مليت من كثر الصبر طال انتظاري...طال والشوق في وسط الصدر سنين على هالحال

البارت السادس والثلاثين

لفت ريما على اجوان الي كانت مستغربة رد اخوها رفعت اكتافها باستغراب لاختها الي اخذت جوالها تتصل بعبير
ريما : يلا عبير حنا تحت
عبير : ثواني ونازله
ريما : تمام
سكرت جوالها واكتفت بالصمت الي ان طلعت عبير لهم
سلمت بعد ما ركبت السيارة : السلام
ردوا عليها السلام
اخذت اجوان جوالها وبدات تكتب : و ذا راشه العطر كله
ريما : جت على العطر انتي سمعتيها كيف تتدلع بالسلام
اجوان : صحح مرهه مستفز الصوت
ريما : وياليت على الي تسويه تجيب راسه
اجوان : اي والله لو تدري بس وش يقول
ريما : خلاص اسكتي واضح اننا نتكلم فيها
اجوان : خليه يوضح بالطقاق
سكروا جوالاتهم وبدات عبير تتكلم مع اجوان
وصل لريما اتصال وفتحت جوالها على طول
ريما : هلا يا امي انتي
عرف ابراهيم من كلمتها بانها تكلم الهنوف وقرب من ريما بدون لا تحس لاجل يسمع
الهنوف : هلا ريما اسمعي بتاخر شوي تليك تركي عنده شغله يخلصها واجي
كانت ريما بتقول شي لكنها تراجعت بسرعه بعد ما تذكرت : خذي راحتك يا قلبي حنا تونا طالعين لا تخافين منتي متاخره
ردت الهنوف بهدوء عكس توترها : كويس يلا اجل
سكرت ريما الخط ولفت على الي كان يتسمع و ودها تتكلم لكن عبير معهم هزت راسها بزعل و وجهت انظارها للنافذة تتامل الطريق وتهدي نفسها ليومها المنتظر
{الصالون}
نزلوا البنات للصالون لكن اجوان رجعت تكلم اخوها
اجوان : خلك قريب يمكن اتصل عليك ولا شي
هز ابراهيم راسه بدون لا يرد
توقعها خلصت ولف يمشي الا انها مسكته بسرعه و الواضح بانها كانت متوتره
نطقت بتوتر واحراج : لا تفهم كلامي غلط وماهو قصدي اخرب بيتك بس فكر بالموضوع قبل لا يطول وتدخلون بالجد ونفس ما قلت
سكتت شوي منحرجة من الي بتقوله لكنها قررت تكمل كلامها بصوت واطي : احم مغصوب يعني لا تكمل بالغلط وانت عارف انه غلط  صح
ضحك ابراهيم على كلام اخته الي بالنسبة لها انه مفهوم وهز راسه كإيجاب على الي قالته
ونطق : الله يسهل الامور يلا ادخل لا تتباطاك هالغبية ذيك ماني فاضي لها واي سوال عني رده مدري زين
هزت اجوان راسها بسرعه وكانها تنتظره ينطقها ودخلت للصالون
بدات ريما بشعرها وقررت بانها ترفع شعرها وتكون تسريحتها هادية
(الصوره بالانستا)
و اجوان وعبير كانو يسوون اظافرهم
ما ان انتهت ريما من شعرها الا بالهنوف الي دخلت وفزت لها ريما تحضنها
نطقت ريما بصوت عالي : اخيرا جيتي احسني ضايعه بدونك
ردت الهنوف وهي متوترة ولا انتبهت بحركة ريما : تاخرت؟
رجعت ريما ترد بصوت عالي : لا ابدا بس انا اذا انتي كنتي مو معي احس الساعه سنة لو معي عسرة لازم تكونين انتي اولهم
استوعبت الهنوف وضحكت على حركات ريما : ياقلبي انتي بعدين تعالي وش هالزين يهبللل شعرك طالعه قمر
فرحت ريما وردت بسرعه : جد امانه حلو عبير تقول كان عجوز لازم شعري يكون مفتوح
عقدت الهنوف حواجبها منصدمه من الي سمعته كانت بتنطق الا ان عبير تكلمت قبل
نطقت عبير بتعالي : وانا وش قلت صدق وين جالسين فيه شعرك مرفوع كذا تراك عروس
