#اليتيمة
#ح_٦
#روز_الفياض
.
.
.
وبنفس الليله بدت عندي الالام الولاده ..
ودوني للمستشفى جبت ولد همه سموه مصطفى حتى مسألوني اذا ابالي اسم ثاني او اذا عاجبني الاسم تره اني امه ياناس !!
وهم سكتت ومحجيت شي ..
كافي علي حجي ام محمد ناطيه للسستر ( ٥ ) الالاف لو اكلت كلبي كل شوية تعيرني بيها .
باتت يمي بيومها لان عمي مقبل تعوفني وترجع للبيت واني بوقتها جنت تعبانه حيل لدرجة مااكدر احجي كلمة وحده عطشانه بس التعب جان مو طبيعي لذلك الدكتوره اصرت ابقى بالمستشفى لثاني يوم من شافت حالتي ..
نامت ام محمد وبقيت اني اتلوى من الالم ومااكدر اتحرك والطفل يبجي لازم انزله حتى ارضعه ..
تمرمرت بليلتها حتى للحمام محد موجود يساعدني اروح وهي تباوعلي وتسوي نفسها نايمة ..
شيجيب الصبح ..
تمنيت عندي ام وتبقى يمي بهيج يوم وتكولي نامي وارتاحي اني موجوده شتحتاجين ..
مكدرت انام ولاغمضت عيني جوع على عطش على تعب على قهر ..
ثاني يوم رجعوني للبيت ..
اجه حماي اخذنه ..
من وصلت اتصلت بخواتي هدى وسرى كتلهم جبت مصطفى .
للعصر اجو شافوني وباركولي وبقوا يمي شويه بجوا على حالي، وعلى حالهم من حجيتلهم موضوع علي.
هدى:
اني المخبلني ابوي ابد ماعنده احساس ميكول بنتي شلونها شخبارها جابت بعدها عاشت ماتت؟
لمى:
الله يسمع منج ياريت اموت واخلص مو اكو يموتون بالولاده لعد شبي حظي ؟؟
ظلت سرى تبجي..
سرى:
لتكولين هيج اسم الله عليج هو احنه لا ام لا ابو وانوب وحده منه يصير بيها شي منو يبقالنه بعد ؟؟.
لمى:
انت زوجج خوش انسان واهله طيبين الله يخليهم الج بس اني المن باقيه بس للاهانه ؟؟
هدى :
عوفي هالحجي الي يغث وفكري بابنج .. ويمكن يطلع حماج هذا خوش ولد ويداريج ويراعيج ويخاف الله بيج وبأبنج ..
خليها يم الله ..
لمى :
ونعم بالله ..
مطولوا البنات يمي شويه وطلعوا ميحبون ام محمد وبناتها لان يسمعوهم حجي بكل جيه ..
ام محمد جانت من النوع اللي ميخجل ولاتنكسر عينه ولاتحترم جبير ولاصغير ولاخطار ولا ابن ولازوج ولا اي احد واذا رادت تحجي ميوكف بعينها اي شي ولا اي احد ..
لسانها متبري منها ..
حجيها كله خشن ..
جنت مرات اسأل نفسي يمكن جانت عايشة بوسط بيئه من هالنوع ؟!!
يمكن محد حاجي وياها كلمة حلوه ؟؟
لا لا ..
مو ذنبها ... ذنب عمو ابو محمد ..
هو شخصيته ضعيفه يمها ومنطيها كل الحرية للتصرف ومخلي كل المسؤوليات عليها ..
وبنفس الوقت اعتقد هي هم مرت بوضع الجنة الغريبة عمتها ام زوجها يمكن جانت شرسه لذلك اتعلمت منها هالاسلوب ..
ماكو انسان يكون فظ بالفطره اكيد البيئة اللي عاش بيها الها تأثير مباشر عليه وعلى تصرفاته واخلاقه ..
..
.
.
حتى هي نفسها لم تدرك إلى أي مدى قد تغيرت!!💔
.
.
.
تعليق ولايك وعشر ملصقات فضلاً
