إستيقظ الجميع فى الصباح على أول أمطار مع بداية الشتاء, كانت صحبة الورد تعشق الأمطار وجوها وكأن وخرجت كل واحدة لشرفتها وكأن لديهم إتفاق , وقفت نور فى شرفة حجرتها ومدت يدها لتبللها بالماء وإبتسمت, كم تحب هذه الأجواء وفعلت نغم المثل ولحق بها شريف فضمته وقالت: الشتاء ده اجمل فصل فى السنة ,,
أنا بأحبه قوى برضه ...
إلبس تقيل بقى وإنت رايح المدرسة
لأ الجو مش برد للدرجة دى .
خلاص خد جاكت معاك
رفعت نغم عينها للسماء وتنهدت
لم تخرج جيهان للشرفة وحدها بل أخذت منار معها وأمسكت يدها ووضعتها تحت المطر فقالت: إحساس حلو قوى ,, قد إيه مشتاقة أشوف السماء والمطر ...
إيه رأيك نروح للدكتور
تانى ياجيهان؟
أيوه تانى وعاشر ومليون .. الدكتور قال إن ممكن يكون فيه تغيير يامنار
خايفة اتعلق بأمل مش هايتحقق
وليه مش هايتحقق .. مش يمكن ...الدكتور أكد إن ممكن بعملية تستعيدى البصر ولو فى عين واحدة ,,, لازم نتعلق بالقشاية دى ونحاول, علشان خاطرى يامنار .. علشان خاطرى
زفرت منار بقوة وظهرت الحيرة على وجهها ولكنها قالت: ماشى ياجيجى نروح لدكتور
ضمتها جيهان لصدرها بقوة وضحكت وقالت: أيوه كده. فرحينى فى وسط الهم ده وفتحى وقرفه
أبعدت منار نفسها وإبتسمت إبتسامة لها معنى وقالت :هم إيه بقى فى وجود هانى ؟
تورد وجه جيهان وهمست: أهو هانى ده حاجة حلوة ظهرت فجأة .. بس انا خايفة وقلقانة
ليه؟
يعنى الولاد هايبقى شعورهم إيه؟ وهانى هايتقبلهم وإلا لأ ؟؟؟
متفكريش فى حاجة قبل وقتها ,,, أهم حاجة إحساسك إنتى .. حبتيه؟
مقدرش أقول إنى حبيته .. هو عاجبنى .. ودايما بأتشد ليه .. بأبقى سعيدة قوى وأنا بأتكلم معاه وإهتمامه بى ,, بيفرحنى قوى ...وقلبى بيفضل يدق وهو قدامى ...
يبقى بتحبيه أو على وشك ... وأظن إن دى نفس مشاعره ...
هو مقالش حاجة لسه غير إنه معجب بى .
هايقول ... وقريب ,هو هاييجى تانى النهاردة؟
أيوه بيقول عايز ييجى يتغدى معايا.. ماتجيى إنت كمان.
لأ ياستى انا مش هابقى عزول أقعدو إنتو مع بعض وإتكلمو براحتكم وانا هاكلم نغم ولو فاضية نتقابل
من غيرى.. إستنى لما أبقى معاكم ...
خليكى المرة دى مع هانى والمرة الجاية نخرج مع بعض..
أنت تقرأ
صحبة ورد
Randomهذه الروياة تتكلم عن الصداقة القوية بين مجموعة من الفتيات تفرقهم الأيام ولكن يعودو للقاء وتظهر قوة صداقتهم فى مساندة بعضهم ودعمهم لبعضهم البعض
