صحبة ورد

الأمل 23

أول شئ فعلته جيهان عند وصولها للمطعم هو التأكيد على موعد منار لمركز العيون ثم إتصلت بهانى :ألو صباح الخير

صباح النور , احلى حاجة إنى بأسمع صوتك الصبح ...

يعنى تسمعه بس ومش عاي تشوفنى ؟

إزاى؟ لازم أشوفك النهاردة, هآجى لك النهاردة

للأسف مش فاضية

مين بقى اللى شاغلك عنى؟

منار صاحبتى مانا قلت لك هانروح مركز العيون النهادرة

مسموح بدل علشان صاحبتك بس لازم تفضى لى ميعاد النهاردة ضرورى لايمكن يمر يوم من غير ماأشوفك

هاشوف ظروفى واكلمك

وأنا فى الانتظار على نار..

أغلقت جيهان الهاتف وتنهدت بحرارة وقالت: والله وحبيتى ياجيهان ..

كان هانى فى موقع تصوير مع ماهر ولم يلاحظ ماهر وهو يراقبه وإقترب منه وقال: انا عايز اعرف كنت بتكلم مين وعلى وشك غبتسامة أول مرة أشوفها وتقفل المكالمة وتتنهد بحرارة كده..

إبتسم هانى ولم يتكلم فأكمل ماهر: مش هاسيبك غير لما تقول

نادى المخرج على ماهر فقال هانى: المخرج بينادى لك

مش هاتحرك قول بتكلم واحدة ست؟؟

أيوه..

مين دى ؟ قول كل حاجة؟

شريكة حياتى المستقبلية

سحب ماهر كرسى وجلس بسرعة بجوار أخيه وقال: إيه؟ إيه؟ إيه؟ شريكة حياتك, ناوى تتجوز ؟؟

أيوه..

مين دى اللى عرفت توقعك ؟؟

إنسانة رائعة ومتميزة جدا ..

حبيتها بجد؟؟

أيوه حبيتها قوى ..

لازم تعرفنى عليها فى أقرب وقت ..

نادى المخرج مرة اخرى فوقف ماهر وهو يقول: لسه هانكمل كلامنا عايز اعرف التفاصيل

روح بقى خلص المشاهد بتاعتك ونتكلم بعدين

إبتعد ماهر وسرح هانى فى أفكاره.

دخلت نيرمين حجرة بناتها ونظرت بأسف لشكل الحجرة وقالت: معقول الأوضة تبقى بالشكل ده؟ وإيه الهدوم المرمية دى ؟

بدأت فى جمع الملابس المتناثرة وهى تكلم: إنتوبنات لازم أوضتكم تبقى نضيفة,, بيرى, بسنت, قومو ياللا .. قومو يابنات

تقلبت بيرى وهى تقول :إيه ياماما بتصحينا ليه؟

عايزين ننضف الشقة فوقو