တချို့လူတွေ က အချစ်ဦးကို မေ့နိုင်တယ် ၊
တချို့လူတွေက အချစ်ဆုံးကို မေ့နိုင်တယ် ။
တချို့လူတွေကလည်း အချစ်ဦးကတစ်ယောက် ...အချစ်ဆုံးကတစ်ယောက် ၊
စုစုပေါင်း နှစ်ယောက် ။
ဒါမှမဟုတ် သုံးယောက် ။ တခါတလေ တချို့အချစ်ပုံပြင်တွေမှာ ဖူးစာရှင်က သုံးယောက်ထက်လည်း ပိုချင်ပိုပြန်ရော ။
လောကမှာ သနားစရာအကောင်းဆုံးက ရွေးချယ်စရာများလို့ ဗျာများနေတဲ့ လူတွေ မဟုတ်ပါဘူး ၊တကယ်သနားစရာကောင်းတဲ့ သူတွေဟာ ရွေးချယ်စရာ မရှိတဲ့ သူတွေ ပါပဲ ။
ရွေးချယ်စရာမရှိဘူးဆိုတာဟာ ...တစ်သက်လုံးမှာ တစ်ယောက်ပဲ ချစ်မယ် လို့ ဆုံးဖြတ်ထားတဲ့ သူတွေ ပေါ့ ။
ဘယ်လောက်မကောင်းတဲ့ သူပဲ ဖြစ်ဖြစ် ၊
ဘယ်လောက်ဝေးကွာနေတဲ့ သူပဲ ဖြစ်ဖြစ်၊
အဲ့ဒီလူ တစ်ယောက်ကိုပဲ ရင်ထဲကမထုတ်နိုင်ဖြစ်နေကြတဲ့ သူတွေပေါ့ ။
Ellena ဟာ မြို့တောင်ပိုင်းမှာ နေနေတာ နှစ်အချို့ကြာပြီ ၊John နဲ့ Julia ဟာ မကွာရှင်းပါဘူး ၊သူတို့ရဲ့ မင်္ဂလာနှစ်ပတ်လည်ကို ဖိတ်ပေမယ့် ၊Ellena ဟာ အိမ်ပြန်ဖို့ထက်ဘုရားကျောင်းက သီလရှင်ကြီးမွေးနေ့မှာ ကိတ်မုန့်ဖုတ်ဖို့ကို ပို အလေးပေးပြီး ရထား လက်မှတ်ဝယ်ဖို့ မစဉ်းစားပါဘူး ။
တကယ်တမ်းတွေးကြည့်ရင် Julia ဟာ အချစ်ရေးကံကောင်းတယ်ပြောရမယ် ၊သူချစ်တဲ့ သူက သူ့ကိုလည်းချစ်တယ်၊ ကြာရှည် တည်မြဲတဲ့ အချစ်တစ်ခု ။
အီတလီလက်ဖက်ရည် ရောင်းတဲ့ဆိုင်က
သစ်ကြားသီးအရောင်သုတ်ထားတဲ့ ပြတင်းပေါက်ကနေ ဖြည်းဖြည်းချင်းစီးကျနေတဲ့ မိုးရေစက်လေးတွေ ကို Ellena ရေတွက်နေတယ် ။
ဖြည်းဖြည်းချင်းသွားနေတဲ့ မိုးရေစက်လေးဟာ နောက်တခြားငြိမ်ငြိမ်လေးကပ်နေတဲ့ ရေစက်နဲ့ ပေါင်းမိတော့ ထုထည်ကြီးလာပြီး တူတူ စီးဆင်းသွားကြတာကို ငိုင်ကြည့်နေမိတယ် ။
Ellena ဟာ ဆိုင်ထဲက ထွက်ဖို့ ထလိုက်တယ် ၊
သူမရဲ ခြေထောက်တွေဟာ ထိရောက်တဲ့ ကုထုံးတွေနဲ့ အတူ သေချာတဲ့ လေ့ကျင့်မှုတွေကြောင့် နှစ်ပေါင်းများစွာ အကြာမှာ လူကောင်းပကတိလိုပြန်ကောင်းလာခဲ့ပြီ။
YOU ARE READING
Black Paradise
Teen Fictionဘာသာပြန်ဝတ္ထုမဟုတ်ပါ Novelist : Crystal Miyo Type : Own creation work Genre : Classic , Retro Liscence : [CC ] Non-Com, No derivs
