صحبة ورد

المتسرع 36

رتبت نغم أوراقها وإستعدت لتدخل مكتب رؤوف ورن الهاتف رفعت السماعة واجابت: أيوه أهلا سميح بيه .... النهاردة؟؟ هاشوف المواعيد ... هو الحقيقة عنده ميعاد عشاء الليلة و...... مسافر بكرة ,,,,, طيارة الفجر.... طيب خلاص تمام .... هاييجى لحضرتك الفندق .. الساعة 8 مناسب ؟؟؟ ... لأ مش مشكلة هانأجل ميعاد العشاء ..

جلست نغم مرة اخرى وبحثت عن رقم المطعم الذى حجز فيه رؤوف الليلة مع دوللى وألغت الموعد لهذه الليلة وأجلته للغد وسجلت موعد سميح بيك فى الفندق بدلا منه .. دخل رؤوف وقال: صباح الخير

صباح النور رؤوف بيه ...

من فضلك اطلبى لى القهوة ومش عايز حد يدخل على نص ساعة

دخل رؤوف مكتبه وأغلق الباب وحركت نغم رأسها وقالت: هو ماله ؟

طلبت له القهوة وعندما أحضرها العامل ادخلتها بنفسها وقدمتها له وسألته : مالك يارؤوف؟

عائشة

تانى عائشة مالها المرة دى؟ عملت لها إيه؟

مش انا اللى عملت أمها هاتسافر مع جوزها قطر والبنت منهارة ...

تسافر!!

أيوه تصورى ... رمت البنت وهاتسافر مع جوزها الجديد

مش عارفة أقول إيه يارؤوف بس مكنتش اتصور إنها تبيع بنتها بالشكل ده .

جوازى منها كان اكبر غلطة عملتها فى حياتى الله يسامحها ماما هى اللى إختارتها لى ...

وهاترتكب نفس الغلطة مع الأسف ..

مش فاهم ..

يعنى هاتتجوز دوللى وهى مش مناسبة ابدا تبقى أم لبنت فى سن عائشة أو...

نغم!! من فضلك ... أنا حر فى إختياراتى ,,, سيبينى أشرب قهوتى

طيب أقول لك المواعيد و..

قاطعها رؤوف: بعدين من فضلك أنا عندى صداع دلوقتى

بس فيه تغيير و...

قاطعها بعصبية: بعدين يانغم قلت لك ...

خرجت نغم وأغلقت الباب وبعد قليل بدأت مواعيد رؤوف ولم تجد الوقت لتخبره بإلغاء موعد العشاء مع دوللى

بالرغم من أن جيهان رأفت بحال منة وخرجت من حجرتها أمس لتضمها إلا أنها لم تسامحها على تصرفها أبدا وقررت ان لاتكلمها أبدا وفى الصباح إستعدت مع أخيها للذهاب لمدرسة ولم تخرج جيهان من حجرتها, إتصلت بحكيم واخبرته بأنها ستعطى نفسها اجازة لمدة اسبوع وليتابع هو العمل وإندهش حكيم فهذه أول مرة تبتعد فيها جيهان عن المطعم وعلم بأن السبب طبعا هو زيارة ماهر وكلامه معها بالتأكيد تأثرت لما حدث منه ومن إبنتها لم يعترض حكيم ووافق بدون أن يجادلها...