صحبة ورد

Untitled Part 22

نزلت جيهان من البيت وتوجهت أولا لبيت فتحى ووقفت أما شقته ورنت الجرس وفتح لها ووقف ينظر لها بإحراج وقال: إذا كنتى جاية تتخانقى معايا فأنا معنيش إستعداد ومن غير ماتقولى اى حاجة.,,, إنت معاكى حق و انا غلطان

يعنى عارف إن اللى عملته كان غلط

لما قعدت مع نفسى وفكرت لقيتنى إتصرفت ذوق

هافضل على الباب .

تحرك فتحى بعيدا عن الباب وهو يقول :لأ تفضلى ..

دخلت جيهان وجلست , تلفتت حولها ورأت إهمال فتحى فى البيت فقالت: لسه مهمل زى مانت

الست اللى بتنضف مجاتش الأسبوع ده,

جلس وهو يكمل : إسمعى ياجيهان..

لأ إسمعنى إنت يافتحى, من ساعة ما إتطلقنا و انا عمرى مافكرت أحرمك من الأولاد ..لأنى بأفكر فيهم قبل أى حاجة وعارفة هم متعلقين بيك قد إيه؟

أمال ليه مش بيردو على .. كلمتهم كتير وهم مش معبرنى

بسببك إنت ... يعنى لما تآخدهم عندك يومين مش عارف تفضى نفسك علشانهم ؟

والله كان شغل ناس جت تتفق معايا من غير ميعاد أعمل إيه يعنى ؟

زفرت جيهان بقوة وقالت: طيب.. هانعتبرها آخر مرة .. ولما تكلم الولاد هايردو عليك .بس بعد كده لما تآخدهم عندك تكرس كل وقتك ليهم مفهوم!!

إبتسم فتحى فنظرت له بدهشة وسألته: إيه؟ بتبتسم لى كده ليه؟

فكرتنيى بأيام جوازنا كان عليكى واحدة مفهوم تخلى الواحد يرتعش

ضحكت جيهان: مش للدرجة يافتحى ...

أصلك مش بتبقى شايفة نفسك ده أنا كنت بأعمل حساب لكلامك .. ولسه بأعمل على فكرة..

كانت جيهان تعلم جيدا بأن فتحى من أصل طيب ولايوجد فى نفسه أى شر أو حقد فقالت: إنت إنسان طيب والله

بس عيبك الإهمال ...

أشارت للشقة فقال: ماخلاص بقى ... راجل وعايش لوحدى والست اللى بتنضف إعتذرت هاعمل إيه يعنى..

مش مشكلة بس الشقة تبقى نضيفة لما الولاد ييجو ..

جيهان !! أنا لسه صاحى من النوم ومش فايق للمحاسبة دى ...

خلاص خلاص .. انا هامشى ..

لسه مشربتيش حاجة اعمل لك قهوة

لأ شكرا أسيبك بقى تكلم نومك ..

خرجت جيهان وأغلق فتحى الباب وقال: جميلة جيهان ومحترمة بس ياخسارة دقيقة قوى وحنبلية وأنا معنديش طاقة أنا عايز واحدة طايشة كده زيى ..الله نسيت أسألها عن الراجل اللى كانت قاعدة معاه ... ياترى مين ده؟