اليتيمة

اليتيمه 1

#اليتيمة
#ح_١
#روز_الفياض

_انَ لنفسي كَࢪامة تَعلو على ࢪغباتُ القلبَ🖤

💐

اني لمى عمري (20) سنه ارمله وحامل بطفلي الاول واتوفى محمد زوجي بحادث سياره اتزوجت عمري ( 18 ) جنت بالسادس علمي من بطلتني مرت ابوي حتى اخدمها..

عندي اثنين خوات اكبر مني اتزوجوا حتى يخلصون من ابوي ومرته ..
ابوي جان ظالم مابي محنه وجان بس صياح وضرب وإهانة ..
جان حسره علي الفلس ومن جان بالسنه حسنه ابوي ينطيني مصرف جان يختفي مرته تاخذه وشحدي اشتكي حتى ضرب انضرب جنت انجب واسكت حتى اتكفى الشر واتجنب الضرب والغلط ..
اكرب جنت ليل ونهار بالبيت كنس ومسح وغسل واماعين وطبخ وكل شي وهي كاعده تباوع عالتلفزيون لو عازمه خواتها يجن يتغدن ويتعشن هن وبناتهن واني الزم المطبخ للطبخ وللماعين ومن يطلعون لازم ارجع انظف البيت كله من جديد لان على كولتها اني وجودي بدون فايده بس اكل ونوم ..
وابوي جان من يسمعها يكول مثل امها كل خير مابيها بس مغثه ..
مرت ابوي بقت سنين ماعدها اطفال من ابوي بس عدها من زوجها الاول ولد وبنيه وجانوا يجون يشوفوها ومتخلي شي متجيبه الهم من تروح للسوك واني اباوع بعيوني منتظره يمكن هالمره جايبتلي وياها شي ..
يمكن هالمره ذكرتني بشلحه بملابس داخليه بمعطر ابو الالف عالاقل ..
وطبعا بالنهاية ماكو شي ..
ومن يجون لازم اني اكون طابخة فد طبخه دسمه علمودهم ومن يجي ابوي ويشوفهم يطير من الفرحة عبالك اولاده مو اولاد مرته ..
اتعجب من اشوف فرحته بيهم وبجيتهم ..
ومن جانوا خواتي يجون جان يضوج ويغندب وبس يكعدن اكثر من ساعة يسألهن :

خوما جايات تباتن ؟؟

وبعد هالسؤال اللي يهد الحيل ويكسر الخاطر يجاوبون بالنفي :
لا بابا اجينه نشوفكم ورايحين هسه منطول ..

يجي الرد الاكثر اذيه ومذله :
اي .. عبالي ..
جهالجن ماينحملون واحنه مالنه خلك الدوخه ، شلون متحملينهم ماادري ..

ويطلع ويعوف خواتي كاعدات مكسور خاطرهن ودمعتهن بطرف عينهن وهن اصلا ميجن الا كل شهرين مره ..
يجن حتى ينطني مصرف بسيط مجايات علمود ابوي لو مرته ..

بينما من يجون اولاد زوجته جان يكعد يمهم ويسولف ويضحك ويلزم بيهم الا يبقون عالعشا ومن يطلعون اكثر من مره اشوفه يطلع فلوس من جيبه وينطيهم ويدفع فلوس التكسي ومن يدخل يكول :
خطيه ايتام يكسرون خاطري ..

صح ابوهم متوفي بس اهل ابوهم متكفلين بيهم ومربيهم ويحبوهم ومدلليهم حيل يعني مناقصهم شي كل شي يريدوه يجيهم ..
جنت احس اني اليتيمه من اسمع كلام ابوي مو همه ..
اني ابيته وميدري بيه اكل لو اشرب لو لا ..
مريضة لو صاحيه لو عدله لو ميته ميدري ..
يتذكرني من يريد امسح حذائه لو يريد اغسل ملابسه وملابس السندريلا مرته ..
يتذكرني من يجوع ويريد يتغدا :
لمىىى ...
خ...ره .. وين الزقنبوت ؟

هوايه جانوا يجون يخطبوني بس ابويه جان ميقبل لان منو يخدم مرته وهي ماعدها خلفة بس هالمره جان ابن صديقه وظل يلح عليه لحد مخلاه يوافق ..
واني هم اريد اشرد بروحي العزيزه من هالعيشه ....

اتزوجت محمد  ملحكت اعرفه زين سنتين واتوفى وخلال هالسنتين جنت زوجه بس وقت الحاجه صح مجان يصيح ولا يغلط ولا يضرب وجان ينطيني مصرف ..
بس ماله علاقه ميهمه اي شي يخصني جان يجيني وقت اللي يريد حاجته فقط ومن يخلص جان ينطيني ظهره وينام ولامره كلي كلمه حلوه كل الناس جانت تكلي حلوه الا هو ..

ولامره فتح موضوع وياي وسولفنه ولامره حجينه وضحكنه ..
مثل الاغراب بس جنت اكول حمدي ربج عالاقل ماكو ضرب وينطيج مصرف  ممقصر وياج تكدرين تشترين احتياجاتج عالاقل ..
جنت عايشه بنعيم بالنسبه لبيت ابوي ...
نعيم بس مجان نعيم بصوره كامله ..
بدل مجنت خدامة بالمجان هسه صرت خدامة براتب بسيط او راتب تعبان وميسوه عند البعض بس عند اللي مثلي نعمه احسن من الماكو ..

_سَتَتألَّم حَتّى يُصبِح الألَم شُعور روتِيني .♥️
.
.
.
مساء الخير حبايبي القصة قديمة من سنة ٢٠١٧ تم نشرها لاول مره والبارتات قصيره لكونها اول قصة لي يعني تجربتي الاولى بالكتابة وتم التعديل عليها في (٢٢/٦/٢٠٢٢).

هالله هالله بالتعليقات حتى تنرفع القصة 😘