ترجية بيبي رحاب

الدولمة

#ترجية_بيبي_رحاب
الجزء 3
(الدولمة )

_____
أستيقظتُ بعد نصف ساعة، وجدتُ نفسي ما زلتُ نائمة على صدر جدتي، جدتي إلتي لم تتحرك من مكانها،لكي لا توقظني ،كعادتها كانت تُمسد شعري برفق، وتقرأ المعوذات بهدوء لا يصلني من صوتها سوى أواخر الأيات، و تنفخ بخفه بصورة دائرية على وجهي ،عندما ألتقت عيني بعينها أبتسمت أبتسامة بحجم الكون ، فبادلت الأبتسامة بأبتسامةٍ أكبر و قلت لها بحب :
بيبي أحبج ،
فردت عليَّ:
عايزة تحبين غيري نوره !!
قالت بلهجتها الرائعة وصوتها المملوء بالعافية والخير ،فضحكت من وقع جملتها الأخير وضحكت هي معي حتى أدمعت عيناها .

يله نوره كومي بيبي ،كعدي غسلي وجهج ، مشطي، توضي، ما ظل شي على آذان المغرب، مو زين تنامين بهل وكت ، يله كومي اروح قبلج اتوضه.
شلت نفسي كوة من حظن بيبي، ضليت كاعدة على القنفه ،اريد اكوم الحكها حتى اتوضه بس الف حسبة برأسي،
أمي وين؟؟
وليش محد يقبل يحجيلي عليها ؟؟
كُل إلذي أعرفه عن امي ،أنها امرأة جميلة وقوية وعنيدة جدًا جدًا ،وهذا الشيء عرفته عندما تتحدث عنها جدتي بصدفة، ليس لدي صور كثيرة لها ، فلدي صورة واحدة ،هي وأبي في يوم زفافهما، كانت أمي ترتدي فستان جميل وبسيط من قطعة قماش واحد من الدانتيل المشغول بدقةٍ عاليةٍ، مفتوح من جهة أعلى الأكتاف و منسدل بطريقة كلاسيكية على كامل جسدها،بقَصة قريبة لقَصة تُسمى "قصة السمكة" ،يُحيط عُنقها عقد صغير من اللؤلؤ ، وحلقان رائعان من اللؤلؤ أيضًا لكن بحجم أكبر، وطرحة طويلة من التول الناعم مثبة من أعلى رأسها حتى نهاية فستانها ، وقُفازان طويلان من الساتان يصل الواحد منهم لأعلى المرفق،  و وردة حمراء واحد فقط بغصنٍ ٍ طويل تحملها بكفها الأيمن ،و الكف الآخر يعانق كف أبي ،إلذي كان مغمور بسعادة ٍلم أراها من قبل فيه، أمي كانت أميرة بالفعل بفستان زفافها ، جمالها كلاسكي ،تلك الكلاسيكية إلتي لا تموت ولكنها تنبض في كُل جيل .
وهنالك أربع صور أيضًا لكل منهما زمن مخُتلف وحكاية مختلفة .
طوال الليل لم يغمض لي جفن، فكلما أحاول النوم أجد أمي أمامي ،صورها القريبة من فراشي كأنها تُحدق بي ،حتى عندما اطبق جفني أستذكر ملامحها واحدة تلو الأخرى ، أنا لا أشبهها ولكن جدتي تقول لي دائمًا بأنني أشبه أبي شكلاً و أحمل صفات أمي،على الرغم أنها عندما تقول جملتها هذهِ تقولها بعتب ، وكان صفات أمي صفات لا يجب أن أقتدي بها !!!
في أحدى الايام قالت لي بعصبية عندما جاء ذكر أمي بملحة كبيرة مني :
"محد طيح حظ أبني غير عناد أمج "
عندما شعرت بثقل الجملة إلتي رمتها عليَّ غادرت الغرفة بسرعة ولم تفتح الموضوع بعدها مطلقاً.
أي عناد هذا إلذي  كانت تحمله أمي ، ما جعلها مضربًا للأمثال!!!!
*****
كعدت متأخرة جانت الساعة اثنعش الظهر، لان ما نمت إلا ورة صلاة الفجر ، جنت خاملة ورأسي مصدع ، شلت نفسي من الفراش بالكوة و نزلت بوجهي للمطبخ ، جانت ريحة الأكل مخيفة ،بيبي من تفوت للمطبخ وتطبخ اتحدى اي وحدة بالعالم تطبخ مثلها او عدها مثل نفسها بطبخ ، ويا عيني الريحة ريحة دولمة افيش الآكلة إلي ما يختلفون عليها العراقيين هي سيدة المائدة العراقية ،وإلي تبدع بيبي بيها أبداع خيالي ،محد تلحكها بيها ، هاي الآكلة إلي اجتنه ويه الاحتلال العثماني للعراق ، و انتشرت بسوريا ولبنان وفلسطين ، بس سبحانك ربي اتفننت بيها العراقية وكامت تسويها اضبط من الاتراك نفسهم .
رحاب :
أني وبالمطبخ وصوت الجدر الي يفور على الطباخ و صوت المي الي مفتوح ع خضره بالسنك ، سمعت نوره وهي تنزل الدرج ، درجة درجة امبينة من نزلتها كسلانة ، شكلها ما نايمة الليل ، دخلت المطبخ و انداريت وشفتها ، كلتلها مثل ما متعودة من هي وبلكماط اكول الها عبارة جنت اغنيها الها هي وطفلة "نوارة نورت علينه ،والصبح بنومتها حالف ما يجينه " وياها هلاهل و اصفك ، لأن من جانت طفلة تنام النهار كله و تكعد الليل كله ، تعبتنه من جنت اشوفها كاعدة الصبح وتلعب بفراشها اغنيلها هاي الجملة وهي تضحك عليها و استمريت اغنيلها لحد هاي اللحظة ،
ولج نورة صارت الظهرية وبعدج نايمة، هاي النومة تأخذ من عافيتج اسم الله على عافيتج بيبي ، وفوكاها نازلتلي لا مغسله لا امشطه ، شفتي كفشتج قبل ما تنزليلي ، احد كلج تخرعين بيبيتج اليوم ،
اني احجي وياها وهي تضحك وتكول جوعااانة ميخالف خل اكل وراها اغسل و اني ما اقبل ، شفت عينها ذبلانة و جنها باجية ما حبيت اسالها هي بعدين تحجيلي ، يله روحي غسلي شون مسويتلج دولمة مثل ما كلبج يحبها ، على ضلوع وباكله وحامضة و دهينة وهااا سويتها حمرة ، تدرين بية ما اكدر اكلها حامضة و لا كلش احب شكلها حمرة بس مادام انتِ تحبيها هيج سويتها الج ،
نور طارت للحمام سمعت بيها حامضة وحمرة ودهينة ،كامت تركص واتهلهل ، رجعت ركض للمطبخ بيبي شسويلج ؟
اثرميلي زلاطة
نوره ناعمة و حلوة مو تسويها خشنة ، داريتج بدولمة اداريني بزلاطة ، شمدريني شون تاكلوها هاي الزلاطة الخشنة .
صار بيبي صار
بيبي شوكت تستوي الدولمة
ميتة جوع
رحاب :
على شنو مستعجلة خابرني أحمد ديسلم ومن سمع دا اسوي دولمة كال رح اجي .
منو كتيلي أأأأأحمد ؟؟
أحمد راح يجي يتغده ويانه
ياربي سترك
مو وكته يجي ابد ابد ....

يتبع ..
#هبةالناي