ترجية بيبي رحاب

والله أحبج والله

#ترجية_بيبي_رحاب
الجزء 9
(والله أحبج والله )
______
كُل الأشياء المُميزة تبدو غريبة للوهلة الأولى إلى أن نعتاد عليها و نشعر بتميزها ،هكذا كانت وردة بعيون عمي علي ،الغرابة إلتي سكنت لقاءهُ الأول بها جعلت عقلهُ لا ينفك عن التفكيير فيها ،
وجمعينا نعرف عندما ترسخ فكرة ما في العقل، فقط قدرة الله تجعلنا نستطيع أن نتخلص منها .
_____
مر شهر وما شفتها بعد ، ادور بالجامعة كل يوم ولا الها أثر ،حتى بداخل البنيات جنت ادور عليها اكول يمكن اشوفها يم الاقسام وماكو ،الف حسبة جانت ابالي ،
ساعة اكول معقولة جانت جاية ضيفة للجامعة من غير كلية ؟؟
وارجع اجاوب نفسي واكول لالا
جانت شايله دفتر ومخبوصة بي وتريد استنساخ
لو من غير كلية ما جان سوت هيج ولا تمشي وحدها ،
ارجع اكول اخاف تطلع مرحلة رابعة وتتخرج واني مشايفها ؟؟
واجاوب روحي اذا رابعة راح اشوفها بحفلات التخرج ،
اهواية امور اجتي ابالي ،بس بداخلي جان اكو أمل مرات يكبر مرات يقل ان راح اشوفها .
بعد ما مر شهر و دخلنا بشهر ال 12 ،جان يوم اثنين و الجو بارد والسما مغيمة محملة بغيمات متروسة مطر ،منتظره الوقت الي تفرغ حملها ع كاع ،و الشتا جان مطلع عضلاته علينه بحيث الهوا بارد يكص كص ،وصلنه للجامعة من وكت اني وعمر ،
عمر جان عنده شغلة بالعمادة كال روح للنادي و اني اجي وراك وراح ،
دخلت النادي جان هوسة طلاب والطلاب الصبح دائمًا يجون يقرون بي ،مجموعات مجموعات ، هم دافي وهم يشربون شي حار و هم يكدرون يشرحون براحتهم عكس المكتبة الي ما تقبل نطلع صوت ،
رحت اشتريتلي جاي واختاريت ميز بعيد بالأطراف بعيد عن الهوسة ،كعدت و طلعت كتاب الأدب الأنكليزي جان عدنه امتحان اول محاضرة ، كمت اراجع و اركز بلي ما لحكت اقراه ، جنت كلش مندمج بالقرايه ،هيج صدفة رفعت رأسي بدون تركيز و اني وكاعد أعيد إلي حفظته ،جان تصير بوجهي !!

