"بيت عبدالرحمن القاسم" الساعه ١٠:١٥ صباحاً..
دخل جده لغرفته وميل شفاهه بعدم رضى من جات عينه على شنطة هذام..اللي التفت له بهدوء: أمي تحت؟
عبدالرحمن حرك راسه بخفيف: وماريا بعد.
هذام رفع حواجبه: وأبوي؟
عبدالرحمن حرك راسه بالنفي بهدوء..ومباشره هذام اخذ نفس وابتسم بسخريه وهو متوقع الجواب..
انتبه لجده يوم رجع طالع شنطته وتنهد بخفيف..قبل يبتسم: بيرجع يفضى بيتي!
هذام ابتسم: كلها كم أسبوع وارجع لك!
عبدالرحمن: ويبدأ ترم ثاني وترجع هناك!
هذام تنهد وهو فاهم مقصد جده..قرب منه بهدوء: ادري ان ودك اعيش هنا معك،وبيجي اليوم اللي أكون فيه معك يبه،بس ماهو الحين!
عبدالرحمن حرك راسه بهدوء..وربت على كتف هذام: منتظر هاليوم بفارغ الصبر،واذا ماجاء بضطر اخليهم يفصلونك.
ضحك هذام بهدوء..وابتسم جده قبل يطالعه بتذكر: نسيت أعلمك ان خالد بالمجلس،يبي يكلمك!
هذام عقد حواجبه بخفيف: حصل شي؟
عبدالرحمن حرك راسه بالنفي بهدوء: اكيد انه يبي يكلمك عن موضوع قُوت!
هذام حرك راسه بالإيجاب: زين،دقايق وانزل.
ماهي الا أقل من عشر دقايق..حتى دخل المجلس وهو
يطالع خالد اللي ابتسم له وقام يسلم عليه..جلس بجانبه وهو مستغرب عدم وجود جده..بعد حوار روتيني وسؤال عن الحال..
تنهد خالد وهو يطالعه: اظن انك تعرف ليه ودي أكلمك!
هذام حرك راسه بالإيجاب..قبل يكمل خالد بهدوء: ودي أعلمك ان قُوت ماهي بنتي بس، هي أغلى ما أملك ولا أملك بهالحياه غيرها واظن انك واعي لهالشي، واللي ودي أعرفه منك اذا انت فعلاً تبيها وشاريها، ماهو قصور بكلام جدك، لكن ابي اسمع هالشي من لسانك.
هذام سكت لثواني وهالسؤال يحس نفسه ماهو مستعد انه يجاوب عليه..واساساً الأجابه اللي بداخله متناقضه وماهي واضحه حتى له..
التفت له بهدوء: اللي ودي تعرفه شي واحد اني ما اضرها ابد مهما حصل.
خالد ابتسم بخفيف: ما أكذب عليك،اني حتى بفارق السن فكرت،لكن هالشي بترك قراره لقُوت،اللي يهمني اللي سمعته منك ياهذام،قُوت ماجاوبتني للحين ولا ادري وش قرارها لكن مشعل ما أعرفه ولولا أصرار أبوي ماشاورتها عليه،لكن انت أعرف انك خير الرجال ياهذام.
هذام ابتسم قبل يحرك راسه بهدوء: ماتقصر يا أبو قُوت،تسلم.
"بيت خالد المحسن"..
كانت جالسه جنب نوران..اللي ضحكت وهي تمد لها ورقه..طالعتها قُوت قبل ترفع عينها لنوران بغضب..
ابتسمت نوران بضحكه وهي تمد لها القلم: ضلل الإجابه الصحيحه!
قُوت اخذته منها وهي تطالع الأسمين اللي بالورقه "هذام، مشعل"..
كاتبتهم نوران تحت بعض وحاطهم بجانب كل اسم دائره..نزلت قُوت يدها لتحت الأسمين وهي تكتب "لاشيء مما سبق"..
مباشره ضحكت نوران وهي تميل شفاهها بخفيف: شدعوه! كل واحد يقول الزين عندي!
قُوت رفعت حواجبها بحده: نوران!
نوران ابتسمت وهي تعدل جلستها وتصير مقابل قُوت تماماً: فضفضي وش مزعلك؟ اذا ماتبين أرفضيهم وخلاص لاتصيرين عصبيه لهدرجه!
قُوت تنهدت وهي تبتسم بسخريه وبهمس : ليته بهالسهوله!
نوران عقدت حواجبها من عدم سماعها لها: شلون؟
قُوت حركت راسها بالنفي..قبل تطالع نوران وهي تأشر على اسم هذام: أقول ان هذا رايح يخطب وهو عنده خطيبه وانت كأنك ناسيه هالموضوع وتخيريني بينهم! نوران ماني فاهمه شي! هل هو يحب التعدد؟
ضحكت نوران من تعليق قُوت وهي تطالعها: نسيت أعلمك!
قُوت طالعتها بهدوء وهي تنتظرها تكمل..
زفرت نوران بهدوء وهي ترفع كتوفها: تكنسلت!
قُوت عقدت حواجبها: وش! شلون؟
نوران: وش اللي شلون؟ أقولك موضوع خطبته لشوق،خاله هدى علمت أمي ان هذام راح لعمه وكلمه انه مايبي!
قُوت رفعت حواجبها بقهر: وليه يخطبها من البدايه دامه مايبي،الموضوع لعب بالنسبه له؟
نوران حركت راسها بالنفي: لا مو كذا،حسب مافهمت أن العم قاسم هو اللي راح وخطبها،على مبدأ بنت العم لولد عمها وهالكلام،وهذام ماكان راضي اصلاً!
شتت قُوت عيونها بتفكير..ليه ما أنكر الموضوع يوم كلمته أمس!
رفعت عيونها من تعليق نوران اللي تطالعها بتفحص: شكلك بديتي تفكرين بالموضوع!
قُوت مباشره ضربت كتفها: نوران اخرسي!
ضحكت نوران وهي تبعد عنها: تمام،خلاص مابعلق.
YOU ARE READING
أنتِ الحياة وأنا على قيدك أنتِ..
Romanceعندنا تلتقي الألوان بالأسود فإنه سيعكر صفوها سيجعلها بلون واحد وبلا حياة..لكن عندما تلتقي"قُوت" بذاك الرجُل المُعتم، هل سيحدث العكس؟ ام ان تلك العُتمه ستطفئ بريق تلك الألوان؟ أسمها الذي يأخذ جزء كبير منها..هل سيكون لـ "هذام" نصيبه منه؟
