صحبة ورد

البداية 7

وصلت جيهان للمطعم وفوجئت بزحام شديد أمام المكان ,نزلت بسرعة وهى تنظر بخوف ورعب وتتساءل ماذا حدث؟ دق قلبها وهى تتصور حريق فى الداخل او حادث وإقتربت بسرعة وقالت إحدى السيدات: فيه إيه ياجيجى ؟ الباب مقفول ومش راضيين يدخلو حد ليه ؟

وقالت الأخرى: بقالنا أكتر من ساعة واقفين إحنا حاجزين ..

سألها رجل :أول مرة تحصل يامدام جيجى..فيه إيه؟

جيهان: مش عارفة ... وسعو لى كده من فضلكم

فتحت جيهان طريقها فى الزحام حتى وصلت للباب ووقفت امام الباب الزجاجى ودقت بقوة ,كان المطعم هادئ ولايوجد أى شئ ,ولايبدو بأن هناك مشكلة , إرتاحت قليلا وذهب قلقها ولكنها تعجبت من غلق الباب أمام الناس و ,ظلت تدق بقوة وإقترب رجل وقال من خلف الزجاج : المطعم مقفول دلوقتى مش هانفتح لحد من فضلكم بلاش زحمة

مقفول يعنى إيه إفتح .. بأقول لك إفتح ...

يامدام من فضلك ورانا شغل ..

إفتح الباب حالا وإلا.... هاطلب لكم الشرطة ..

تطلبى الشرطة !! تطلبيها بصفتك إيه؟

بصفتى صاحبة المطعم..

نظر لها الرجل بصدمة ثم فتح لها الباب لتدخل وأغلقه مرة أخرى وقال: مكنتش اعرف .. انا وائل مساعد لمخرج و...

لم تهتم جيهان لكلامه وإلتفتت حولها ورأتهم جمعو كل الطاولات فى جانب المطعم ووضعو كاميرات حول طاولة فى الزاوية فقالت بغضب: إيه اللى إنتو عاملينه ده؟

هانصور برنامج مع الفنان ماهر حسنى و..

قاطعته جيهان بغضب : .. إزاى تقلب المطعم كده وتمنع الناس إنها تدخل؟

حضرتك مسمعتيش كويس بأقول لك هانصور برنامج ومينفعش أى حد يكون موجود

كانت جيهان فى قمة غضبها ونادت بقوة: حكيم.. حكيم..

خرج حكيم من مكتبها وهو يرتجف ووقف أمامها فقالت: ممكن اعرف إنت بتعمل إيه هنا بالظبط؟ وظيفتك إيه؟

وانا اعمل إيه ياجيجى . هم دخلو بالرجالة والكاميرات والأستاذ ده قفل الباب وقال المطعم مش هايستقبل حد

وإنت بقى خيال مآتة ..إزاى تسمح بالمهزلة دى؟؟؟

وائل: من فضلك من غير عصبية , هاندفع لك تعويض عن اليوم و...

إشتعلت عينا جيهان وإنكمش حكيم فى مكانه لأنه يعرف جيدا معنى هذه النظرة وقالت جيهان: حكيم إفتح الباب ودخل الناس ونادى الشباب يرجعو كل الترابيزات مكانها ياللا ويآخدو الطلبات

وائل: لكن يامدام ...

مفيش لكن ... إنتو إخترتو ترابيزة فى الزاوية تقدرو ترتبو اموركم حواليها من غير ماتخربو المطعم ...واقف ليه ياحكيم؟؟