نفس الأبنية إلي ادور عليها صار اكثر من شهر ،كاعدة بالميز لكدامي ،تقريبًا تلث امتار بيني وبينها و وياها بنات 3 كاعدين وهي رابعتهم ،مطلعين دفاتر و كتب و هوسة ع ميز وديقرن و وحدة تندار على الخ تسالها و الخ اجاوب ،
اني بس اباوع عليها ،نسيت المكان و الزمان واللحظة إلي أني بيها ؛وظليت بس صافن عليها ،تقره بدفتر وتغمض عيونها واشوفها تحرك شفايفها يعني دتراجع ع الغيب !!!
وترجع تفتح عيونها وتأخذ كلاص الجاي تشرب منه وترجعه ع ميز ،ماعرف شكد ظليت اباوع عليها وهي هيج ،
وفجأة رفعت رأسها واخذت اكلاص الجاي ومن دا تشرب باعت ليكدام وصرنه وجه بوجه .
اني لا أراديًا أبتسمت الها ،وخليت أيدي على خدي و بقيت صافن .
____
وردة من يوم إلي صار وياه الموقف ويه علي وهي تستحي تكعد او تمشي بجامعة،جانت تحس كل الطلاب شافوها بذيج الساعة، جانت تحس باحراج ،بيومها من رجعت لصديقاتها وشافوها مو على بعضها و حجت الهم إلي صار ، كلهن كامن يضحكن
وكالولها هذا الموقف مراح تنسي طول عمرج ،
عافوا الموقف و جلبوا بسالفة شونه الولد ،حلو لا طويل كصير أسمر أبيض ،
لعبوا لعب بأعصابها وبس يضحكن ،
من شافوها ضاجت وصارت عصبية ،كالولها عادي هاي الامور تصير مو بس بالجامعة بكل مكان ليش خايفة هيج ،يمكن جان صارت الج بشارع بالمنطقة باي مكان ،بس أنتِ بعد لا تمشين سريع و أنتبهي على رجلك وين تخليها .
اذا هالمره ما وكعتي بحظنه مره الخ توكعين بحظن غيره ورجعن يضحكن .
كامت وعافتهم ضايجة وردة وراحت للخط و هنه كامن  يمشن وراها ولج تعاي سكتنه بعد ما نحجي ......
من داومت ثاني يوم وردة جانت تفوت وتطلع ع سريع و طول الدوام تبقى حاسبة روحها بالقاعة ،جان منحرجة تطلع وتشوف احد وخاصة الولد إلي عثرت بي ،ظلت ع هالحال اكثر من شهر صديقتها ضاجوا منها وبطلوا يبقون وياها وهي تكولهم عادي اطلعوا اني ابقى كاعدة وحدي ،حتى الاستنساخ جانوا البنات يستنسخولها ،وكلما تذكر الموقف تصخن من المستحه وتكعد تحجي على روحها .
___
الزمن كان مُختلف في وقتها ،المشاعر تختلف ،الخجل كانت مُنتشر ،للفتاة حياء ذو رائحة ، عن بعد تستنشقها ، كُل شيء كان مختلف .
____
البنات وره شهر قنعوها الوردة تبطل عاد هلحبسه إلي حسبت روحها بيها ،و اتفقوا شوكت ما تشوف الولد يعوفون المكان إلي هو بي ،طمنوها وكالولها كافي شي وصار وراح ،وصدك يومين رجعت كعداتهم بالحديقة وبنادي ،وما شافت الولد وجانت مرتاحة ، جانت تتمنه ما تشوفه بعد وكلما تمشي بالممر وتوصل لمكان الي عثرت بي تغطي وجهه بيدها وتصخن ،بداخلها تبتسم من الي صار .
لحد ما اجه يوم الاثنين وجان عدهم امتحان صعب البنات و اتفقوا يضربون المحاضرة الاولى ويكعدون بنادي يقرون سوه ،
جانت مندمجة بالقرايه و تسأل بالبنات على الي ما تفتهمه وفجأة رفعت رأسها وبيدها الجاي وشافت ولد اكبالها ،بالبداية ماعرفته بس حست شايفتة قبل ،
من أبتسم الولد بوجهه وصفن، عرفته ،
يبووووه عزه هذا هو ، شأحجي شاكول
والبنات ملتهيات يقرن
وردة جمدت بمكانها و حست بحرارة عالية تصعد بوجهه و كامت ترجف من الأرتباك ،
بهل اللحظة وكع الجاي من ايدها على ميز ونص الجاي نزل على تنورتها و جان حار وهي فزت ،فزت من الموقف من الجاي الحار ، الدفاتر المشمره عالميز خافت لا يوصلهن الجاي ، الأرتباك جان سيد الموقف ،وحارت وين ادير راسها ،
صديقاتها هاي سويتي وردة
دمرتي الدنيا
وردة شالت دفاترها وكتبها وكامت وغطت بيهن التنورة ومشت ،
ومثل اول مرة مو مشي عبالك طارت ،
والبنات وراها
ولج وين رايحة
لموا غراضهم و مشوا وراها ....
راحت للحمامات نظفت التنورة
و متوترة تحجي بصوت عالي
لكم أني شكد ثولة
ادري شبيه كلما اشوفه انثول
البنات مديعرفن شنو السالفة
شنو السالفة وردة
لكم هذا الولد
يا ولد
الي كاعد جان كدامي
الي يقره
اي اي
شبي
هو هذا نفسه الي عثرت بي وضربته
وهسه شفته يباوع عليه ويبتسم و وكعت الجاي
ادري شبية اني
هسه يكول شكد ثولة هالابنية
على طول ما جانت تحجي وردة
جانت تمشي بالحمامات
كلسع تفتح مغسلة وتغسل عليها
والبنات وراها يسدون بالمي
شافوها مرتبكة ظلوا يهدون بيها
ماصار شي
يله عادي
الجو بارد كافي غركتي تنورتج بالمي
شينشفها هسه
يله مشوا نروح نكعد بالمكتبة بعد ما اكعد بنادي
____
بيومها الفرحة ما جانت سايعتني ،صح ما عرفت شي عنها وحتى صديقاتها ما شايفهم قبل وما اعرفهم ،بس اطمئنيت هي طالبة بالكلية ،و اكو أمل أشوفها بعد .
طريق الرجعة كله أني مشغل المسجل ومخلي كاسيت الأغاني و أعيد بأغنية أسماعيل الفروه جي الي جانت طاشة بوكتها ،
والله أحبج والله
و أنتِ ما تدرين بيه
شون اكولج يله
أنتِ المصعبة عليه
جنت مرتاح و مبتسم وعمر يمي
يكولي حركته للمسجل كافي تعيد بالأغنية
واضحك
اكوله شفتها شفتها
_لو تحجي وياها تكلب السيارة بينه
جنت اضحك بخبال
وعمر على فرحتي وضحكتي فرحان ويضحك
جنه معلين المسجل ومنزلين الجامات بعز البرد
ومن تطبك بصفنه السيارات يظلون صافنين علينه ويفرون بيدهم
_ولك دتشوف الناس شون تباوع علينه، عبالهم هتلييه وطالعين من ابو نؤاس ولك نصي المسجل فضحتنه
_علي يعلي اكثر
ويغني ويه المطرب
فتحي كلبي وشوفي حبج أنتِ اسوه بيه
خوفي احجي خوفي اخاف من ردج اليه
_هههههههههه مو كتلك وكعت اليوم اغسل الصبه زين واحضر الجاي
شيخلصنه اليوم
ولك افتهمت بس نصي
_والله أحبج والله
_اهوووووو شصعدني وياك اليوم

