#اليتيمة
#ح_٤٤
#روز_الفياض
.
.
.
إبليسُ والدُّنيا ونفسي والهوى
كيفَ الخَلاصُ وكلُّهُم أعدائي؟
.
.
.
ظليت طول هالمده معزوله بغرفتي وهو نفس الشي ..
فكرت اروح لبيت هدى كم يوم مادام زوجها مسافر ..
انتظرته بالليل يجي حتى اكوله ..
بقيت كاعده بالهول نعست وهو ماكو ..
مصطفى نام وديته بفراشه ورجعت باوعت للساعه ب(١٢ ) ونص وين صار؟؟؟
ظليت يارايحه للمطبخ ياراجعه للهول ..
صارت الساعه ب(١ ) وهو ماكو !!!
خفت للايكون صاير بي شي ؟؟
واصلا اني وحدي بالبيت شلون لو دخل علي حرامي ؟؟
شسوي ؟؟
كلت خل اتصل بي ..
اتصلت بي ميرد !!
رجعت اتصلت بي ميرد !!
ماادري مشغول لو ميريد يجاوب ؟؟
ماادري اذا بالطريق وميريد يفتح عليه خط ؟؟
لو حاكرني ..؟
رجعت اتصلت مغلق ...
ضجت ...
وخفت ...
ونعست ...
بس شلون انام والباب مفتوح وهو ماكو ؟؟
على منو اتصل ؟؟
اسألمن عنه ؟؟
زحمه اتصل على اهله بهيج ساعة وخاف اقلقهم ..
بقيت محتاره والقلق كتلني ...
فجأة !!!
سمعت صوت بالحديقه اتوقعت هو بقيت واكفه بالمطبخ اباوع ...
محد ...
لعد شنو هالصوت ؟؟؟
خفت هذا اكيد حرامي ...
رحت اخذت ابني وديته جوه الدرج .
هاي الفكره الوحيده اللي خطرت ابالي ، عالاقل اذا دخل بلكي ميشوفه وميأذيه ...
رحت للمطبخ كعدت عالكرسي كبال الباب حتى اذا يدخل اشوفه ..
هو اصلا شكدر اسويله ؟؟
بس من خوفي ماادري شسوي ...
ظليت اقره آية الكرسي كل شويه ..
رجعت دكيت على علي مغلق ظليت ابجي شيطلع الصبح ؟؟
وره شويه سمعت صوت سياره بره يمكن اجه ؟؟
مسحت دموعي ومديت راسي اباوع ..صوت سيارته بس بقيت بمكاني خاف مو هو ؟؟
اخاف الحرامي ؟؟
افكار غريبه عجيبه خطرت ابالي طلعت الجفجير من الجراره مال الكاونتر هذا السلاح العندي السجينه اخاف منها اخاف يذبحني اني بيها ..
ماادري شجنت افكر وشنو جنت اسوي احس تفكيري مشوش من الخوف ..
تفكيري جان بس شلون احمي ابني مو مهم الطريقة صح لو غلط ..
.
.
.
تُستبدَل كل المعاناة التي يتعثر بها المرء في يومه بكلمة حانية و كتفًا يمكنه الاتكاء عليه دون أن يستثقله ..
.
.
.
لايك وتعليق وعشر ملصقات ..
