أنتِ الحياة وأنا على قيدك أنتِ..

26

اراضي بيروت..الساعه ٤:٠٠ مساءً..
دخلت مع نور وهي ترمي شنطتها ع الكنبه وتجلس قبل ترفع نظرها لنور اللي طالعتها بهدوء: متأكده ان ودك تقعدين هنا؟
قُوت مباشره رفعت حواجبها: قالي روحي! قالها بالفم المليان يانور.
زفرت نور بتعب من حالهم قبل تلف متوجهه للمطبخ ومباشره قُوت قامت وراها: تراك ماشرحتي لي زين،وش قالك بالضبط؟
تركت نور السكين اللي بيدها وهي تلتفت لها: قال أبيك بالحلال واشياء ثانيه مافهمتها!
رفعت حواجبها قُوت قبل تكمل نور وهي ترفع كتوفها: ان فيه امور تعيقه واشياء واجد مافهمتها!
سكتت قُوت وهي تعض شفتها لثواني وهي ماتدري تقولها عن رفض أمه او ماتقول..واخيراً قررت تسكت قبل تبتسم بهدوء: بس كويس انه نطق والحين فهمتيه!
نور حركت راسها بالنفي: ما اقدر اقول اني فهمته بشكل كامل لاني مافهمت بقية كلامه!
تنهدت قُوت بخفيف قبل تلتفت لها نور: خلك مني الحين، ماودك تكلمينه وتتفاهمون؟
قُوت حركت راسها بالنفي قبل تبلع عبرتها وهي تبتسم بسخريه: نتفاهم! هو انا اقدر اتفاهم معه ولا اخذ واعطي يعني؟
نور تكت ع الطاوله وهي تطالعها: طيب كلمتيه انك بتجين معي، عشان مايقلق بس!
قُوت حركت راسها بالنفي: ولا بكلمه هو بديهي بيعرف اني هنا!
طلعت من المطبخ وعين نور تراقبها قبل تزفر بهدوء لانها تشوف حال قُوت اللي تغير تماماً وكاشفه كل مشاعرها اللي تداريها حتى عن نفسها..

دخل شقته مع حلول الظلام وهو يسكر الباب قبل يطالع المكان بهدوء وهو متأكد من عدم وجودها..لكن دخل وبداخله امل بسيط انها تكون قدامه ع الكنبه او بغرفتها..
لكن خابت كل ظنونه من عدم وجودها بمكان قبل يوقف على باب غرفتها وهو يطالعها بهدوء..كانت غرفه بسيطه وأثاثها قليل لكنها صارت مليانه حياه بلون مفرشها الأبيض وأغراضها المتناثره على التسريحه واللي عرفه بهالأيام انها فوضويه نوعاً ما..عكسه بكل شي وهذا اللي يشد إنتباهه لها..قرب وهو يمد يده لسلسالها اللي موجود على تسريحتها..تأمله لثواني قبل يضم كفه عليه وهو مايدري وشلون بتكون هالليله بدونها بعد ماتعود طول أيامه الماضيه انه ماينام إلا يوم يمرها ويتأملها ويشبع من ملامحها..
تنهد وهو يحطه على طاولتها قبل ينزل يده لجواله اللي يرن ورد مباشره من شافه ليث..
ابتسم بخفيف من نبرته المبسوطه: يالله حيه، وش تبي؟
ليث ابتسم بهدوء: ابيك ياخوك، نتقابل؟
هذام حرك راسه بالنفي بهدوء: تعال البيت ماودي اطلع.
سكت لثواني قبل يكمل بهدوء يوضح لليث: عند نور ماهي موجوده.
حرك ليث راسه بتمام: مسافة الطريق..
_
بهالوقت وقفت قُوت على بلكونتها وبيدها كوب شاي وبدون شعور منها توجهت عينها لبلكونته قبل تنزل عينها لكوبها من تذكرت وقت راح يسوي لها الشاي ونامت وهي سانده راسها على العود..تذكر وقت قامت صباح ذاك اليوم وهي ماتتذكر شي إلا ان العود كان بيدها وماتدري شلون جات على السرير لكن متأكده انه هو اللي قومها وغطاها..
عفست ملامحها مباشره من تذكرت كلامه لها قبل تشتت عيونها من حست ان البكاء يداهمها وهي تمتم لنفسها: مو على كل شي تبكين خلاص!
التفتت مباشره من صوت نور اللي وقفت جنبها: ودك تبكين ابكي محد بيدري، حتى هو!
حركت راسها بالنفي قبل تحط كوبها ع الطاوله جنبها وهي ترجع عينها لبلكونته: غريب! يوم يكون قريب لدرجة اني احس ان محد يعرفه كثري ويوم يبعد لدرجة احس اني ما أعرف عنه شي!
نور طالعتها بهدوء: اختصرلك؟ لانه يوم يقرب يخاف انها وضحت عليه مشاعره ويرجع لجموده!
حركت قُوت راسها بالنفي قبل تنطق بسخريه: بعيد كل البعد عن المشاعر، يتصرف ويتعامل بشوية إهتمام وبعدها يرجع يجرح ويرمي حكي!
نور رفعت حواجبها بهدوء: وانتِ وقلبك وش وضعكم؟
قُوت ضحكت بسخريه لثواني: أنا وقلبي نكرهه ونحبه بنفس الوقت!
سكتت نور وهي تطالع قُوت اللي عيونها على بلكونته وهي لأول مره تعترف لها والأهم تعترف لنفسها "ان هي وقلبها يحبونه" وكلمة الكره هذي تدري انها تقصد فيها تصرفاته ماهو هذام نفسه..
رفعت حواجبها بهدوء: تكرهينه؟
حركت راسها بالنفي من حست ان دموعها بتخونها: ياليت!
تأففت نور وهي تلتفت لها قبل تشوفها تمسح عيونها مباشره بقوه: خلينا ندخل برد!
زفرت نور وهي تلتفت خلفها من دخلت لجوا تقطع هالحكي وتقطع شعور البكاء اللي بدأ يحاصرها..