الميراث

* الفصل الثاني *

رنيم:نائل!!!
إبتهال:ايوة.. ما نائل برا لحد دلوقتى، ولسه ما رجعش
رنيم بإستغراب:ايوة يعني وفيها ايه انه يكلم نائل!! هو عيب أن اخ يكلم اخوه؟!
إبتهال:لا طبعا عادى .. بس مش دى المشكله
رنيم:أومال ايه المشكله؟؟
إبتهال:المشكله انك عارفه ان نائل ورائد دول هما اكتر أتنين بتيجي من وراهم المصايب والبلاوى، وبعدين المكالمه ما كنتش تطمن.. انا قلقت من طريقه كلام رائد
رنيم:إزاى يعني؟
إبتهال:كان بيزعق لنائل بس بصوت واطى .. وكمان كان بيبص حواليه كده كتير وكأنه خايف من حاجه
رنيم:قصدك ايه يا إبتهال؟
إبتهال:ممممم مش عارفه، بس انا قلقانه وخلاص، وانتى عارفه انهم لما بيتجمعوا بيكون وراهم مصيبه
رنيم:فكك بقي من الأفكار دي، هو ممكن يكون رائد خايف راغب يصحى ويعرف ان نائل كل دة برا البيت .. اكيد مش اكتر من كده يعني
إبتهال:انتى بتدافعي ليه يا بنتى
رنيم:انا مش بدافع يا إبتهال، انا بس بحاول ما أظلمش .. وبعدين ده أخويا يعني
إبتهال:الله! ما هو أخويا انا كمان
رنيم:بس انا وهو روح واحده وما ينفعش اظلمه وخلاص
إبتهال:ماشي يا ست الحنينه
قاطع كلامهم صوت عربيه نائل.. بصت ابتهال لرنيم وأتكلم باستهزاء:
إبتهال:اهو البيه وصل .. تعالى بسرعه نبص عليه
رنيم:يالا
راحوا الاتنين على الشباك بهدوء، ومسكت إبتهال الستارة، ووقفوا يبصوا من وراها هما الاتنين على نائل وهو خارج من عربيته .. وإبتهال اتكلمت:
إبتهال:شايفه يا رنيم .. شايفه سكران ازاى وماشي يتطوح
رنيم:شوفت .. ما هو كل يوم على كده
إبتهال:وهيفضل كده لحد امتى بس!
رنيم:ايه السؤال الغبي ده، وانا ايش عرفني .. بس يالهوووووى بقى لو راغب عرف اللي هو فيه ده، او لو مرة شافه بالمنظر ده
إبتهال:يا نهاااار ابيض، دى هتبقى مصيبه عليه وعلينا كلنا .. خصوصا لو راغب عرف اننا نعرف وساكتين كل ده
رنيم:اسكتى بعد الشرررر .. ربنا يستر بقى، مش ناقصين احنا 
قاطع كلامهم صوت باب القصر بيتقفل...
إبتهال:شايفه بيهبد الباب ازاى!
رنيم بضحك:غبي
إبتهال:تعالى ننزل نشوفه هيعمل ايه
في اللحظه دي جريت رنيم قعدت على السرير، واتكلمت:
رنيم: لااااااااااا كله إلا كده .. مع نفسك بقي
إبتهال:ليه يعني؟
رنيم بضحك:انتي عايزاه يشوفنا وهو مش في وعيه كده ولا ايه؟ عشان يمسكنا يضربنا
ابتهال:....
( روايات بسوم )
***************************************
تحت في القصر...
وصل نائل، وقبل ما يطلع على اوضته لحقه رائد وهو خارج من المكتب:
رائد:ناااائل .. انت هتطلع تنام وانا قاعد كل ده مستنيك؟
بصله نائل، وراح على اوضه المكتب في صمت، ودخل قعد علي الكرسي.
دخل رائد وراه وقفل الباب وقعد قدامه .. ونائل اتكلم بعصبيه:
نائل:انت غبي ولا ايه؟ بتعلى صوتك ليه وانت بتنادي! عايز حد يصحي يعني؟؟!
ضحك رائد جدًا وأتكلم بتريقة:
رائد:خايف راغب يشوفك وانت سكران كده ولا ايه
نائل بتوهان:انا ما بخافش من حد وانت عارف كده كويس
رائد:اها ما انا عارف .. بس قصدى يعنى مش عايز تسمع لك كلمتين منه على الصبح
نائل:طظ فيه
رائد بضحك:طب مش هتقولى بقي كنت فين لحد دلوقتى
نائل:هكون فين يعنى .. اما انت غبي صحيح
ضحك رائد وغمز له واتكلم:
رائد:مع موزة اكيد
نائل:ولما انت عاااارف
رائد:انا بتأكد بس .. بلاش يعنى
نائل:لا اتأكد براحتك .. انا طالع انام بقي
رائد:لاااااا تنام اييه .. روح خد شاور وفوق كده وتعالى لي عشان عايزك
نائل:الصبح بقي
رائد:ده علي أساس اننا المغرب .. انت مش واخد بالك اننا الصبح من زمان ولا ايه
بص نائل حواليه بتوهة، ورائد اتكلم بضحك:
رائد:انت ضااايع .. روح خد شاور اخلص، وتعالى
نائل:ما تخلى الكلام لما اصحى بقي
رائد:لا دلوووقتى .. انجزززز
نائل:ماشي .. لما نشوف اخرة رخامتك دى ايه
رائد:ما تقلقش .. اخر رخامتى دى، هنقسم الفلوس على ٢ بس بدال ما تتقسم على ٥ يا ناااصح
نائل:لاااااا إذا كان كده بقي يبقي نص ساعه اكون مخلص الشاور و فايقلك
رائد:هو ده الكلاااام .. مستنيك
مشي نائل علي طول وراح على اوضته.
