صباح اليوم التالي..الساعة ٨:١٥ صباحاً..
قُوت وقفت جنب نور اللي كانت على البلكونه وهي تحط يدها على جبينها: متأكده بتروحين؟
نور تنهدت بصوت عالي: قلت مافيني شي يابنت! جهزتي شنطتك؟ رحلتنا الساعة ١١ مابقى وقت!
قُوت حركت راسها بـ ايه: جهزتها لكن قلبي مش متطمن!
نور مباشره التفتت لها: بسم الله ليه؟
نور رفعت كتوفها: مدري،مابي اروح هناك وأبوي لسا مارجع!
نور ميلت شفاهها بهدوء: قُوت بطلي تشيلين هم كل شي،أبوك بيرجع اذا مو وقت رجعتك بيكون بعدها بكم يوم،ريحي نفسك أرهقتيها يابنت!
سكتت قُوت وهي تطالع أمامها وتحديداً "شقة هذام"..
قبل تلتفت لنور اللي نطقت بتردد: ادري ماتبين اتكلم بهالموضوع،لكن لأخر مره بقولها، اسمعي كلام هذام.
قُوت زفرت وهي تلتفت لها: قال شي أمس.
نور رفعت حواجبها: ايش؟
قُوت رفعت كتوفها: يوم قلت له عن موضوع مشعل وان جدي يبي يصير شي رسمي،قال ماهو بحاصل!
نور عقدت حواجبها: ما سألتيه؟
قُوت حركت راسها بـ ايه: سألته، بس قال وقت ترجعين بتعرفين!
نور زفرت قبل توجه نظرها لشقته: غريب هالأدمي! وماينفهم منه شي!
قُوت حركت راسها بهدوء وهي تطالع شقته: فعلاً.
ثواني قبل ترجع تلتفت لها بتذكر: لحظه! امس اعفيتك من الهرج،لكن علميني ليث شلون جاك لهنا؟
نور ابتسمت بخفيف: كانت أغراض الرسم بسيارته من وقت السالفه اللي قلت لك يوم كنتي بالسعوديه،وجاء بيعطيني إياهم وبس يوم شافني تعبانه اصر انه يوديني!
قُوت ضحكت وهي تدندن: طلع عاشق طلع مهتم.
نور مباشره ضحكت وهي تضرب كتفها: مو كذا! ترا هو حليل معي دايم وبس!
قُوت حركت راسها بـ ايه بتسليك: ايه صح، وانتِ وش شعورك ست نور؟
نور رفعت حواجبها: شعوري بأيش؟
قُوت ابتسمت: إتجاه صاحبنا!
نور رفعت كتوفها قبل تميل شفاهها وهي تبتسم بعبط: مدري،أعلمك اذا علمتيني بشعورك إتجاه صاحبنا الثاني!
قُوت تغيرت ملامحها وعدلت وقفتها قبل تزفر: نور سكري هالموضوع،لاني بهاللحظه وافقت على أدمي ثاني لو مستوعبه!
نور رجعت رفعت كتوفها: ويمكن ماتتم هالموافقه!
قُوت زفرت وهي تلف بتدخل..قبل توجه كلامها لنور: اقول ادخلي لاترجع حرارتك وتخرب كل مخططات الرحله!
بعد مرور يومين..وعلى أرض الرياض الحبيبه وتحديداً "بيت خالد المحسن" الساعة ١٠:١٢ صباحاً..
غمضت قُوت براحه اخيراً وهي متمدده بحضن جدتها فاطمة اللي تلعب بشعرها بحُب..
قبل تزفر بهدوء: فقدت أبوك،شكلي تعودت يصير قدام عيني.
قُوت قامت وهي تتربع أمامها: قال انه راجع قريب لاتزعلين نفسك ياست الحلوات
فاطمة ضحكت قبل تطالعها بهدوء: ودي اسألك يا ام لسان معسول!
قُوت ابتسمت وهي تنتظرها تكمل..
لكن اختفت ابتسامتها تدريجياً من سؤال جدتها اللي قالته بنبرة ممازحه: وش قلتي بموضوع الخطاطيب اللي هجموا على جدك؟
قُوت سكتت بحيره..وش تقول؟..تقولها على موافقتها على مشعل اللي للحين ماصدقتها ولا استوعبتها؟ ولا تسكت ويقولهم جدها كل شي؟ ماتدري..
قبل تفتح فمها ترد قاطعها جوالها اللي رن..التفتت وهي تطالع الأسم اللي على الشاشه كان مجرد نقطه فقط وحتى النقطه استكثرتها عليه..
قامت وهي تتوجه للمطبخ: الو.
كشرت من وصلها صوته: ادري انك وصلتي،مريني الشركه!
ردت بجمود: زين.
قفل ومباشره نزلت جوالها وهي تطالعه بكره قبل تبلع ريقها بقهر..
طلعت لجدتها وهي تشوف أمها أمامها..
مباشره تكلمت بهدوء: ماما بروح امر نور تبغاني،عادي؟
جوليا حركت راسها بهدوء: بس ماتطولي ماما!
قُوت حركت راسها بهدوء قبل تطلع لفوق..
YOU ARE READING
أنتِ الحياة وأنا على قيدك أنتِ..
Romanceعندنا تلتقي الألوان بالأسود فإنه سيعكر صفوها سيجعلها بلون واحد وبلا حياة..لكن عندما تلتقي"قُوت" بذاك الرجُل المُعتم، هل سيحدث العكس؟ ام ان تلك العُتمه ستطفئ بريق تلك الألوان؟ أسمها الذي يأخذ جزء كبير منها..هل سيكون لـ "هذام" نصيبه منه؟
