ترجية بيبي رحاب

الأمومة

#ترجية_بيبي_رحاب
الجزء 2
(الأمومة )
______

أنا نور الحفيدة الأولى في عائلة أسماعيل الأعظمي ، أبصرت النور في 1991/1/30،أثناء حرب  أم المعارك أو " حرب الخليج الثانية" أو " عاصفة الصحراء" او "درع الصحراء" تعددت الأسماء و الموت واحد، أسماني جدي ب (نور) بسبب الظلام الدامس إلذي كان يخيم على بغداد جراء الحرب في ذلك اليوم .
******
من خلصت بيبي رحاب المكالمة ويه بابا عينها ما وكفت، بيبي أريد اسألج هسه هو مو كل يومين وثالث يخابرنه، وتحاجي و تطمئنين عليه، ليش تبجين بكل مرة تحاجي بيها، فدوة بيبي دمعتج غالية عليه كافي تبجين ، كامت نور و حظنت رحاب و باستها من رأسها وهي تواسيها .
رحاب أخذت الطارف مال الشيله البيضة إلي لابستها ، ومسحت عيونها وأستغفرت ربها ، وحظنت نور و بدت أشم بيها و باستها بين عيونها و الأصح بين عكدة حواجبها ، مثل ما تبوس أبنها أبو نور ولأن نور تشبه أبوها فرحاب تسوي الها مثل ما جانت تسوي لأبنها .
سمعي نوره أني ازوجت بسنة 1965 جان عمري خمسطعش، جنت صغيرة وحلوة و الجنه الوحيدة ابيت عبد الرزاق الأعظمي، عيالي جانوا خوش ناس، تجار معروفين وحالتهم المادية زينة ، أهل غيرة و نخوة، وجان جدج أسماعيل هو ولدهم الوحيد، ولد واحد على سبع بنات ،عمتي سعاد الله يرحمها جانت تخاف على جدج من الهوا الطاير، وبس تريد تشوف جهاله ، تحلم تشوف الحوش كله جهال ، ولهذا بعد ما كمل دراسته و أخذ شهادة القانون عمي الله يرحمه بسرعة فتحله مكتب و زوجوه ،نسوان كبل يا بيبي جانن يتفاخرن بولدهن، وياهو إلي تجيب ولد اهواية هي احسن وحدة بيهن، عقلياتهم هلشكل جانن، فلهذا عمتي سعاد جانت تسمع اشكال وألوان الحجي بهل سبب، لأن بس ولد واحد جابت وما كدرت تجيب أخ ثاني اله ، عبالك جان بيدها المره ، فجانت سالفة بكل لمة ويصيحولها أم البنات، بس عمتي جانت سبعة وذكية صح هي يادوب تعرف تقره وتكتب اسمها، بس جان عقلها يوزن بلد ، خلت جدج يكمل دراسته و خلته يفوت أحسن كلية بذاك الوكت ذاك من ذاك الي يدرس القانون، بحيث أي وحدة تسمعها حجي على يابو عندج بس ولد وسبع بنات، تكوم عمتي مخليه رجل على رجل و تحجي بزودها وتكوللهن :
اي فدوة لعينه هو واحد بس بعدال عشرة ، حسب ونسب و جمال واخلاق وشهادة ، هو الوحيد إلي كمل دراسته وأخذ الشهادة ، وتسكت النسوان إلي تهذري على رايحه والجايه ، فمن زوجتني جدج جان كل همهه تشوف أحفادها .