تعصبت الهنوف من كلام عبير ونطقت تتجاهل عبير : معليك منها من العروس انتي ولا هي ومن الي مرتاح انتي ولا هي سوي الي يعجبك ويريحك وما عليك من احد
ردت ريما : ويلوموني فيك اخخ بس
استفزت عبير من كلام الهنوف وقررت بانها تستخدم خباثتها : اسمعي يا ريما بما اننا على وجهه عرس ثنتينا اقول لك اسمعيني انا واتركي عنك الي ما يفهم بشي
فهمت الهنوف مقصدها ولا تكذب بان عبير قدرت توصل لنقطة ضعفها وتكسرها
تركتهم الهنوف بهدوء بعد هالموقف و توجهت تحط اغراضها بالغرفة وتردد بداخلها : هي متقصده اهدي اهدي
وطلعت لاجل تبدا بشعرها توجهت للكرسي وجلست تنتظر العاملة حست انها طولت ورجعت راسها تسنده تريح شوي الا انها حست باحد فوق راسها فتحت عيونها وكانت عبير الي اول ما فنحت عيونها
قربت منها وهي تهمس : قد قلت لك هو لي ولا تسوين فيها المسكينة انتي من البداية الي اخذتي شي مو لك وهذي نهاية اللقافه
انهت كلامها بأبتسامة بريئة ولفت تمشي قبل يجي احد تاركه الي بدات عيونها تلمع بقهر من كلامها
كل هذا صار قدام اجوان الي كانت جايه من الجهة الثانية
دخلت اجوان تجلس بجنب الهنوف الي مسحت دموعها بسرعه وحست اجوان بان الهنوف تحتاج تاخذ راحتها شوي
ونطقت : انا بروح انادي العاملة طولت مره
وهربت بسرعه وهي تدعي على عبير الي وضحت كمية خبثها بدون لا تدري
جت العاملة وبدات بشعر الهنوف الي ما طلبت شي كثير وكانت تبغى شي هادي وبسيط
خلصت و توجهت لقسم الميكب وكانت ريما هناك تجنبت تتكلم معها لانها تعرف بان اي نقاش بيصير بيفتح موضوع عبير
وبدات بمكياجها الي خلصته بسرعه لانها ما طلبت اشياء كثير ولا كان بخاطرها تسوي تهاويل على ما قالت
جلست ورا ريما تتاملها شعرها ومكياجها كانت جميله بشكل يجذب
حست ريما بالهنوف ونطقت : هنوف؟
الهنوف : هلا بغيتي شي؟
نطقت ريما : لا تزعلين من كلام عبير تراها بزر وصدقيني بان موضوعهم وراه بلا
تنهدت الهنوف لانها عارفه بان ريما مستحيل تمشي هالموضوع : ريما بالله ما ابي نفتح هالموضوع ابدا لا تزعليني منك خلاص انسي
ردت ريما بسرعه : خلاص خلاص
خلصت ريما مكياجها و توجهت لقسم الاظافر على ما يخلصون البنات
>>>تسريع احداث
خلصوا البنات واتصلت اجوان باخوها لاجل يجي يوصلهم القاعة
طلعت اجوان للبنات الي كانوا بصالة الانتظار
ونطقت بدون لا تسمع رد احد : يلا البسوا ابراهيم وصل
ورجعت للغرفة تلبس متجاهله الهنوف الي لحقتها
مسكت يد اجوان تسحبها : مو انتي قلتي الاكل بيجي
ردت اجوان : صح قلت كذا بس ابراهيم ما رضى نطلب واصر هو الي يشتري لنا و يوصلنا
تاففت الهنوف ونطقت بعصبية : وش هالحركات طيب عالاقل قلتي لي اتصل بتركي يجي مال...
قاطعتها ريما الي دخلت وهي تقول : اقول بس تعال معنا كفايه عبير معنا و لو تقولين منتي جايه بنجلس كلنا هنا محنا بطالعين
ردت الهنوف وهي جد بدات تعصب من تصرفاتهم : وربي مالكم داعي خلاص افهموا...
سكتت بعد ما دخلت عبير و صاروا البنات يغيرون السالفه
لبسوا عباياتهم وجلسوا ينتظرون وصول ابراهيم
رسلت الهنوف لاخوها تعطيه خبر بانها بتروح مع البنات