بيـروت..
وقفت أمام مكتبه وهي كالعاده تستجمع شجاعتها..دقت الباب بهدوء قبل تسمع صوته يسمح لها بالدخول
فتحت الباب وأول ماطاحت عينها عليه شتتها بهدوء..قبل تدخل وتخلي الباب مفتوح جزئياً..قربت ومباشره تكلمت: نعم؟
هذام اشر ع الكرسي أمام مكتبه: اجلسي!
قُوت حركت راسها بالنفي: وش الموضوع المهم؟
هذام رفع حواجبه لثواني: كنت بكلمك عن أبوك،جدي ذكرني بالموضوع وحبيت اسأل.
قُوت تكتفت قبل ترد بجمود: أبوي بخير، والقضيه للحين زي ماهي!
هذام بهدوء: تحدد موعد الجلسه الثانيه؟
قُوت حركت راسها بالنفي: ماتحدد.
هذام حرك راسه بهدوء: اذا حصل شي علميني!
قُوت سكتت لثواني..قبل تزفر بقل صبر: صحيح اني رحت وكلمت جدك لكن أنا مو طفله وأقدر احل أموري، لاعاد تسمع وصايا جدك علي لأنك مو مجبور!
هذام أرمش بذهول من كلامها قبل يرفع حواجبه: أنا ما اترك شي بمنتصفه
قُوت رفعت حواجبها بالمثل:اتركه لأني قلت له اني موافقه، يمكن يحتاج اثبت له لجل يحل عن أبوي!
هذا اتكى على يده وهو يطالعها: ايه، ووشلون بثبتين له؟
قُوت تغيرت ملامحها قبل ترفع كتوفها: لو يبي تصير ملكه ويحل عن أبوي أنا مستعده!
هذام احتدت ملامحه قبل يطالعها: انتِ ساذجه؟ تظنين ان الموضوع بهالسهوله!
قُوت مباشرة عقدت حواجبها: لاتقول ساذجه وانت ماعشت اللي قاعده اعيشه حالياً!
هذام قام ووقف مقابلها قبل ينطق بجديه: وافقي على كلام جدي وانا مستعد لكل شي!
قُوت حركت راسها بالنفي: انت مو مسؤول عني! وانا وافقت على الشي المضمون ماني موافقه وانت مو راضي تعلمني كيف بتحلها!
هذام غمض عيونه بصبر قبل ينطق بحده: موضوع موافقتك على هذاك انسيه، فهمتي؟
قُوت ردت بشويه غضب: لاتكلمني بهالطريقه! انساه ما انساه شي راجع لي!
هذام عض شفته بصبر..قبل تكمل بإنفعال: تأمرني ولا تعلمني تفاصيل وتبي اوافق كلامك! وين صارت هذي؟ وفوق كل هـ..
هذام مباشره قاطعها وهو يسحب ذراعها بكل غضب ويقربها منه..
حط عينه بعينها بحده: آش! كلامك كثير وعنادك اكبر منك! تفكرين بعقلك الصغير ان عادي يصير بينك وبين ذا المريض عقد وبعدها تدورين طريقه لجل يطلق صح؟
قُوت سكتت وهي تحاول تفك يدها منه..لكن هذام ثبتها وهو يطالع عيونها بغضب: صح ولا لا؟
قُوت غمضت عيونها وهزت راسها بالإيجاب بقل حيله وقت تجمعت دموعها ومباشره حطت يدها الأخرى يسار صدرها..قريبه منه لدرجة انها تحس بأنفاسه على ملامحها..وهالشي سبب لها رجفه بكل خليه بجسمها
بلعت ريقها قبل تضرب صدره وتنفض يدها منه..ابعدت للخلف قبل تنطق بغضب: لاتقرب مني!
هذام شد على أسنانه بغضب: وانتِ لاتختبرين صبري!
قُوت رفعت كتوفها قبل تنزل دموعها لا إرادي: ما افهمك انا حتى مدري وش اللي معصبك لهدرجه! ماتوضح شي ولا تقول شي وتبي مني اوافق كلامك، تعصب على شي اجهله
ترددت قبل تنطق بنبرة بكاء: وتخوفني!
هذام مباشره سكت ولانت ملامحه من سمع اخر كلمه وهو يطالعها..يعرف ان اللي سواه غلط لكن هي تستفزه لدرجه توصله انه مايتحكم بتصرفاته ولا أعصابه..
مسحت دموعها بعشوائيه قبل تطالعه: قول لجدك اني اقدر احل كل شي بنفسي، لايوصيك!
كان بيتكلم ولأول مره كان وده يبرر موقفه لشخص..لكن ماسمحت له لانها فتحت الباب وهي تخرج من عنده..دلك جبينه وزفر وهو يتذكر كلمتها "تخوفني" مايدري ليه لكن ماوده ابد تحس بهالشعور منه..مايعرف يتحكم بأعصابه ولا إنفعالاته وهالشي وده يفهمها إياه لكن مافيه ولا حوار بينهم فيه هادي كل حواراتهم شد وجذب..وهالشي اتعبه كثير لكن مايقدر يبرر لها مشاعره الحين ولا عنده المقدره اصلا!