ازوجت يا بيبي وحملي تأخر وظلت تنكل بيه من طبيب لطبيب ، ما بقينه لا مستشفى ولا سادة ولا شيوخ ولا مزار إلا رحناله، مابقينه لا اعشاب ولا دوه ونذر وره نذر ، مابقينه شي يعتب علينه ،من جهة الطب كلشي مجان بينه، يكولون بعدني صغيرة اصبروا عليها، ومن جهة الشيوخ ينطوني حجاب و أدعية وسوالف الها أول مالها أخر، عمتي جانت تسمع اشكال الحجي والحجي ما ينضم يوصلني ، و أني أموت قهر وبس اصلي وادعي بس جدج جان يهون عليه جان مثقف و متعلم ومايهتم لحجي العالم ويكول كلشي قسمة ونصيب حتى جان يعترض من نروح شيوخ وسادة يكوللنه كلشي بيد الله، بس عمتي وأني ما نصبر ،كام يكوللنه اذا هذا شي يريحكم روحن ، لحد ما اجه يوم أجتي عمة جدج ناهدة ، وهاي ناهدة صاحبة لسان طويل، صلفة وبربوك وماتنجرع، وجانت مو صلح ويه عمتي ،لين سوتلها مشاكل اهواية من ازوجت ومن تأخرت بخلفة الولد، يعني سوالف كومة، جانت كلما تجينه لازم تكب عركة وراها ، دخلتها للبيت تقبض الكلب، بس جان أمرنا لله مانكدر نردها محسوبة علينه،
بذاك اليوم إلي أجتي بي ناهدة جانت ظهريةوصيف وبشهر آب الآهاب سنة 1967، جان ماضي على زواجي تقريبا سنتين ونص ، أجتي ناهدة هي وبنتها على أساس مسيره علينه ، عمتي تلكتها ذاك الملكه وهلت ومرحبت بيها ترحيب ماصاير، نسوان كبل يا بيبي جانوا يرحبون بالضيف مهما كان بينهم، ولازم لسانهم يكون حلو وياه و وجهم بشوش، والهله والمرحبا ما توكع من حلكهم، جانت تنحسب مو خوش مره إلي ما تعرف اضيف وتعزب و تهلي وتمرحب ، فعمتي جانت نادرة بهل سوالف ،بعد الترحيب انصبت ذيج سفرة الآكل الي بيها كلشي يعجبج ، التمينه ع غدة كلنه و سوالف و وره الغدة الرياجيل راحوا ينامون وكت ظهرية بعد، واحنه النسوان التمينه بصالة و صينية الجاي و الكعك و الكرزات والسوالف .
اندارت ناهدة علية وكالتلي بلهجة ما تخله من الشماته :
ها رحاب ما حبلتي؟؟
البكدج صار عدها لا واحد ولا اثنين ،
يحظي و أنتِ بعدج ولاجاهل ، فرحيها لعمتج و رجلج عاد، وجيبيلهم جهال يملي عليهم الحوش.
أني سكتت يابيبي و خنكتني العبرة وكلشي ما نطقت ، عمتي من شافتني هيج انقهرت ردت على ناهدة:
عيني جنتي مابيها شي ولا أبني كل الدكاتره كالوا هيج ، مثل الورد اثنينهم ، بس بعد كلشي قسمة ونصيب، وكل تأخيرة وبيها خيره ، هسه تلحك تخلف النه بدل الواحد عشرة ويدوخونه أني وجدهم .
و أبتسمت عمتي بوجهه من كالت أخر جملة ، حاولت تلطف الجو وبلكت ينسد الموضوع و تغييره، وما تخلي ناهدة تحجي بشماته بعد ، بس ووووين هاي ناهدة ما تنجرع صلفه والي تريد تكوله تكوله لو مهما يصير ، ناهدة بشماته اكبر ردت على عمتي:
مو كتلج أخذي وحدة من بناتي، ما قبلتي ، هيج احسنلج، جان هسه حوشج متروس جهال،  ارتاحيتي من اخذتيلج وحدة عاكر ....
