صحبة ورد

Untitled Part 27

نامت الصديقات قريرات العين باللقاء واكثرهم فرحا هى جيهان بعد ان تلقت عرض الزواج الرائع من هانى وقبلت به وعليها الآن أن تخبر منة واحمد ,لم تحاول أن تفكر فى رد فعلهم على زواجها حتى لاتنزعج وقالت لنفسها بأنهم بالتأكيد سيريدون رؤيتها سعيدة مع شخص تحبه ..لقد كانو شاهدين على حياتها مع فتحى والمشاكل التى كانو فيها دائما

عاد هانى للبيت وفور دخوله إقتربت منه أمه وقالت : كده برضه ياهانى تبات برة ليلتين وتقفل موبايلك وتسيبنى قلقانة ...

معلش ياماما كان لازم أبعد شوية.

كنت بايت فين؟

حجزت فى فندق ليلتين ... كنت بأفكر مع نفسى

على الله تكون عقلت

إبتسم هانى بسخرية : عقلت!! ليه هو انا مجنون ياماما؟؟

يعنى تكون عدلت عن اللى بتفكر فيه ورجعت لعقلك وسيبنى انا اختار لك واحدة مناسبة و..

قاطعها هانى بسرعة :أنا عرضت الجواز على جيهان وهى وافقت ...

نظرت له أمه بصدمة وشهقت وقالت : إنت بتتحدانى ياهانى ؟بتعند معايا؟

ولا باتحداكى ولابأعند معاكى ياماما , انا بأختار شريكة حياتى وأظن ده من حقى ..

حتى بعد ماقلت لك إنا مش موافقة ...

إنت مش يهمك سعادتى .. انا هاكون سعيد مع اللى حبتها وإختارها قلبى

يابنى .. يابنى دى مش مناسبة ليك ... إنت المفروض تتجوز واحدة بنت بنوت تبدأ معاها حياة جديدة ..

قطع هانى كلامها بإعتراض : مين اللى يقول مفروض ومش مفروض ياماما؟؟؟ دى حياتى أنا ومش من حق اى حد يقرر عنى أعيشها إزاى ؟

أنا أمك.. ومن حقى إنى يكون لى رأى فى اللى هاتكون مراتك وأم عيالك..

لأ ياماما .. أنا آسف.. مش من حقك.. ده حق لى أنا لوحدى ..انا اللى اختار وأنا اللى أقرر عموما أنا هاحدد ميعاد الخطوبة مع جيهان وأبلغكم لو حبيتو تحضرو اهلا وسهلا ..وطبعا شئ يسعدنى... عن إذنك..

صعد هانى السلم وتركها واقفة تتابعه بغضب وقالت: كده برضه؟؟ كده ياهانى...

جلست على الكرسى وهى تبكى بشدة. لم يكن سهل على هانى أن يغضب والدته منه أو يخالف أمرها ولكن هذه المرة لن يستطيع فهذه حياته ويجب ان يعيشها كما يريد وليس كما تريد هى ويجب عليها أن تحترم إختياراته فى الحياة ,وقرر أن لاضحى بعد الآن ,,,

فى وقت متأخر من الليل دخل ماهر للبيت بعد إنهاء عمله ورأى والدته جالسة فى الظلام تبكى ,إقترب بسرعة وجلس بجوارها: ماما .. فيه إيه بتعيطى ليه؟