اليتيمة

اليتيمه43

#اليتيمة
#ح_٤٣
#روز_الفياض
.
.
.
‏"أنا من الذين يعاقبون أحبابهم بمساحة هائلة من الصمت."
.
.
.

منمت الا وجه الصبح ،
ومكعدتله الصبح ،
ولا سويتله ريوك ،
محسيت بالوقت بقيت نايمه للساعه (١٠ ) حسيت بمصطفى يلعب يمي ..

كعدت ملكيته بالبيت ..
حاولت قدر الامكان اتجنب شوفته والحجي وياه ..
اكو غصه بكلبي ..
ومااريد اكو ناكره للجميل وبنفس الوقت مااريد احرجه واحرج نفسي ..
مر شهر كامل اكعد الصبح قبله اسويله ريوك وارجع انام قبل لا يطلع من غرفته .
ونفس الشي بالغدا من يدخل لغرفته اروح اصبله غدا وارجع لغرفتي ..
مااطلع منها الا من يطلع من البيت ..
والعشا ميتعشه بالبيت ..
وميرجع قبل الساعه (١٢ ) بالليل ..
هو الظاهر هم ميريد يشوفني ...
رجع مثل قبل ميشتهي يشوفني ولا يحب يكعد يمي هو بغرفته واني بغرفتي ..
جنت اطلع صوفي من الغرفه وهو يروحله لغرفته يدفع الباب ويدخل يمه اسمع صوتهم يلعبون سوه ..

اشتاقيت لحياتنه الهادئه قبل فتره ..
اشتاقيت يجي بالليل ويجيبلي حلويات مثل الجهال الصغار ..
اشتاقيت من نطلع كل فتره نتغدا بره بيوم الجمعه ويشتريلي شعر بنات ويشتريلي شغلات غصب حتى لو ممحتاجتها..

من يحجيلي ساعات عن دوامه وشغله ،
لو عن اصدقائه ،
بس من اتذكر بعده يحب زوجته واني مجرد جسد وفرصه متتعوض ولازم يستغل وجودها وخدامه بلكمتي ،
ومن اتذكر شلون انتبه انه هو كال اسم زوجته مو اسمي ، شلون كام وراح طلع من الغرفه وبعد مرجع ..
استرخص واستصغر نفسي ..
حتى محاول يبرر او يعتذر ..
كلش اذاني وجرحني ..

الشغله اللي ملازم تنسيها لمى انت زوجة اخوه ومن الاول كلج لتتوقعين شي من هالزواج ..
اخوي واكف بيني وبينج ، وزوجته هم حتى لو محجه بس كافي من ذكر اسمها جان متخيلج هي ..
وانت لاتنسين نفسج وتعيشين جو مو جوج ..
لاتتوهمين يحبج لو معجب بيج ...
انت اتعودتي كلهم يحبون شكلج وجسمج يحبون وجود خدامه خادمتهم ومدللتهم من كل النواحي ..
وحده تسوي كل شي بدون مقابل بدون حجي زايد بدون حقوق بدون مطالبات باي شي ..
الكلمه الي لازم متنسيها هي مراح يحب وحده مثلج انت ..
حتى لو اتزوجتي واحد غيره هم نفس الشي عندج طفل معناها راح تكونين خدامه بلكمتج بس خدامه شامله حتى العلاقه الزوجيه ..
اياج تتوقعين اكثر ..
.
.
.
‏عبثًا يخبِّئُ سِرَّهُ في صَمتِهِ
من قالَ أنّ الصمتَ لا يتكلَّمُ؟!.
.
.
.
لايك وتعليق وعشر ملصقات