يابيبي هي من كالت عاكر حسيت كلبي انعصر، لحد هسه يانوره من اذكر ذاك اليوم احس بعصره بكلبي، بيومها ما حسيت إلا ودموعي تنزل عشرة عشرة تجري على خدودي وما توكف هيج حاره بس ربج يدري بحالي ، ماعرفت شسوي كمت بسرعة و ركضت على المخزن بالمطبخ اخذت عباتي ،جنت اعلكها وره باب المخزن ، اخذتها وخليتها على راسي وطلعت من البيت وأني ابجي  ،، جنت أمشي بلا وعي دربونة تشيلني ودربونة تأخذني والعالم تباوع عليه ،ما حسيت على روحي إلا وأني ع جسر و أكبال الكبب مال موسى الكاظم سلام الله عليه ،جانت الكبه تلمع بشمس، كتله كاصدتك يأبو الشدات ، وظليت أمشي وابجي حد ما وصلت للحضرة يا بيبي جان حيلي مهدود منا تعب المشي ومنا تعب الحر حلكي جان يابس من العطش ومنا القهره مالتي ، ماصدكت من لزمت الشباك بيبي بس ابجي وانخي جنت بس احس النسوان يصبرني ويمسحون وجهي ويبجون على حالي ، جنت فاقدة وبصوت عالي اكوله جايه ناخيتك وطالبتك لا تردني ، وظليت أبجي وادعي الله يرزقني بولد،ماحسيت بعد إلا المغرب فزيت ولن روحي نايمة بالحضره على رجل مره مغطيتني بعباتي ، ثاري فاقدة اهناك ومن تعب نمت ما حاسة بروحي والمره الله يرضه عليها منومتني على رجلها ، من كعدت انطتني مي شربت وغسلت ، شفت الدنيه دتغورب ،بهل الأثناء المره كالتلي على طول ما أنتِ نايمة تبجين وتدعين الله يرزقج بولد وتنخين ابو الشدات ،ان شاء الله مايطلع هالشهر إلا وانتِ حامل ، وما اوصيج بس يجيج ولد سمي كاظم ، كلتلها الله يسمع من حلكج ، رجعت اجر بروحي واسحل بعباتي جنت تعبانة بس داخلي مرتاح ، حسيت ذبيت اهمومي كلها يم الشباك، من وصلت البيت لكيت الدنيا مكلوبه عليه وجدج أسماعيل متخبل ، مدورين عليه بكل مكان حتى لبيت اهلي رايحين ،شفت امي وأبوية جايين ،جدج بيومها من شاف خطية من خوفه صار عصبي صيح عليه و غلط، بس من شاف حالتي سكت،دخلت للبيت دايخة سألوني وين جنتي من كلتلهم وين سكتوا و طيبوا خاطري وجدج اعتذر مني وظل يحجي على عمته، وعرفت بعدين عمتي لاعبة لعب بناهدة وراية وطاردتها وكايلتها اذا جنتي صار عليها شي احير شسوي بيج .
بعد شهر من هالحادثة جنت أنظف بالمطبخ وعمتي تطبخ الغده، حسيت بدوخة خفيفة وبعدين قوت و وكعت ما فتحت عيني الا واني بالمستشفى، جانت عمتي وياية مبتسمة وفرحانة وجان تكولي بشري رحاااااب ولج رحوبه أنتِ حامل صلاوات ع نبي ماشاء الله ، الحمدلله ربي ، جانت عمتي تضحك و تبجي وفرحانه وتدعي فرحتها ما تنوصف ، و اني من الفرحه بس ابجي يا بيبي دموع الفرح غير غير عن الحزن سبحانه الي يخلينه نبجي بنفس العين بالحزن وبالفرح بس كل دمعة الها احساس يختلف عن الثاني ، دمعة اصعدج لسابع سما و دمعة تخليج بسابع كاع ،الف الحمدلله على كل حال ، واجاني ابوج يا نوره و فيت بوعدي و نذري وسميته كاظم .
فيا نوره أبوج فرحتي ، من يخابر صح اسمع صوته و اشوف صورته بس بيبي مو يمي كلبي نار عليه ،اريده اكبال عيني بس شنكول ربج بعد كتبله هالغربة.
نوره لا تسألني اي مره ليش ما حبلتي ليش ما عندج جهال ،هاي الاسئلة توجع كلب اي مره ،وهاي الحجاية خليها ترجيه بأذنج .
********
كنتُ اعانق جدتي بشدةٍ أثناء حديثها ،غائبة بين احظانها الدافئة، عندما كانت تتحدث كنت أستمع إليها فقط بدون أن اقاطعها بحرف، اعتصر قلبي وجعها، فهي كالملاك ،و أعلم كيف يكون وجع الملائكة مضاعف، وعندما انتهت من حديثها و وضعت حلق صغير وهمي من الذكريات والنصحية في أذني ، و قالت فهمتِ:
حركت رأسي أيجابًا ، بمعنى نعم .
و أخذني تساءل مخيف هل يا ترى أمي تملك نفس مشاعر الأمومة هذهِ ؟!

يتبع ......
#هبةالناي