أنتِ الحياة وأنا على قيدك أنتِ..

23

بعد مـرور أسبـوع..
اليوم المُنتظر للجميع وأولهم هذام اللي عدل بشته وهو يلتفت لجده اللي مبتسم له..قبل يلف للباب اللي دخلت منه امه وبيدها مبخره وهي تبتسم: ياحلو ولدي ياحلوه
ابتسم لها هذام قبل تدخل خلفها ماريا اللي ميلت شفايفها: يمه ترا القرد بعين امه غزال!
هذام التفت لها: انتِ اسكتي وعلمينا متى بتعرسين؟ طولتي!
ماريا تنهدت: هاه بيعرس وبدأ فينا،ياخي خذ عروستك وخلنا احنا مبسوطين!
ضحك عبدالرحمن قبل يقرب لها وهو يدخلها تحت ذراعه:وهي صادقه خلها ماشبعنا منها!
هذام ميل شفايفه قبل يلتفت للمرايه يعدل شماغه: اتفقوا علي هذا وحفيدته،من يسكتهم الحين؟
ضحكت هدى قبل تلتفت لدخول قاسم من الباب اللي خلفهم..ملامحه جامده كالعاده ولاتوحي بأي شي إلا نظره اعطاها هذام بدون كلام..قبل يلتفت لصوت هدى اللي قربت له: ابو العريس،تعال نبخرك!
قربت وهي تبخره قبل ترفع عينها له بهمس: طلبتك بس الليله لاتعكرها!
قاسم اشاح بنظره عنها..قبل يوجه نظره لأبوه: مشينا؟الضيوف اكيد انهم وصلوا هناك!
عبدالرحمن حرك راسه بهدوء: يلا يا أبوي مشينا
تعدوا من جانب هدى اللي مسكت هذام من ايده..قبل يبتسم وهو يشوفها تمتم بالمعوذات وتنفث عليه..عادتها اللي ماغيرتها من يوم كانوا صغار هو وهشام قبل يطلعون لأي مكان لازم تحصنهم ثم تسمح لهم بالخروج..
قرب هذام وهو يقبل راسها..قبل يتبع أبوه وجده للخارج.

عند قُوت اللي كانت بالقاعه..تأملت شكلها لثواني بالمرايه اللي قدامها قبل تزفر وهي تعدل طرحة فستانها بتوتر..كل مافيها متوتر وأضعاف العاده وتحس بهاللحظه وكأن قلبها بيخرج من مكانه..غير امها اللي طلعت لها بسالفة المُصوره اللي تنتظرها بالخارج..
التفتت مباشره للباب اللي انفتح قبل تاخذ نفس وهي تتوجه لنور اللي دخلت منه..وبدون مقدمات ضمتها بقوه وهي تمتم بصوت اشبه بالبكاء: وينك قلت لاتطولين!
نور ابعدتها بخفيف قبل تتفحص وجهها: بنت! لايكون بتبكين؟
قُوت حركت راسها بالنفي قبل تبعد لوراء: ماراح ابكي بس متوتره وخايفه واحس معرف وش لازم اسوي!
نور قربت وهي تمسك يدينها: اهدي قُوت اهدي يدينك ترجف! اللي بتروحين معه هذام مو غريب عليك وانتِ عارفه انه قد وعده لك وان هالزواج قدام أهلكم بس!
قُوت غمضت عيونها قبل تزفر: ادري نور،لكن مابي اروح برجع مع أهلي مابي خلاص!
نور غصب عنها ضحكت: بنت! انتِ مو بزر وعارفه من البدايه كل هذا،ليه ماقبلتي يتأجل؟
قُوت رفعت حواجبها: وإذا تأجل كان بيختلف شي يعني؟ بيصير بكل الأحوال!
نور ميلت شفاهها قبل تطالعها: بس يمكن وقتها تكونين مبسوطه وكل هذا برضاك!
قُوت بسخريه: شي انغصبت عليه من البدايه،متوقعه بيجي يوم وارضى فيه؟
نور رفعت كتوفها: ماتدرين!
قُوت سكتت قبل تتأملها نور لثواني وهي تبتسم: لأول مره بمدحك واقول انك احلى عروس شافتها عيني
قُوت ضحكت: عروس مزيفه قصدك!
نور رجعت تحضنها..قبل تبعد بهدوء من انفتح الباب ودخلت منه جوليا اللي ابتسمت لهم: قُوت،يلا ماما المُصوره عم تنتظرك!
قُوت زفرت بضجر: ماما!
جوليا عقدت حواجبها: نور قولي لها تبطل تعترض على كل شي! حتى هذام خبرت هدى تتصل فيه يجي يلا!
قُوت تأففت قبل تلتفت لها نور وتبتسم بهمس: يلا خلاص تحملي شوي!
خرجت قُوت مع أمها من الغرفه..وبهاللحظه نور طلعت جوالها وهي تفتح محادثة ليث..ميلت شفايفها لثواني وهي تشوف اخر كلام حصل بينهم قبل أسبوع غير اساساً عدم رؤيتها له من فتره طويله..ماتنكر انها تحس بإشتياق فضيع له وتكابر على نفسها كثير..لكن بهاللحظه ماقدرت تكابر أكثر وهي ودها ترسله..احتارت كثير وش اللي لازم تقوله..لكن اخيراً ارسلت "نقطه" مجرد نقطه..ماتدري ليه..لكن ماعندها شي تقوله..