ترجية بيبي رحاب

لغة العيون

الجزء _٢١_

الذاكرة تكون قوية جدًا مع أول حب ، فأنها لا تنسى صغيرة و لا كبيرة ، تبقى هنالك تفاصيل عميقة لا تُعاش مرتين ،و لكن نتذكرها في كل مرة بصورةٍ تفصيليه .
الحب يستطيع أن يرفعكَ فوق الغيوم أو يهبط بك لسابعِ أرض ،هكذا هو ،يفعل كُل هذا بدون تفسير منطقي واحد !!!

______

من قريت رسالة بلال ما اعرف شصار بية ،
حسيت برجفة لزمتني من فوك ليجوه ،
فرحة ونشوة و خوف و تساؤل
جانت مشاعري مخربطة ، بس اذكر صخنت و متأكدة وجهي صار أحمر لأن بيبي رحاب حست عليه ،بسرعة سدت التليفون من عمتي ،وسألت بعجل :
_شكو شصاير نور منو وياج بتليفون .

جنت اسمع بس احس لساني ثكيل ما اكدر احجي او بالآحرى جانت الرجفة بلساني ، مادري لازمتني العبرة و احس اذا احجي راح ابجي

جان شعور صعب ،حاولت اخفيه وأني ابلع بريكي ، و اعدل بكعدتي .

_نور شبيج منو وياج ،ابوج عمج صار بيهم شي .

بده صوت بيبي يعله وهذا معناها الخوف سيطر عليها ،ماحبيت اخوفها اكثر لايصير شي بيها من ورايه
حاولت الم نفسي و اسيطر عليها و حجيت بتأتأ وبأرتباك وع سريع
_ماكو شي بيبي بس اني دايخة من الصبح يمكن ضغطي نزل ..اي ..هو ضغطي ماغيره ..حتى صخنت ،مادري يمكن ما مصخنه بس هيج احس صخونه داخلية ،لالا يمكن متوهمة

_هاي شبيج يمه شدتخربطين .

مدت ايدها بيبي على كصتي وصدك حست بكصتي حرارة
_حرارة خفيفة ماتخوف ،كومي كدامي عصير ليمونة وحدة وبكلاص مي واشربيها هسه تصيرين مثل الورد

_اي اي صح هسه اكوم

بس اريد اكوم ما اكدر رجلي ترجف ماعرف ليش ،
حاولت استجمع قوتي واكوم بس احس حيلي رايح

_ها نور اكوم بمكانج

مكدرت اجاوب احس عقلي بغير مكان و جسمي يم بيبي ،بيبي عبالها صدك مريضة ،كامت سوتلي عصير الليمون ،وخلته كدامي ورجعت كعدت كدامي تنتظرني اشربه

صح ايدي جان بيها رجفة خفيفة بس حاولت اسيطر عليها و شربت العصير كله فد جره ،مدري العطش مدري الخربطة خلتني اسوي هيج

_على كيفج يمه على كيفج لا تختنكين

أبتسمت و جاوبت
_عاشت ايدج
_بالعافية

وره دقايق صدك حسيت بهدوء و كدرت اسيطر على نفسي ،وحسيت بية حيل اكوم

_بيبي راح اصعد انام شو احس روحي نعسانة
تريدين شي مني

_لا حبيبتي لا روحي نامي
اني هم راح اقفل البوب وانام

صعدت الدرج و أني ويه كل درجة ذكرى تجي ابالي ، من وصلت لباب غرفتي حسيت دموعي سبقتني ،
فتحتها وطبيت ورجعت سديتها و انتاجيت عليهم بس احس نص حيلي راح
كمت انزل شوية شوية لحد ما شفت نفسي كاعدة بالكاع ،و بظهري الباب ،و مخليه راسي بين رجليه وابجي وحاضنه بالموبايل بأيدي