خرجت من عنده قبل تجلس على الكراسي اللي أمامها بذهول..ضغطت بكفها على المكان اللي مسكها منه وهي تبلع ريقها..يخوفها لكن تأمن له بنفس الوقت وهالتناقض بمشاعرها اتعبها كثير..ليه هو شخص صعب لهدرجه وماينفهم لهدرجه، ماتدري!
سبب غضبها عليه كله انها تحس انه يسوي كل شي لجل كلام جده فقط..ومايعجبها ابد انها تفكر انها صارت عبء عليه..لكن يداهمها كلام نور من جهه ويشتتها أكثر..
زفرت وهي تقوم وببالها شي واحد انها ترجع السعوديه الان وحالاً..تحس انها وقت تكون عند أمها وتبتعد عنه بتقدر تجمع أفكارها وتفكر بكل شي بشكل جيد..
توجهت لتحت تدور نور..وارتاحت وقت لقتها بالمكان اللي تركتها فيه لكن جالس معها ليث..اللي صارت تلاحظ انه مايفارقها كثير..
قربت وهي تجلس بهدوء..نور مباشره تفحصت ملامحها بتركيز: فيك شي؟
قُوت حركت راسها بـ لا قبل تستقبل سؤال نور التالي: وش يبي هذام؟
قُوت زفرت قبل ترفع عينها لها: نور خلك منه واحجزي بنرجع السعوديه!
نور مباشره التفتت لليث بإستغراب وهو طالعها بالمثل..
قُوت طالعتهم ورفعت كتوفها: شفيكم مو خلصت الاختبارات؟ وش مقعدنا هنا! درجاتنا توصلنا هناك.
نور ارمشت بهدوء: لا بس استغربت انه بهالسرعه! شكل عجبك الوضع!
قُوت ابتسمت بخفيف: بصراحه ايه،كنت اقول اول ما أخلص جامعه برجع كندا بس الان؟ الرياض ولا شي غير الرياض
ليث ابتسم: زين كانت هالروحه فاتحه خير اجل.
قُوت حركت راسها: يمكن! عموماً انا تعبانه بسبقك البيت،متى تجين؟
نور طالعتها وهي ترفع كتوفها: مدري،متى ماخلصت من المعرض!
قُوت حركت راسها بتمام قبل تقوم وهي تأشر لهم بيدها لانها بتخرج..
ليث مباشره التفت لنور: كانت عند هذام؟
حركت راسها بـ ايه: اي ناداها،بس ماعجبني شكلها يوم جات!
نور عقدت حواجبها وهي تلتفت له: لو خويك ذا مزعلها ياويلك!
ليث مباشره ضحك: وأنا وش دخلني؟
نور ضحكت بخفيف: مدري،بس ياويلك!
ليث حك حاجبه وميل شفايفه بهدوء قبل يلتفت لها: بتروحين السعوديه؟
نور ابتسمت بخفيف وهي تحرك راسها بـ ايه: بروح،أهلي صارلي من بداية هالترم ماشفتهم، انت بتقعد هنا؟
ليث حرك راسه بالنفي: لا طبعاً، اشتقت لأمي.
نور طالعته بإبتسامه خفيفه قبل تشتت عيونها: يوم قلت أمي،صار عندي فضول اشوفها!
ليث ابتسم: بتشوفينها!
نور: شلون؟
ليث طالعها قبل يرفع كتوفه: أحتمال أمي وأمك يتعرفون!
نور ارمشت بذهول قبل تضحك: وش بتقولها؟ تعالي أعرفك على ام زميلتي؟
ليث ابتسم من عدم فهمها..قبل يقوم وهو ياخذ نفس: بعلمك بعدين وش بقول لكن عندي كم شغله اخلصها، قومي أوصلك.
نور مباشره حركت راسها بالنفي: لا انا اروح،وبعدين عندي شغل بالمعرض بخلصه.
ليث حرك راسه بهدوء..قبل يتأملها لثواني من نزلت راسها تطالع جوالها..ومباشره شال عيونه من رفعت نظره له وهو يأشر لها بيده قبل يخرج من المكان..
YOU ARE READING
أنتِ الحياة وأنا على قيدك أنتِ..
Romanceعندنا تلتقي الألوان بالأسود فإنه سيعكر صفوها سيجعلها بلون واحد وبلا حياة..لكن عندما تلتقي"قُوت" بذاك الرجُل المُعتم، هل سيحدث العكس؟ ام ان تلك العُتمه ستطفئ بريق تلك الألوان؟ أسمها الذي يأخذ جزء كبير منها..هل سيكون لـ "هذام" نصيبه منه؟
