صحبة ورد

أصحب جدد 13

قررت غادة ان تقوم بإعداد حلقة عن الصداقة ,كانت دائما تفكر فى صحبة الورد وتمنت لو تراها إحداهن وتعرف طريقها وبالفعل إتفقت مع فريق الإعداد أن يكون موضوع الحلقة هو الصداقة وعرض عليها الفريق أن تقوم بعمل لقاءات مع أصدقاء بأعمار مختلفة وبدأت غادة فى التحضير للحلقة بمنتهى الحماس وقالت مساعدتها رهف : ماما عندها جارة ليها صديقة تعرفها من كتر من خمسين سنة

غادة: يوافقو يظهرو فى البرنامج يارهف؟

مش عارفة أسألها ... تسمعى حكياتها لما بتقعد مع ماما عن صاحبتها دى مصدقيش إن فيه صداقة ممكن تستمر المدة دى كلها

إبتسمت غادة وقالت: أكيد فيه صداقات بتستمر سنين طويلة أنا نفسى مريت بالتجربة دى بس للأسف فرقتنا الأيام .المهم لازم تسأليها فى أسرع وقت علشان نقدر نجمع عدد من الأصدقاء للحلقة

تمام إن شاء الله

إقترب المخرج وقال: ماشاء الله قاعدين ولاكأن عندكم حلقة هاتتسجل ..

ضحكت الفتاتان وقالت رهف: بنجهز للحلقة الجاية

طيب ياللا قومو ورانا شغل ,الأستوديو جاهز

دخلت غادة مع رهق للأستوديو وبدأت تصوير الحلقة, كانت حلقات برنامج غادة ملتقى الصحبة تذاع كل خميس فى فترة المساء وأصبح لها متابعين كثيرين وبالرغم من سعادتها أرادت أن يتاعبها أهم أشخاص.... صحبة الورد

وضعت جيهان الفطار على الطاولة ونادت: منار. مانو ...

خرجت منار من الحجرة وهى تتحسس طريقها وأسرعت جيهان نحوها وهى تقول: حاسبى تقعى ...

جلست منار وقالت: إيه الريحة الحلوة دى؟

عملت لك بيض بالطماطم عارفة إنك بتحبيه

تسلم إيدك ياحبيبتى

أساعدك ؟

لأ انا هاعرف آكل لوحدى ... مقلتيش, كلمتى هانى ؟؟

لأ والله نسيت ...

نسيتى ولا مش عايزة تكلميه ؟

لأ بجد نسيت

ميصحش ياجيجيى لازم تكلميه تشكريه ..

إحنا لسه بدرى قوى .. آخر النهار هاتصل بيه أكيد .. هاقوم اجيب الشاى ..

إبتعدت جيهان لم تكن تعلم لماذا تشعر بالإرتباك عندما يذكر إسم هانى, لاتنكر بأنه يعجبها وأنها تفكر فيه منذ رأته ولكنها خائفة من إقترابها منه .... رن هاتفها فنادت منار: جيجى التليفون

خرجت جيهان من المطبخ بالشاى ووضعته وأمسكت الهاتف وقالت: دى منة.. ألو حبيبة ماما .... إيه ياروحى مالك؟ كده ؟؟ طيب ياحبيبتى .. إرجعى إنتى واخوكى ... هاستناكم على الغداء .... ياللا باى..