( روايات بسوم )
بعد ساعه رجع نائل، دخل علي اوضة المكتب ومعاه قهوة .. قفل الباب ودخل قعد مع رائد، وأتكلم:
نائل:عملتلك قهوة عشان تفوق
رائد بضحك:ليه هو انا برضه اللى كنت سكران
ضحك نائل، وأتكلم:
نائل:ما تتكلم عدل يا ابنى، ده انا اخوك الكبير
رائد بتريقه:كبير ههههههه والله انا بحس اني انا الكبير
نائل:تاااافهه هقولك ايه
رائد بضحك:والله ما انت قايل حاجة، احنا ندخل في الموضوع احسن
نائل:ايوووة كده، هو ده اللى انا بحبه
رائد:ما انا عارف، قول لي بقى عملت ايه مع الاتنين الجتت اللي قولتلك عليهم؟
نائل:كلمتهم وكله تمام، واتفقوا معايا انهم يقابلوك بكرا في Nightclub بليل
رائد:هو لازم Nightclub يعني؟
نائل:في ايه يا عم رائد، انت هتعمل لنا فيها مؤدب ولا ايه!
رائد:لا مش كده بس...
قاطعه نائل:ما بسش ولا زفت .. مش انت عايز تخلص من راغب!
رائد بضحك:ده مُنى عيني .. لأنه طول ما هو موجود مش هنعرف نخلص على الباقي .. لازم هو يتكل الأول
نائل:يااااااه ويُحتسب من شهداء العمل
ضحك رائد جدًا وأتكلم بإستهزاء:
رائد:هنقدم له خدمه والله
نائل:هتيجي يعني ولا لا؟
رائد:جاي طبعا
استمر بينهم الكلام لحد ما سمعوا صوت راغب بيتكلم مع واحده من اخواتهم البنات:
رنيم:صباح الفل يا راغب
راغب:صباح النور يا حبيبتى
رنيم:ايه بتعمل ايه؟
راغب:رايح الشغل .. انتي لابسه ورايحه فين؟
رنيم:رايحه الجامعه يا حبيبي
راغب:طب يالا تعالى اخدك على سكتى
رنيم:لا انا هشوف نائل ورائد في المكتب، عشان مش موجودين في أوضهم
راغب:طيب شوفيهم، وانا هطلع اجهز العربية .. ولو هيروحوا معاكي قولي لي همشي، ولو مش رايحين اطلعي أوصلك
رنيم:حاضر
سكت نائل، واتكلم رائد بصوت واطي، نائل بس اللي يسمعه:
رائد:يا نهاار مش فايت، ايه اللي موقف راغب جنب المكتب
نائل:مش عارف
رائد:تفتكر يكون سمعنا؟
نائل:ما أفتكرش
رائد:طب اسكت اسكت عشان رنيم شكلها داخله
برا قدام اوضه المكتب راغب بيتكلم:
راغب:حضرلك الخير يا نيمو .. بعد اذنك
رنيم:اتفضل يا حبيبي .. مش هتأخر عليك
راغب:ماشي يا حبيبتي
خرج راغب من القصر، وخبطت رنيم على باب المكتب، وبعدين فتحته وأتكلمت وهي داخله:
رنيم:انتوا هنا وانا قالبه عليكوا الدنيا
نائل:ما تقولى صباح الخير
رنيم:صباح الخير .. ها نازلين الجامعه ولا زى العادة
نائل:انا ما نمتش كويس .. مش رايح
رنيم:وايه الجديد .. طب وانت يا رائد؟
رائد:ما عنديش حاجة مهمة النهار ده
رنيم:انا غلطانه والله .. سلام
رائد:سلام يا صغننة
رنيم:ماشي يا كبير
خرجت رنيم.. راحت عند راغب وهى بتتكلم بعصبيه:
رنيم:مش عارفه بيعملوا معايا كده ليه يا راغب، انا زعلانه منهم جدا .. انا غلطانه انى دخلتلهم أصلا
راغب:ليه كل ده؟ في ايه مالك!
رنيم:الاتنين بيكلمونى وحش، وقالوا مش رايحين
ضحك راغب واتكلم:
راغب:اخواتك يا حبيبتى ومعروفين .. ايه الجديد يعني!
رنيم:مش عارفه، طب نائل أكبر مني هقول ماشي بيكلمني كده عشان هو الكبير .. لكن رائد توأمي، يعني المفروض يعاملني أحسن من كده
راغب:طب ما تزعليش نفسك عشان خاطري
سكت راغب، وباسها من جبينها، وهي أتكلمت:
رنيم:مش زعلانة خلاص
راغب:طب يلا بقى اركبي
رنيم:لا انا هركب عربيتي، وانت امشي ورايا .. لانى هرجع لوحدى، فمش هعرف ارجع من غير عربية
راغب:ماشي يا حبيبتى يالا
ركب كل واحد منهم عربيته، ومشيوا ورا بعض في طريق الإسكندريه جنوب.
دخلت رنيم الجامعه وكمل راغب طريقه للقسم.
.........................
#بسمه_ممدوح