادك، نسيت إنك متفق معاهم. بقى لك أسبوع إنك هتيجي تاخدهم يقضو معاك الخميس والجمعة والسبت. إزاي يعني؟ في حد بينسى أولاده؟
أعمل إيه؟ معلش كان عندي شغل وعندي اجتماع و مفضتش و. نسيت .... نسيت راح عن بالى
يعني يا بجاحتك يا أخي، يا بجاحتك ؟؟ إيه البرود إللي إنت بتتكلم بيه ده ؟ بنتك منة سايبها في البيت مفطورة من العياط وأحمد لولا إنه ماسك نفسه. كان زمانه عيط معاها
ليه يعنى هو حصل يه ؟
الولاد بيشوفوك بالعافية بيشحتوك عشان يقابلوك، وإنت بارد برود الثلاجة
جيهان وبعدين من فضلك متغلطيش في
هو أنا لسة غلطت؟ ولا قلت حاجة؟ ده انا لو قلت اللى عندى هاتروح تدفن نفسك .... إنت لا كنت نافع زوج ولا أب ولا أي حاجة، أنا مش عارفة اتجوزت ليه من أصله، طالما إنت عايز تعيش مع نفسك
وبعدين معاك بقى. خلاص. أنا نسيت محصلش حاجة
ضغطت جيهان على أسنانها بقوة، وهى تحاول أن تتحكم فى غضبها وقالت : طيب إتفضل قدامى على البيت. روح خد الولاد يلا
لأ مش هينفع دلوقتى , نا لسه راجع من الشغل وعايز أطلع آخد دش وارتاح شوية ...
قاطعته جيهان بغضب وقالت: آه .. تآخد دش و ترتاح شوية وتنام ساعتين. وتقوم من النوم. تخرج مع أصحابك وتنسى ولادك للمرة الثانية، والبنت تتقهر، والله أنا لولا زعلهم أنا ما كنت جيت ولا سألت فيك ولا كلمتك من أصله ,,, إتفضل، أركب العربية وتعالى ورايا على البيت، وإياك حسك عينك تقولهم إن إنت نسيت هتقولهم إن عربيتك عطلت في الطريق، وملقيتش حد يصلحها وإن موبايلك فصل شحن، مفهوم؟
بس يا جيهان
دفعته جانب سيارته مرة أخرى، وهي تقول : من غير بس قدامي .... قدامي. ... مش عايزة أسمع صوتك. اتفضل
ركبت جيهان سيارتها وأدارتها، وابتعدت، وركب فتحي السيارة خلفها وهو يشعر بالامتعاض، وقال : أنا مش عارف إيه شخصيتها القوية دي
أنت تقرأ
صحبة ورد
Non-Fictionهذه الروياة تتكلم عن الصداقة القوية بين مجموعة من الفتيات تفرقهم الأيام ولكن يعودو للقاء وتظهر قوة صداقتهم فى مساندة بعضهم ودعمهم لبعضهم البعض
