صحبة ورد

الحيرة 32

إنتهى الرقص ودخلت جيهان للحمام لتغسل يديها ووقفت تفكر فى منة وتصرفها الغريب ودخلت نغم وقالت: جيجى وقفة كده ليه؟ جيجى؟

ها بتقولى حاجة يانغم؟

إيه مالك واقفة سرحانة ليه؟

منة.. عملت حاجة غريبة قوى ..

خدت بالى .. شدت هانى من معاكى وخلتك ترقصى مع فتحى ..

تصرف غريب قوى منها ومفاجئ..

بيتهيألى إنها بتحاول تقرب بينكم ياجيجى تانى ..

تفتكرى؟

تصرفها بيقول كده ...

لو هى فعلا بتفكر كده يبقى إحنا فى مشكلة كبيرة قوى ..

هانى طبعا ..

أيوه.... أعمل إيه بقى؟

فاتحيهم فى أسرع وقت علشان تقفلى عليها الباب ده خالص ...

أيوه معاكى حق.. تخلص الحفلة الليلة وبكرة هاكلمهم هى واخوها ضرورى ...

إرتدت منار دبلتها وإنطلقت الزغاريد وأصر الجميع على نيرمين ان تغنى لصديقتها وبالفعل قامت بالغناء وشاركوها وإلتقطو الكثير من الفيديوهات والصور وإنتهت السهرة الجميلة على خير وركب الجميع سيراتهم للعودة إلى بيوتهم وظلت منة تتكلم عن الحفل وجمال الحفل ورقصة جيهان مع فتحى ولكن جيهان لم تتكلم ,كانت غاضبة من تصرف إبنتها ولذلك فضلت أن تصمت حتى يدخلو بيتهم وهذا ماحدث ,عندما دخلو لشقتهم قالت منة: انا تعبانة قوى هادخل انام بقى و..

جيهان : منة... تعالى هنا.

إقترب منة فأكملت جيهان: ممكن اعرف سبب تصرفك الغريب فى الحفلة

تصرف إيه ياماما؟

إنت عارفة كويس انا بأتكلم عن إيه يامنة .. شديتى هانى وهو بيرقص معايا وخليتى بابا يسيب شريكته فى الرقص

ضحكت منة وهى تقول: عادى ياماما.. انا قلت مش معقول يعنى تسيبى جوزك يرقص مع واحدة تانية وإنت ترقصى مع راجل غريب

كان يامنة... فتحى كان جوزى .. مش جوزى

عبست منة وأكملت جيهان: اللى بينا دلوقتى إنتى واخوكى وبس

يعنى إيه ياماما؟؟

يعنى معدش فيه بينا أى رابط غيركم .. واللى عملتيه ده إتسبب فى إحراج الكل....

أنا كنت عايزة . عايزاكم ترقصو مع بعض علشان ....

اللى عملتيه ده غلط وياريت مايتكررش تانى ..

إتجهت جيهان لحجرتها ونظر أحمد لمنة وحرك رأسه برفض وقال: انا قلت لك تصرفك غلط .. مسمعتيش كلامى..