صحبة ورد

الوردة الثالثة 11

لم تصدق نغم نفسها ,,,,مطعم صحبة ورد .. من ممكن أن يضع هذا الإسم سوى صديقتها جيهان , معقول تكون جيهان ولكن دوللى تقول بأن صاحب المطعم رجل وإسمه حكيم .. يجب أن تتأكد بنفسها ,,ركبت تاكسى بسرعة وتوجهت للعنوان وهى تشعر بقلبها يخفق بقوة ..أغلقت عينيها وهى تتمنى أن تكون جيهان

لم تنتظر جيهان وأخذت منار لمركز فنى حتى تبدأ دروسها فى النحت وشجعتها لتبدأ وقال المسؤول عن المركز بأن تعلم منار سيكون سهلا وسريع لأنها فى الأصل رسامة وأيضا حاسة اللمس عندها الآن أقوى بكثير وأخبرهم بأنها ستتعلم نحت اشياء غيرة أولا وحدد لها جدول لم تتركها جيهان وجلست معها لأول لقاء بالمدرب والمجموعة التى ستعمل معها واخذت نسخة من الجدول لتأتى بمنار بنفسها .

فى نفس الوقت ,جلست نغم في التاكسي وهي تنظر كل دقيقة في الساعة.. وسألت السائق: هو إحنا لسة كتير؟

هعمل إيه يا مدام , الساعة 2:00 والدنيا زحمة. إنت عارفة بقى؟ خروج مدارس الموظفين

طيب أرجوك حاول تشوف طريق مختصر أو كده، أنا مستعجلة قوي

حاول السائق أن يدخل من شوارع جانبية، وكانت نغم سارحة بأفكارها، وهي تستعيد كل الذكريات مرة أخرى , أيام المدرسة , وجودهم معا، الرحلات ,المرح ,,حتى أيام الفراق , تذكرت كل شيء , همست لنفسها : أتمنى من كل قلبى أن تكون فعلا صاحبة المطعم، هي جيهان

أنهت غادة تصوير الحلقة الجديدة ووقفت مع المخرج الذى قال: الحلقة دى هاتعمل صدى كبير قوى ياغادة

ياريت يا أستاذ فهمى ..

متقلقيش.. أنا جالى إتصالات كتير جدا وواضح إن نسبة المشاهدة عالية

الحمد لله .. أنا مكنتش مصدقة إنى ممكن اوصل كده وأتمنى ربنا يحقق لى اللى بأتمناه

إن شاء الله تبقى اكبر مذيعة وبرنامجك يكسر الدنيا

الحقيقة مش ده هدفى الوحيد من البرنامج ....

عايزة إيه أكتر من إنك تبقى مذيعة مشهورة وناجحة والكل يحكى ويتكلم عن نجاحك

نفسى ألاقى إخواتى

إخواتك؟ إزاى , إنت مش قلتى لى إن ملكيش إخوات وعايشة مع والدتك لوحدكم

إبتسمت غادة وقالت: آه .. عايشة مع ماما .. دول مش إخواتى بجد دول كانو صاحباتى .. كنا معتبرين نفسنا عايلة واحدة وإخوات ... وعندى امل واحدة منهم تشوفنى وتكلمنى ونرجع نشوف بعض

بما إن نسبة المشاهدة كل يوم بتزيد يبقى أملك ده هايتحقق قريب

يارب يا أستاذ فهمى ..يارب...

إبتعد فهمى وأغمضت غادة عينيها, كانت سعيدة بنجاح البرنامج وتشعر بأنه سيكون السبب فى لقائها بصحبة الورد