جاااانت فرحتي ما تنوصف وما تنقاس ،وصدك بلليل رحت لعمر وكعدنه ع صبه الي ابابهم وجان الجو ثلج
وطلعتنه الحجية جاي وكليجة وشكد رادتنه نفوت
ما قبلت لحد ما كلها عمر يوم عوفي هو مرتاح اهنا

رجعت حجيتله كلشي صار وجنت مثل الطفل إلي جايته هدية جان يحلم بيها ...بس يحجي عنها .

مر كم يوم وهم ما اتشاوفنه ، وردة رجعت عزلت روحها بالقاعة و علي يدور عليها وما يلكاها .
قريب رأس السنة وكفت وردة وصديقاتها صدفة بسنتر الآداب ،شافوا ظفر ولمياء
ظفر ولمياء طالبات بقسم اللغة العربية بكلية الآداب ،وصديقات لوردة والبقية
سوالف وضحك وشقة
بهل الاثناء جانت وردة دا تباوع داير مدايرها ،واجتي عينها على علي ، هالمرة عرفته ،
ارتبكت بس الي خفف ارتباكها هو جان ما منتبه واكف على غير جهة و ياه كروب جبير وديسولف ، حاولت تكول للبنات حتى يغيرون مكانهم
بس ماعرفت شون
استحت من ظفر ولمياء
ظلت واكفة وتباوع عليه
صفنت على طوله ،انتبهت شون من يحجي يحرك بأيده ،شون مبتسم ،شافته من يضحك الكل يضحك وياه ،صوت ضحكته جان يوصلها
المسافة مجانت بعيدة بيناتهم ولا قريبة
جان هي من يمهم من تسمعه يضحك تبتسم
مجان بالها يم البنات
من يحجون بس تهز برأسها
بهل اللحظات الي هي صافنة عليه
ما حست الا اندار على جهتها فجأة
وصار بوجهه
هو اتفاجئ وظل صافن عليها
وردة كالعادة ارتبكت ودارت وجهه
تريد تكلهم للبنات يله
جانت ظمياء ملتهية بسوالف
دارت رأسها مرة الخ بأتجاهه
تريد تشوفه شديسوي

شافته جاي بأتجاههم
انصدمت وردة

يتبع .......
#هبةالناي